ރައްޔިތުން މަޖިލިސް އިންތިޚާބު ކުރިއަށްދާ ވަގުތު ދިމާވާ މައްސަލަތައް އިންތިޚާބާ ބެހޭ ޤާނޫނުތަކާއި ޤަވާއިދުތަކާ އެއްގޮތަށް ހައްލުކޮށް، ރައްޔިތުންނާ ގާތުން މަސައްކަތް ކުރުމަށް ކޮމިޝަނަރ އޮފް ޕޮލިސް މުޙައްމަދު ހަމީދު އެދިވަޑައިގެންފިއެވެ.
ކޮމިޝަނަރ ހަމީދު މިހެން އެދިވަޑައިގެންނެވީ ހޮނިހިރު ދުވަހު ބާއްވާ ރައްޔިތުން މަޖިލިސް އިންތިޚާބުގެ ސަލާމަތީ ކަންކަން ބެލެހެއްޓުމަށް ފުލުހުން ކުރިއަށް ގެންދާ އޮޕަރޭޝަން" ބްލޫ ޓައިޑް"ގެ ބްރީފިންގ ވާހަކަ ދައްކަވަމުންނެވެ.
ހަމީދު ވިދާޅުވީ މާދަމާ އަކީ ރައްޔިތުންގެ މަޖިލިސް އިންތިޚާބު އަމާން އޮމާންކަމާއެކު ނިންމާލުމަށްޓަކައި ފުލުހުންނާއި އިލެކްޝަންސް ގުޅިގެން މީގެ ދެތިން މަސްކުރިން ކުރަމުންއައި މަސައްކަތްތައް ނިންމާލުމަށް ނުކުންނަ ދުވަސްކަމަށެވެ.
ހަމީދު ވިދާޅުވީ ހޮނިހިރުއަކީ ދަޢުލަތަށާއި ދިވެހި އެންމެހާ ރައްޔިތުންނަށް ފުލުހުންގެ ޕްރޮފެޝަނަލިޒަމްއާއި ފުލުހުންގެ މަސައްކަތުގެ ނަމޫނާ ދައްކުވައިދޭން ލިބިގެންދާ ވަރަށް ރަނގަޅު ފުރުސަތެއް ކަމަށާއި، މިފުރުސަތުގެ ބޭނުން ކޮންމެ ފުލުހަކުވެސް ހިފައި، ފުލުހުންގެ ޕްރޮފެޝަނަލިޒަމްއާއި މަސައްކަތުގެ ނަމޫނާ ދައްކަވައި ދޭނެކަމަށް އުއްމީދުކުރައްވާ ކަމަށް ވިދާޅުވިއެވެ.
މީގެ އިތުރުން ރައްޔިތުންނާ ބައްދަލުވާ ކޮންމެ ފަހަރަކީ ރަނގަޅު، އެކުވެރިކޮށް ބައްދަލުވާ ބައްދަލުވުމަކަށް ހަދައި، އިންތިޚާބާބެހޭ ގާނޫނޫތަކާއި ގަވާއިދުތަކާއި ފުށުއަރާފަދަ ކަމެއް ބައެއް ފަރާތުން ނުވަތަ މީހެއްގެ ކިބައިން ފެންނަ ހިނދުވެސް، އިލެކްޝަން ކޮމިޝަނުން ކަނޑައަޅާފައިވާ އުސޫލުތަކުގެ މަތިންނާއި ފުލުހުންނަށް ދީފައިވާ ބްރީފިންގގައިވާ ގޮތުގެ މަތިން އެކަމެއް ހައްލުކުރުމަށް މަސައްކަތްކޮށްދެއްވުމަށް ހަމީދު އެދިވަޑައިގެންނެވިއެވެ.
މީގެކުރިން ބޭއްވި އެކަތެއް އިންތިޚާބުތަކުގައި ވެސް ފުލުހުން އިންތިޚާބުތަކުގެ ސަލާމަތީ ކަންކަން ބެލެހެއްޓުމުގައި ނަމޫނާ ދައްކާފައިކަން ފާހަގަކުރައްވައި، ހަމީދު ވިދާޅުވީ ފާއިތުވެދިޔަ އިންތިޚާބުތަކުގައި ލިބިފައިވާ ފިލާވަޅުތަކުން އިބުރަތް ލިބިގަނެ، ކޮންމެ ފުލުހަކާ ހަވާލުކުރެވިފައިވާ ޒިންމާތަކާއި މަސްއޫލިއްޔަތު ރަނގަޅަށް އެނގިގެން މަސައްކަތް ކުރުމަށް އެދޭ ކަމަށެވެ.
މި އިންތިޚާބަކީ އަމާން، ރައްކާތެރި އިންތިޚާބަކަށް ހެދުމަށް ފުލުހުން ހިންގާ އޮޕަރޭޝަން ކާމިޔާބުކަމާއެކު ނިންމާލުމަށް ހުރިހާ ފުލުހުންވެސް ގުޅިގެން މަސައްކަތްކުރެއްވުމަށް ވެސް ހަމީދު ވަނީ އެދިވަޑައިގެންފައެވެ.
މި ބްރީފިންގގައި އޮޕަރޭޝަން ބްލޫ ޓައިޑްގެ ކޮމާންޑަރު ޗީފް ސްޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް ވިދާޅުވީ އިންތިޚާބުގެ ސަލާމަތީ ކަންކަން ބެލެހެއްޓުމުގެ ގޮތުން ގިނަ މަސައްކަތްތަކެއް ކުރެވިފައިވާކަމަށެވެ.
އެގޮތުން އޮޕަރޭޝަނުގައި ހަރަކާތްތެރިވާ ފުލުހުންނަށް ތަމްރީނުތައްދީ، އިންތިޚާބުގައި ވޯޓު ފޮށި ބަހައްޓާ ތަންތަނުގައި ހަރަކާތްތެރިވާ ފުލުހުން އެތަންތަނަށް ގޮސް ނިމިފައިވާކަމަށެވެ. އަދި އިންތިޚާބުގެ ސަލާމަތީ ކަންކަން ބެލެހެއްޓުމަށް ފުލުހުން ކުރިއަށް ގެންދާ އޮޕަރޭޝަނަށް ތައްޔާރުވުމަށް ކުރަމުންއައި ހުރިހާ މަސައްކަތްތައް މިހާރު ނިމިފައިވާކަމަށް ވިދާޅުވިއެވެ.
މި ބްރީފިންގގައި ޑެޕިއުޓީ ކޮމިޝަނަރ އޮފް ޕޮލިސް ޢަބްދުލް މަންނާނު ޔޫސުފް އާއި ފުލުހުންގެ އެކްޒެކެޓިވް އޮފިސަރުންނާއި ކޮމިޝަންޑް އޮފިސަރުންނާއި ގިނަ ޢަދަދެއްގެ ފުލުހުން ބައިވެރިވެފައިވެއެވެ.
