އދ. ގެ ޕްރެސް ފްރީޑަމް އެވޯޑް މިޔަންމާގައި ބަންދުކޮށްފައި ތިބި ދެ ނޫސްވެރިންނަށް!

އދ. ގެ ޖަމިއްޔާއެއް ކަމުގައިވާ ޔުނެސްކޯ އިން ދޭ ނޫސްވެރިކަމުގެ މިނިވަންކަމުގެ އެވޯޑް މިޔަންމާގެ ޖަލުގައި ބަނދުކޮށްފައި ތިބި ރޮއިޓާސްގެ ދެ ނޫސްވެރިންނަށް ލިބިއްޖެއެވެ.

ރަކީން ސްޓޭޓުގައި ރޮހިންޖާ މުސްލިމުންނާ ދެކޮޅަށް މިއަންމާ ސިފައިން ހިންގާ ޖަރީމާތައް ރިޕޯޓް ކުރުމާ ގުޅިގެން ހައްޔަރުކުރުވެނު ނޫސްވެރިން ކަމުގައިވާ ވާ ލޯން އާއި ކިއޯ ސޮއެ އޫ ޖަލުގައި ބަންދުކުރީ 2017 ވަނަ އަހަރުގެ ޑިސެމްބަރު މަހުގެ ތެރޭގެއެވެ. އެ މީހުންގެ މައްޗަށް އުފަލާފައި ވަނީ ދައުލަތުގެ ސިއްރުތައް ބޭރުކުރުމުގެ ދައުވާއެވެ. ދައުވާ ސާބިތުވުމާ ގުޅިިގެން އެ ދެ މީހުންނަށް ވަނީ ހަތް އަހަރުގެ ޖަލު ހުކުމެއް އިއްވާފައެވެ. ދެ މީހުންގެ ފަރާތުން ވެސް ވަނީ އެ ގައުމުގެ ސުޕްރީމް ކޯޓުގައި ހުކުމް އިސްތިއުނާފް ކޮށްފައެވެ.

އިންސާނީ ހައްގުތަކަށް މަސައްކަތް ކުރާ ޖަމިއްޔާތަކުން އެ މީހުންގެ ބަންދާ ދެކޮޅަށް އަޑު އުފުލާފައިވާ އިރު, އެ މީހުން ބަނދުކޮށްފައި ވަނީ މިޔަންމާގެ ސަރުކާރުން ހިންގާ ޖަރީމާތައް ފޮރުވުމުގެ ގޮތުން ކަމަށް ވެސް އެ ފަރާތްތަކުން ވަނީ ތުހުމަތުކޮށްފައެވެ.

ރޮއިޓާސް އަށް މަސައްކަތް ކުރާ މިޔަންމާގެ ދެ ނޫސްވެރިން ކަމަށްވާ ވަ ލޯން، 32، އާއި ކިޔޯ ސޮއެ އޫ، 27، ހައްޔަރު ކުރީ ރަކީންގެ އުތުރުން އޮންނަ ޑިން އަވަށުގައި 10 މީހުން ސެޕްޓެމްބަރު 2، 2017 ގައި މަރާލި މައްސަލައިގެ ހެކިތައް ހޯދުމުގައި އުޅެނިކޮށެވެ. އެ ދެ މީހުން ހައްޔަރުކޮށްފައިވަނީ ހެކި ހޯދުމުގެ ގޮތުން ފުލުހުންގެ ދެ މީހަކާ ބައްދަލުކޮށް ލިޔުންތައް ހިފައިގެން ނިކުމެގެން ދިޔަ ވަގުތުގައެވެ.