އޭޕްރީލް މަހުގެ 6 ވަނަ ދުވަހު ބޭއްވުމަށް ހަމަޖެހިފައިވާ 19 ވަނަ ރައްޔިތުންގެ މަޖިލީހުގެ އިންތިހާބުގެ ކެމްޕެއިން ނިންމުމަށް އެމްޑިޕީން ހިނގާލުމެއް ބާއްވައިފިއެވެ.

ހުކުރު ދުވަހުގެ ހަވީރު 4 ގައި އެމްޑިޕީ ހަރުގެ ސަރަހައްދުން ފެއްޓި ހިނގާލުމުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި އެމްޑީޕީގެ ރައީސް އަދި ކުރީގެ ރައިސް މުހައްމަދު ނަޝީދުގެ އިތުރުން 19 ވަނަ ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓްގައި އެކި ދާއިރާތަކަށް ވާދަކުރައްވާ ކެންޑިޑޭޓުންނާއި ޕާޓީގެ ސިޔާސަތުތަކަށް ތާއީދުކުރާ ގިނަ އަދަދެއްގެ މެމްބަރުން ވަނީ ބައިވެރިވެފައެވެ. މި ހިނގާލުމުގައި ބައިވެރިވި ހުރިހާ ފަރާތްތަކުން ވަނީ އެޖެންޑާ 19 ހިޔާރު ކުރުމަށް އަޑުއުފުލައިފައެވެ. 

ކެމްޕެއިންގެ އެންމެ ފަހުގެ ހަރަކާތެއްގެ ގޮތުގައި އެމްޑީޕީން ހިނގާލުމެއް ބާއްވައިފައިވާއިރު ހުކުރު ދުވަހު ހަވީރު 18:00 އިން ފެށިގެން އާދިއްތަ ދުވަހުގެ ހެނދުނު 6:00 އާ ދެމެދު މަޖިލިސް އިންތިހާބުގެ ކެމްޕެއިންއާ ގުޅޭ އެއްވެސް ހަރަކާތެއް ހިންގުމަކީ މަނާ ކަމެއް ކަމަށާއި އިންތިޚާބު ގައި ވާދަކުރައްވާ އެއްވެސް ކެންޑިޑޭޓަކަށް ތާއީދު ލިބޭ ފަދަ، ނުވަތަ ތާއީދު ކުޑަވާފަދަ، ނުވަތަ އިންތިޚާބަށް ނުފޫޒެއް ފޯރާފާނެ އެއްވެސް ޢަމަލެއް އެ މުއްދަތުގެ ތެރޭގައި އެއްވެސް ފަރާތަކުން ނުހިންގުމަށް އެ ކޮމިޝަނުން ވަނީ އިލްތިމާސް ކޮށްފައެވެ.

ރައްޔިތުންގެ މަޖިލީހުގެ އިންތިހާބުގެ ވޯޓުލުން ކުރިޔަށްދާނީ، ހޮނިހިރު ދުވަހުގެ ހެނދުނު 08:00 އިން ހަވީރު 4:00 އަށެވެ. އިންޑިއާ އަދި ސްރީލަންކާގައި ވޯޓްލުން ކުރިއަށްދާނީ އެ ގައުމުގެ ގަޑިން ހެނދުނު 08:30 އިން ހަވީރު 4:30 އަށެވެ. މެލޭޝިޔާގައި ވޯޓުލުން ކުރިއަށްދާނީ އެ ގައުމުގެ ގަޑިން 11:00 އިން ރޭގަނޑު 7:00އަށް އަދި އިނގިރޭސީވިލާތުގައި ވޯޓްލުން ކުރިއަށް ދާނީ ހެނދުނު 9:30 އިން ރޭގަނޑު ހަވީރު 5:30 އަށެވެ.