ސިނަމާލޭ ބްރިޖު މަތިން ދަތުރު ކުރަމުން ދިޔަ ކާރެއް ހުއްޓުވައި ތިން ކޭސް ބަނގުރާ ފުލުހުން އަތުލައިގަނެފިއެވެ.
ފުލުހުން މި ކާރު ހުއްޓުވާފައި ވަނީ ސިނަމާލެ ބްރިޖުން މާލެއަށް ފައިބާ ސަރަހައްދުގައި ހުންނަ ޓްރެފިކް ލައިޓް ކައިރިންނެވެ. ރާއްޖެއެމްވީއިން އެ ވަގުތު އެ ސަރަހައްދަށް ގޮސް ބެލިބެލުމުގައި ފުލުހުން ވަނީ އެ ކާރު ތެރެއިން ފޮށިތަކެއް ނަގައިގެން ގޮސް ފުލުހުންގެ ވެހިކަލަށް އަރުވާފައެވެ. ކާރުން އަތުލައިގަނެފައި ވަނީ ބަނގުރާ ކަމަށް ޝައްކު ކުރެވޭ ފުޅިތަކެއް ހުރިި ތިން ކޭސް ކަމަށް މައުލޫމާތު ދީފައިވަނީ އެ ވަގުތު އެ ސަރަހައްދުގައި ހަރަކާތްތެރި ވަމުން ދިޔަ ފުލުހުންނެވެ.
ކުލަ ހެދުމުގައި ތިބި ގިނަ އަދަދެއްގެ ފުލުހުން އެ ގަޑީގައި އެ ސަރަހައްދުގައި ހަރަކާތްތެރި ވަމުން ދިޔަ އިރު، ކާރުގެ ތެރޭގައި ތިބީ ކިތައް މީހުންކަން ކަށަވަރުވާ ގޮތް ވަނީ ނުވެފައެވެ. ހުއްޓުވި ކާރަކީ ބީއެމްޑަބްލިޔު މަރުކާގެ "ޒެޑްފޯ" ސްޕޯޓްސް ކާރެކެވެ. މި ކާރުގައި ގިނަވެގެން ތިބެވޭނީ ދެ މީހުންނަށެވެ. ރާއްޖެއެމްވީއިން އެ ސަރަހައްދަށް ދިޔައިރު ކާރުގައި ހުރީ ކާރުގެ ޑްރައިވަރު އެކަންޏެވެ. މައުލޫމާތު ލިބިފައިވާ ގޮތުގައި ކާރު ދުއްވަން ހުރީ ކާރުގެ ވެރިފަރާތެއް ނޫނެވެ.
