އިންޓަރ ސްކޫލް ހޭންޑްބޯލް: 12 އަހަރުން ދަށުގެ ސެމީ ފައިނަލަށް ދަތުރުކުރި ސްކޫލްތައް ކަށަވަރުވެއްޖެ

އިންޓަރ ސްކޫލް ހޭންޑްބޯލް މުބާރާތުގެ 12 އަހަރުން ދަށުގެ ފިރިހެން އަދި އަންހެން ބައިގެ ސެމީ ފައިނަލް ކުޅޭނެ ޓީމްތައް ކަށަވަރު ވެއްޖެއެވެ.

ފަސްވަނަ އިންޓަރ ސްކޫލް ހޭންޑްބޯލް މުބާރާތުގެ 12 އަހަރުން ދަށުގެ ފިރިހެން ބައިން ސެމީ ފައިނަލުން ޖާގަ ހޯދާފައިވާ ވަނީ ޣިޔާސުއްދިން އިންޓަރނޭޝަނަލް ސްކޫލް، އިސްކަންދަރު ސްކޫލް، ރެހެންދި ސްކޫލް އަދި ޖަމާލުއްދިން ސްކޫލްއެވެ.

އަންހެންބައިގެ ސެމީ ފައިނަލުން ޖާގަ ކަށަވަރުކުރި ޓީމް ތަކަކީ ކަލާފާން ސްކޫލް، ގާޒީ ސްކޫލް، ޖަމާލުއްދިން ސްކޫލްގެ އިތުރުން އިސްކަންދަރު ސްކޫލްއެވެ.

މުބާރާތުގެ ފިރިހެން ބައިގެ ސެމީ ފައިނަލުގެ ފުރަތަމަ މެޗުގައި ހޯމަ ދުވަހު ޣިޔާސުއްދިން އިންޓަނޭޝަނަލް ސްކޫލް އިސްކަންދަރު ސްކޫލްއާއި ވާދަ ކުރާއިރު ސެމީ ފައިނަލުގެ ދެވަނަ މެޗުގައި ވާދަކުރާނީ ރެހެންދި ސްކޫލާއި ޖަމާލުއްދިން ސްކޫލްއެވެ. އަންހެން ބައިގެ ސެމީ ފައިނަލުގެ ފުރަތަަމަ މެޗުގައި ކަލާފާން ސްކޫލް ނުކުންނާނީ ގާޒީ ސްކޫލާއި ދެކޮޅަށެެވެ. ސެމީ ފައިނަލުގެ ދެ ވަނަ މެޗުގައި ޖަމާލުއްދީން ސްކޫލް ވާދަކުރާނީ އިސްކަންދަރު ސްކޫލާއެެވެ.

މި މުބާރާތުގައި އަތޮޅު ތެރޭގެ ހަތް ސްކޫލްއާއެކު ޖުމްލަ 19 ސްކޫލުން 78 ޓީމް ބައިވެރިވެފައިވެއެވެ.

ހޭންޑްބޯލް އެސޯސިއޭޝަނުން މައުލޫމާތު ދޭ ގޮތުގައި މި އަހަރުގެ މުބާރާތުގައި އެކި އުމުރުފުރާތަކުން 19 ސްކޫލަކުން 1،000 ވުރެ ގިނަ ކުޅުންތެރިން ބައިވެރިވިއެވެ.

ހޭންޑްބޯލް އެސޯސިއޭޝަންއިން އިންތިޒާމު ކޮށްގެން ކުރިއަށް ގެންދާ މި މުބާރާތުގައި 12 އަހަރުން ދަށުގެ އުމުރުފުރާއާއި، 14 އަހަރުން ދަށުގެ އުުރުފުރާގެ އިތުރުން 16 އަހަރުން ދަށުގެ އުމުރުފުރާ ހިމެނެއެވެ.

ހޯމަ ދުވަހު މުބާރާތް ފެށުނުއިރު އޭޕްރިލް 11 އާއި ހަމައަށް ކުރިއަށް ދާނީ 12 އަހަރުން ދަށުގެ އުމުރުފުރާގެ މެޗުތަކެވެ. 14 އަހަރުންދަށް އަދި 16 އަހަރުން ދަށުގެ އުމުރުފުރާގެ މެޗުތައް ފެށުމަށް ހަމަޖެހިފައިވަނީ 11 އޭޕްރިލްގައެވެ.

މުބާރާތުގައި ޖުމްލަ 144 މެޗު ކުޅުމަށް ޝެޑިއުލް ކުރެވިފައިވާއިރު، މުބާރާތުގެ މެޗުތައް ކުރިއަށް ދާނީ ނެޝަނަލް ހޭންޑްބޯލް ގްރައުންޑްގައެވެ.