ލޭބަރ ޕާޓީން 10 ކެނޑިޑޭޓަކު އެންޑޯސް ކޮށްފި
ލޭބަރ ޕާޓީގެ ޓިކެޓުގައި 10 ކެނޑިޑޭޓަކު އިންތިޚާބުގައި ވާދަކުރޭ
ލޭބަރ ޕާޓީން އެންޑޯސް ކުރި ކެނޑިޑޭޓުން
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި އެކި ޕާޓީތަކާއި، އަމިއްލަގޮތުން ވާދަކުރާ 10 ކެނޑިޑޭޓަކު އެންޑޯޒް ކުރުމަށް މޯލްޑިވްސް ލޭބަރ އެންޑް ސޯޝަލް ޑިމޮކްރެޓިކް ޕާޓީއިން ނިންމައިފިއެވެ.
ލޭބަރ ޕާޓީން ނެރުނު ނޫސްބަޔާނެއްގައި ބުނީ، ރައްޔިތުންގެ މަޖިޅީހުގެ އިންތިޚާބުގައި އެކި ޕާޓީތަކާއި އަމިއްލަގޮތުން ވާދަކުރާ ފަރާތްތަކުގެ ތެރެއިން އެ ޕާޓީގެ އެންޑޯސްމަންޓަކަށް އެދިފައިވާ ފަރާތްތަކާއިއެކު މަޝްވަރާތަކެއް ކުރިއަށް ގެންގޮސްފައިވާ ކަމަށެވެ. އަދި އެ މަޝްވަރާތަކަށް ފަހު، 10 ކެނޑިޑޭޓަކު އެންޑޯސް ކުރުމަށް އެ ޕާޓީން ނިންމާފައިވާ ކަމަށް އެ ބަޔާނުގައި ވެއެވެ.
އެ 10 ކެނޑިޑޭޓުންނަކީ،
އަޙުމަދު ސަލީމް (ހޯރަފުށީ ދާއިރާ / އެމްޑީޕީ)
މުޙައްމަދު ނާޘިމް (ކެލާ ދާއިރާ / އަމިއްލަ ގޮތުން)
ޢަލީ ޙުސައިން (ކެންދޫ ދާއިރާ / ޖުމްހޫރީ ޕާޓީ)
މުޙައްމަދު ކާރިމް (ނައިފަރު ދާއިރާ / އެމްޑީޕީ)
ޙުސައިން ޙުސްނީ (ދަނގެތީ ދާއިރާ / އަމިއްލަ ގޮތުން)
ޢާއިޝަތު ރިޔާސާ (މުލަކު ދާއިރާ / ޢަދާލަތު ޕާޓީ)
ޢަބްދުﷲ މުޙައްމަދު (މަޑަވެލި ދާއިރާ / އަމިއްލަ ގޮތުން)
ޙަސަން ޚާލިދު (ފުވައްމުލަކު މެދު ދާއިރާ / ޕީއެންސީ)
ޢަބްދުއްރަޙްމާން (އައްޑޫ މީދޫ ދާއިރާ / އަމިއްލަ ގޮތުން)
އިސްމާއިލް މާޖިދު (މާފަންނު ހުޅަނގު ދާއިރާ / އަމިއްލަ ގޮތުން)
ލޭބަރ ޕާޓީން ބުނީ އެ ޕާޓީގެ އެންމެ މުހިއްމު ބިންގަލަކީ މަސައްކަތްތެރިންގެ ޙައްޤުތައް ރައްކާތެރިކޮށް ކަށަވަރުކުރުމާއި، އިޖްތިމާޢީ އަދާލަތު ޤާއިމްކޮށްދިނުން ކަމުގައި ވާހިނދު، އެ ޕާޓީން އެންޑޯސްކޮށްފައިވާ ކެނޑިޑޭޓުންނަކީ މަސައްކަތްތެރިންގެ ޙައްޤުތައް ހިމާޔަތްކުރުމުގައި ދެމިތިބޭނެ ފަރާތްތަކެއް ކަމާއިމެދު އެ ޕާޓީން ޝައްކު ނުކުރާ ކަމަށެވެ.
ލޭބަރ ޕާޓީއިން އެހެން ޕާޓީތަކާއި އަމިއްލަ ގޮތުން ވާދަކުރާ 10 ކެނޑިޑޭޓަކު އެންޑޯސް ކުރިއިރު، އެ ޕާޓީގެ ޓިކެޓުގައި 10 ކެނޑިޑޭޓަކު އިންތިޚާބުގައި ވާދަކުރެއެވެ.
