ގައިދީންނަކީ މުޖުތަމައަށް ބޭނުންތެރި ބަޔަކަށް ހެދުމަށް މި ދަނީ މަސައްކަތް ކުރަމުން: ރައީސް
ބޭނުންތެރި ބަޔަކަށް ހެދުމަށް ޕްރޮގްރާމްތައް މިހާރު ވެސް ހިންގަމުންދާ ކަމަށް ވިދާޅުވި
ރައީސުލްޖުމްހޫރިއްޔާ ދެ ކަނބަލުން ފެއަރ ބައްލަވާލައްވަނީ
ޖަލުގެ ބަންދުގައި މި ވަގުތު ތިބި ފަރާތްތައް، ޖަލުން މިނިވަންވެ މުޖްތަމައަށް ނިކުންނައިރު އެ މީހުންނަކީ މުޖްތަމައަށް ބޭނުންތެރި ބަޔަކަށް ހެދުމަށް މަސައްކަތް ކުރައްވަމުން އަންނަ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ޖަލުގައި ތިބި ގައިދީންގެ ހުނަރު ދައްކާލުމުގެ ގޮތުން މާފުށީ ސްކޫލްގައި ބޭއްވި "އިންމޭޓްސް ކްރިއޭޓިވިޓީ" ފެއަރ ހުޅުވައި ދެއްވުމަށްފަހު "ރާއްޖެޓީވީ"އަށް ދެއްވި ޚާއްސަ އިންޓަރވިއުއެއްގައި ރައީސުލްޖުމްހޫރިއްޔާ ވިދާޅުވީ މަސައްކަތް ކުރައްވަނީ މި ވަގުތު ޖަލުގެ ބަންދުގައި ތިބި ގައީދިން މުޖްތަމައަށް ނިކުންނައިރު، އެ މީހުންނަކީ މުޖްތަމައަށް ބޭނުންތެރި ބަޔަކަށް ހެދުމަށް ކަމަށެވެ.
ރައީސް ސޯލިހު ވިދާޅުވީ ޖަލުގައި ތިބި ގައިދީންނަކީ މުޖްތަމައަށް ނުކުންނައިރު، ބޭނުންތެރި ބަޔަކަށް ހެދުމަށް ތަފާތު ޕްރޮގްރާމްތައް މިހާރުވެސް ހިންގަމުން އަންނަ ކަމަށެވެ. އެގޮތުން ހުކުރު ދުވަހު މާފުށީ ސްކޫލް ފެށުނު "އިންމޭޓްސް ކްރިއޭޓިވިޓީ" އަކީ އެފަދަ އެއް ހަރަކާތް ކަމަށެވެ.
" މި ވަގުތު ޖަލުގައި ތިބި ފަރާތްތައް މުޖްތަމައަށް ނިކުންނައިރު އެއީ ބޭނުންތެރި ބަޔަކަށް ވާނެ ކަމަށް އުއްމީދު ކުރަން. އުއްމީދަކީވެސް މަސައްކަތަކީވެސް އެއީ. އިތުރު ޕްރޮގްރާމްތައް ޖަލުގައި ބަންދުގައި ތިބި ފަރާތްތަކައް ހިންގާ ކަމުގައި ވާނަމަ އެބުރި މުޖްތަމައަށް ނިކުންނައިރު، އޭގެ ރަނގަޅު ހެޔޮ ގޮތްތައް ޖަލުގައި ތިބި ކުދިންނަށް ވެގެންދާނެ ކަމަށް،" ރައީސް ވިދާޅުވިއެވެ.
ހުކުރުދުވަހު މާފުށީ ސްކޫލްގައި ބޭއްވި "އިންމޭޓްސް ކްރިއޭޓިވިޓީ" ފެއަރ ހުޅުވައިދެއްވީ ރައީސުލްޖުމްހޫރިއްޔާގެ ދެ ކަނބަލުންނެވެ. ފެއަރ ހުޅުވައިދެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން ވަނީ ފެއަރ ބައްލަވާލައްވާފައެވެ. އަދި މެހެމާނުން ސޮއިކުރައްވާ ފޮތުގައި ރައީސުލް ޖުމްހޫރިއްޔާ ވަނީ ސޮއިކުރައްވާފައެވެ.
އިންމޭޓްސް ކްރިއޭޓިވިޓީ ފެއަރ އަކީ، ގައިދީންގެ އަމިއްލަ މަސައްކަތުން އެމީހުންގެ ހުނަރުތައް ބޭނުންކޮށްގެން އުފައްދާ ތަކެތި އާންމުންނާއި ހަމައަށް ގެނެސްދިނުމަށް ބާއްވާ ފެއާ އެކެއެވެ.
އިންމޭޓްސް ކްރިއޭޓިވިޓީ ފެއަރ އަކީ މޯލްޑިވްސް ކަރެކްޝަނަލް ސާރވިސްގެ ފަރާތުން 2009 ވަނަ އަހަރުން ފެށިގެން ކޮންމެ އަހަރަކު ބާއްވަމުން އަންނަ ފެއަރއެކެއެވެ. މިއީ މި ފެއަރ ބޭއްވި އަށްވަނަ ފަހަރެއެވެ.
މި ފަހަރުގެ ފެއާގައި ގައިދީން ހަދާފައިވާ 1050 އައިޓަމްސް ބަހައްޓާފައި ހުރިއިރު، މި ތަކެތި ހެދުމުގައި ފަސް އޮފިސަރުންނާއި، 43 ގައިދީން ވަނީ ބައިވެރިވެފައެވެ.
