ޔާމީ ގޯތަމްގެ ނުބައި ރޯލެއް ބަލަން ރިތިކް ހުރީ ކެތްމަދުވެފައި

ރިތިކް ރޯޝަން އާއި އެކު "ކާބިލް" އިން ފެނިގެންދިޔަ ޔާމީ ގޯތަމްގެ "ސަރްކާރު3" ގައި ފެނިގެން ދާނީ ތަފާތު ރޯލަކުން ކަމަށް ވާތީ އެ ފިލްމު ބަލަން ކެތްމަދުވެފައި ހުރި ކަމަށް ރިތިކް ބުނެފި އެވެ.

ރިތިކް ކޮށްފައިވާ ޓްވީޓެއްގައި ބުނެފައި ވަނީ ތަފާތު ޔާމީއެއް ދެކިލަން ކެތް މަދުވެފައި ހުރި ކަމަށެވެ. ރިތިކްގެ ޓްވީޓަށް ޔާމީ ކޮށްފައިވާ ރިޕްލައިގައި ވަނީ ރިތިކް އަށް އެފިލްމު ދައްކާހިތުން ކެތްމަދުވެފައި ހުރި ކަމަށެވެ.

މީގެ ކުރިން ޔާމީ ކުޅެފައިވާ އެހެން ފިލްމު ތަކުން މަޑުމަތިރި އަނެހެން ކުއްޖެއްގެ ރޯލުން ފެނިގެން ދިޔަ ނަމަވެސް "ސަރްކާރު3" އިން އޭނާ ފެނިގެން ދާނީ ނެގެޓިވް ރޯލަކުން ކަމަށް ޚަބަރުތައް ބުނެއެވެ.

ފިލްމު "ކާބިލް"ގައި ރިތިކް އާއި ޔާމީ ކުޅެފައިވާ ލޯ އަނދިރި ދެ މީހުންގެ ރޯލް ވަނީ ބެލުންތެރިންނަށް ވަރަށް ކަމުގޮސްފައެވެ.

އަންނަ އެޕްރީލް މަހުގެ 7 ގައި ރިލީޒް ކުރުމަށްހަމަޖެހިފައިވާ "ސަރްކާރު3" އަކީ ޕޮލިޓިކަލް ތްރީލާއެކެވެ. ފިލްމުން ޔާމީގެ އިތުރުން އަމީތާބް ބައްޗަން، އަމިތް ސާދް، މަނޯޖް ބަޗްޕާއި އަދި ޖެކީ ސްރޮފް ފެނިގެން ދެއެވެ.