ޝައުބާން މަހަކީ ހެޔޮ އަމަލުގެ ފަތް ބަރުކުރަން ލިބޭ ރަނުގެ ފުރުސަތެއް: ޚުތުބާ
12 އެޕްރީލު 2019 | ހުކުރު 08:25ޝައުބާން މަހު ރޯދަ ހިފުމުގެ 2 ހިކުމަތެއްވޭ
ހުކުރު ޚުތުބާ
ޝައުބާން މަހަކީ އެމީހެއްގެ ހެޔޮ އަމަލުގެ ފަތް ބަރުކޮށް، ހެޔޮ އަމަލުތައް އިތުރު ކުރުމަށް ލިބޭ ރަނުގެ ފުރުސަތެއް ކަމަށް ހުކުރު ޚުތުބާގައި ބުނެފިއެވެ.
"ޝައުބާން މަހުގެ ދުވަސްތަކުގައި ހެޔޮ އަމަލު ގިނަ ކުރުން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނެފައިވަނީ ޝައުބާން މަހު ހެޔޮ އަމަލުތައް ގިނަކޮށް ރޯދަ ހިފުމުގެ ދެ ހިކުމަތެއް ވާ ކަމަށާއި، އެއީ ރަމަޟާން މަހަށް ތައްޔާރު ވުމުގެ ގޮތުން ދެވޭ ތަމްރީނެއް ކަމަށެވެ.
"ފުރަތަމަ ހިކުމަތަކީ ޝައުބާން މަސް ވަނީ ރަޖަބު މަހާއި ރަމަޟާން މަހާ ދެމެދުގައި ކަމުން މީސްތަކުން އެ މަހަކާމެދުގައި ޢާފިލުވެފައިވާތީ، އެ ޢާފިލުކަމުން މީސްތަކުން ހޭލައްވާލުން، އެހެން ކަމުން މީ ރަމަޟާން މަހަށް ތައްޔާރު ވުމުގެ ގޮތުން ދެވޭ ތަމްރީނެއް، ދެވަނަ ހިކުމަތަކީ މީސްތަކުންގެ އަމަލުތައް ﷲ ގެ ހަޟްރަތަށް އުފުލިގެންދާ މަހަކީ ޝައުބާން މަސް ކަމަށް ވެފައި ﷲ ސުބުޙާނަހޫ ވަތަޢާލާ ލޯބިވެވޮޑިގަންނަވާ އަމަލުތައް ކުރުން މަތީ އެ އިލާހުގެ އަޅުތަކުން ތިބޭ ހާލު، އެ އަޅުތަކުންގެ އަމަލުތައް ﷲ ގެ ހަޟުރަތަށް އުފުލިގެންދާނެ ގޮތް މިންވަރުކުރެއްވުން" ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނީ، ކީރިތި ރަސޫލާވެސް ޝައުބާން މަހުގެ ބޮޑު ބައެއްގައި ރޯދަ ހިއްޕެވިކަން ހަދީޡްތަކުން ސާބިތުވާ ކަމަށާއި، ޝައުބާން މަހު ރޯދަ ހިފުން ގިނަ ކުރުމަކީ ވަރަށް ބޮޑަށް އެދެވިގެންވާ ކަމެއް ކަމަށެވެ.
"ރަމަޟާން މަހަށް ތައްޔާރު ވުމުގެ ގޮތުން ޝައުބާން މަހު ރޯދަ ހިފުމަކީ ފަރުޟު ނަމާދުތަކުގެ އިސްފަހުގައި ކުރެވޭ ރަވާތިބު ސުންނަތް ފަދަ ކަމެކެވެ. އެ ރަވާތިބު ސުންނަތް ތަކުގެ ސަބަބުން ފަރުޟު ނަމާދަށް ފަށައިގަތުމުގެ ކުރިން މީހާގެ ހިތާއި ސިކުނޑި ނަމާދުގެ ތެރެއަށް ވައްދައިލެވެއެވެ. އަދި ނަމާދުގެ ތެރޭގައި ކުރެވިފައި ހުންނަ ބައެއް އުނި ކަންތައްތައް ނަމާދުގެ ފަހުން ކުރެވޭ ރަވާތިބު ސުންނަތްތަކުން ފޫބައްދައިލެވެއެވެ" ޚުތުބާގައި ބުނެފައިވެއެވެ.
އޭގެ އިތުރުން، ޝައުބާން މަހު ރޯދަ ހިފުމުގެ ސަބަބުން ރަމަޟާން މަސް އަންނަންވާއިރަށް އެމަހަށް މީހާގެ ނަފްސު ތައްޔާރު ކުރުމަށް އެހީއަކަށް ވެގެންދާ ކަމަށާއި، ނަމަވެސް ޝައުބާން މަހުގެ 15 ވިލޭރޭ ހަފްލާތައް ބާއްވައި ޖަމާއަތްތައް ހަދައިގެން ހަމައެކަނި އެރެއަށް ޚާއްސަކޮށްގެން ބައެއް މީހުން ނަމާދުކޮށް ހަދާ ކަމަށާއި، އެއީ ރަސޫލާގެ ސުންނަތުން ސާބިތުވާ ކަމެއް ނޫން ކަމަށްވެސް ޚުތުބާގައި ބުނެފައިވެއެވެ.
