އަދާލަތަށް އެއް ގޮނޑިވެސް ކާމިޔާބު ނުކުރެވި، އަނާރާޔަށް ވެސް ނާކާމިޔާބީއާއި ކުރިމަތިލާން ޖެހިއްޖެ
އަދާލަތު ޕާޓީން 9 ދާއިރާއަކަށް ވާދަކުރި
މަކުނުދޫ ދާއިރާގެ މެންބަރު އަނާރާ ނައީމް
ހޮނިހިރު ދުވަހު ބޭއްވި ރައްޔިތުންގެ މަޖިލީހުގެ އިންތިޚާބުން، އަދާލަތަށް އެއްގޮނޑިވެސް ކާމިޔާބު ނުކުރެވި މިހާރު ވެސް އަދާލަތު ޕާޓީން މަކުނުދޫ ދާއިރާ ތަމްސީލު ކުރައްވާ މެމްބަރު އަނާރާ ނައީމަށް ވެސް ނާކާމިޔާބީއާއި ކުރިމަތިލާން ޖެހިއްޖެއެވެ.
ކުރިއަށް އޮތް 19 ވަނަ ރައްޔިތުންގެ މަޖިލީހުގެ އިންތިޚާބުގައި އަދާލަތު ޕާޓީން ނުވަ ދާއިރާއަކަށް ވާދަކުރި ނަމަވެސް، މިހާރު ލިބިފައިވާ ނަތީޖާތަކަށް ބަލާއިރު އެ ޕާޓީ އަށް ކާމިޔާބީއެއް ހޯދިފައެއް ނުވެ އެވެ.
އެގޮތުން 18 ވަނަ ރައްޔިތުންގެ މަޖިލީހުގައި އަދާލަތު ޕާޓީ ތަމްސީލް ކުރައްވާ ހަމަ އެކަނި ކެނޑިޑޭޓް އަނާރާ ނައީމު ވެސް މިވަނީ މިދިޔަ ހޮނިހިރު ދުވަހު ނެގި ވޯޓުން ނާކާމިޔާބާއި ކުރިމަތި ލާންޖެހިފައެވެ
އަނާރާގެ މައްޗަށް ކުރި ހޯއްދެވީ، އެމްޑީޕީން އެ ދާއިރާއަށް ވާދަކުރެއްވި ކެންޑިޑޭޓު މުހައްމަދު ރާއީ އެވެ. ތިން ކެންޑިޑޭޓުން ވާދަކުރެއްވި އެ ދާއިރާއިން އެންމެ މަދުން ވޯޓު ލިބިވަޑައިގެންނެވީ ވެސް އަނާރާ އަށެވެ.
ހޯމް މިނިސްޓަރު އިމްރާން އަބްދުﷲގެ އިތުރުން ސަރުކާރުގައި އެ ޕާޓީ ތަމްސީލު ކުރާ އެހެން މިނިސްޓަރުން ވެސް އެ ދާއިރާގެ ރަށްރަށަށް ވަޑައިގެން އަނާރާ އަށް ކެމްޕޭން ކޮށްދެއްވި އެވެ.
އަދާލަތު ޕާޓީން ވާދަކުރި ކެލާ ދާއިރާ، ވައިކަރަދޫ ދާއިރާ، އިނގުރައިދޫ ދާއިރާ، ގައްދޫ ދާއިރާ، ކާށިދޫ ދާއިރާގެ އިތުރުން މުލަކު ދާއިރާގެ ގޮނޑި ކަމިޔާބު ކުރައްވާފައިވަނީ އެމްޑީޕީ އެވެ.
މީގެ އިތުރުން އެމްޑީޕީން ތާއީދު ކުރި، އަދާލަތު ޕާޓީން ކުރިމަތި ލާފައިވާ މަހިބަދޫ ދާއިރާ އާއި ނިލަންދޫ ދާއިރާގެ ކެންޑިޑޭޓުންނަށް ވެސް އިންތިހާބުގައި ވަނީ ނާކާމިޔާބާއި ކުރިމަތި ލާންޖެހިފައެވެ
ޢަދާލަތު ޕާޓީއަކީ ރައީސް ޔާމީންގެ ސަރުކާރުގެ އަނިޔާވެރިކަމާއި ޚިޔާނާތާއި ވައްކަމާއި ދެކޮޅަށް އެމްޑީޕީ އާއި އެކީގައި ފެށި މަސައްކަތުގައި މިހާތަނަށް ވެސް އެކުގައި ސިޔާސީ މަސައްކަތް ކުރަމުން އަންނަ ޕާޓީއެއް ކަމަށް އެމްޑީޕީން ކުރިން ނެރެފައިވާ ނޫސް ބަޔާނުގައި ވަނީ ބުނެފައެވެ.
