އިންތިޚާބު ކާމިޔާބުކުރައްވައި ނަތަންޔާހޫ ފަސްވަނަ ދައުރަކަށް

އިސްރާއީލުގެ ވާދަވެރި އާއްމު އިންތިޚާބުގެ މިހާތަނަށް ގުނިފައިވާ ވޯޓުގެ ނަތީޖާ ދައްކާގޮތުން މިހާރުގެ ބޮޑުވަޒީރު ބެންޖަމިން ނަތަންޔާހޫގެ ލިކޫދު ކޯއެލިޝަނަށް އިންތިޚާބު ކާމިޔާބު ކުރެވިފައިވާ ކަމަށް ދައްކައިިފއެވެ.

އިސްރާއީލުގެ ގާނޫނުހަދާ މަޖިލީސް، ނެސެޓްގައި 120 މެމްބަރުން ތަމްސީލް ކުރައްވާއިރު މިހާރުގެ ނަތީޖާއަށް ބަލާއިރު ނަތަންޔާހޫގެ ކޯލިޝަނަށް 63 ގޮނޑިއާ 65 ގޮނޑިއާ ދެމެދުގެ މިންވަރެއް ލިބޭނެ ކަމަށް ނެލެވެއެވެ.

އެ ކޯއެލިޝަނާ ވާދަވެރި ބެނީ ގެންޒްގެ ކޯލިޝަނަށް ލިބޭނެ ކަމަށް ބެލެވެނީ 55 އާއި 57 ގޮނޑިއާ ދެެމެދުގެ އަދަދެކެވެ.

ނަތަންޔާހޫގެ ލިކޫދް އަދި ގެންޒްގެ ކަހޯލް ވެ ލަވާންއަށް، ކޮންމެ ޕާޓީއަކަށް ލިބިފައިވަނީ 35 ގޮނޑިއެވެ. ނަމަވެސް ކަނާތު ފިޔައިގެ ކުދި ޕާޓީތަކުން ވަނީ ލިކޫދްއާއެކު ކޮއެލިޝަން ހަދާފައެވެ.

ވޯޓު ގުނުމުގެ ކަންކަން އަދިވެސް ކުރިއަށް ދާއިރު މައި ދެ ޕާޓީން ވެސް ވަނީ އިންތިޚާބު ކާމިޔާބު ވެއްޖެ ކަމަށް އަންގާރަ ދުވަހު ބުނެފައެވެ.

"އަހަރެމެންނަށް ކާމިޔާބުވެއްޖެ!އިސްރާއީލުގެ އާއްމުން އެމީހުންގެ ބަސް ބުނެފި" ބެނީ ގެންޒް ޓްވީޓެއްގައި ބުނެފައިވެއެވެ.

ލިކޫދް ޕާޓީގެ ނަތަންޔާހޫ ވިދާޅުވެފައިވަނީ"މިއީ ބޮޑު ކާމިޔާބީގެ ރޭ " ކަމަށެވެ.