އއ. މަތިވެރީގައި ހުރި "ކަސާ މިއާ މޯލްޑިވްސް" ގެސްޓްހައުސްގައި އަލިފާން ރޯވެ ވަރަށް ބޮޑަށް އަނދައިފިއެވެ.
އެ ރަށުން ރާއްޖެއެމްވީއަށް މައުލޫމާތު ދިން މީހަކު ބުނީ އެ ގެސްޓް ހައުސްއަކީ ކުރިން އޮޕަރޭޝަން ހިންގަމުންދިޔަ ގެސްޓް ހައުސެއް ނަމަވެސް މިހާރު އެތަން މަރާމާތަށް ބަންދުކޮށްފައިވާ ކަމަށެވެ. އަދި މަރާމާތަށް ބަންދުކުރިއިރު މުވައްޒަފުން މަސައްކަތް ކުރަމުންދިޔަ ކަމަށާއި އަލިފާނުގެ ހާދިސާގައި އެއްވެސް މީހަކަށް ގެއްލުން ލިބިފައިނުވާ ކަމަށް ވެސް އެ މީހާ ބުންޏެވެ. މިއީ ހޮނިހުރު ދުވަހު ނިމުނު ރައްޔިތުންގެ މަޖިލީހުގެ އިންތިހާބުގައި ކާށިދޫ ދާއިރާގެ ގޮނޑި ކާމިޔާބުކުރެއްވި އަބްދުﷲ ޖާބިރުގެ ކުންފުނީގެ ތަނެކެވެ.
ފޮޓޯތަކަން ފެންނަ ގޮތުގައި މި ގެސްޓް ހައުސްގައި ހިފާފައިވާ ހުޅުގަނޑު ވަރަށް ބޮޑެވެ. މިއީ 35 ކޮޓަރީގެ ތަނެކެެވެ.
އެމްއެންޑީއެފްގެ މީޑިއާ އޮފިޝަލް ވިދާޅުވީ މި ހާދިސާގެ މައުލޫމާތު ލިބިފައި ވަނީ އާދިއްތަ ދުވަހުގެ ރޭ 22:25 ހާއިރު ކަމަށާއި އެމްއެންޑީއެފް އިން ހަރަކާތްތެރިވަމުންދާ ކަމަށެވެ. އަދި އަލިފާން ނިއްވުމަށް އެ ރަށުގައި ތަމްރީނުކޮށްފައިވާ ސިވިލް ސާވިސްގެ ފަޔާ ޓީމާ އެ ރަށު ރައްޔިތުންނާ ގުޅިގެން އަލިފާންގަނޑު މިހާރު ނިއްވާލެވިފައިވާ ކަމަށެވެ.
