ކުރިއަށް އޮތް 19 ވަނަ ރައްޔިތުންގެ މަޖިލިސް އިންތިޚާބު ވޯޓުލުމުގެ ވަގުތު އިލެކްޝަންސް ކޮމިޝަނުން އިތުރުކޮށްފިއެވެ. 

އިލެކްޝަންސް ކޮމިޝަންގެ މެންބަރު އިސްމާއިލް ހަބީބު ވިދާޅުވީ މި ދުވަސްވަރު މޫސުން ހުރި ގޮތުން ހޫނު ގަދަވުމުގެ ސަބަބުން ވޯޓުލުމަށް އަންނަ މީހުންގެ މަދުވެދާނެތީ މިއަދު 18:00 އަށް ހަމައަށް ވޯޓުލުން ކުރިއަށް ގެންދާ ގޮތަށް ކޮމިޝަނުން ނިންމާފައިވާ ކަމަށެވެ. 

މީގެ ކުރިން އިންތިޚާބުގެ ވޯޓް ފޮށިތައް ބަންދުކުރުމަށް ނިންމާފައި އޮތީ ހަވީރު 16:00 އަށެވެ. އިންތިހާބުގެ ވޯޓުލުން ފަށާފައި ވަނީ ހޮނިހިރު ދުވަހު ހެނދުނު 08:00 ގައެވެ. މި ބަދަލާ އެކު އީސީން ވަނީ ބޭރު ގައުމުތަކުގެ ވޯޓުލުން ވެސް ދެ ގަޑިއިރު އިތުރުކޮށްފައެވެ.

މި ފަހަރުގެ އިންތިޚާބުގައި 264442 މީހުންނަށް ވޯޓު ލުމުގެ ހައްގު ލިބިފައިވާ ކަމަށް އިލެކްޝަންސް ކޮމިޝަނުން މައުލޫމާތު ދެއެވެ. ރިޔާސީ އިންތިހާބާ ހިލާފަށް މެންދުރާ ހަމައަށް ދިޔައިރު ވޯޓުލާން ނުކުންނަ މީހުންގެ އަދަދު ވަރަށް ބޮޑަށް މަދުކަން ފާހަގަކޮށްލެވެއެވެ. ނަމަވެސް މެންދުރުފަހުން ވޯޓުލުމަށް ކިޔުގައި ޖެހޭ މީހުންގެ އަދަދު ވަނީ އިތުރުވެގެން ގޮސްފައެވެ.