އީދު ދުވަހު ރާއްޖެ ޓީވީން ހާއްސަ "ދަސްތާއެއް"
ޝޯ ސްޕޮންސާކުރުމުގެ ފުރުސަތު ހުޅުވާލާފައި
އީދު ޝޯ
މިއަހަރުގެ ފިތުރު އީދު ދުވަހު ރާއްޖެޓީވީން "ދަސްތާ"ގެ ނަމުގައި ޚާއްސަ މިއުޒިކް ޝޯއެއް ބާއްވަން ނިންމާފައިވާކަމަށް ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ވިދާޅުވެއްޖެއެވެ.
އީދު ދުވަހުގެރޭ ރާއްޖެޓީވީން ދެއްކުމަށް ހަމަޖައްސަމުންދާ ޝޯއާއި ބެހޭގޮތުން އާމިރު ވިދާޅުވީ މި ޝޯއަކީ ސަގާފީ މިއުޒިކާއި ލަވަތައް ކުރިއަރުވާ އާލާކުރުމުގެ މަގުސަދުގައި ޜާއްޖެޓީވީން އިންތިޒާމްކޮށްގެން ބާއްވާ ޝޯއެއްކަމަށެވެ.
ޅެންވެރިންގެ މޮޅެތި ޅެންތައް މި ޝޯގައި ފެނިގެން ދާނެ ކަމަށް އާމިރު ވިދާޅުވިއެވެ. އެގޮތުން މަޝްހޫރު ލަވަކިޔުންތެރިންކަމަށްވާ އަލްމަރުހޫމާ ހޯރަފުށީ ފަރީދާއާއި އަލްމަރުހޫމާ ޖޭމް ދޮންކަމަނަ އާއި އަލްމަރުހޫމް ނައިފަރު ދޮހޮއްކޮގެ ލަވަތައް މި ޝޯގައި ފެނިގެންދާނެކަމަށް އާމިރު ވިދާޅުވިއެވެ.
އަދި އެބޭފުޅުން އެލަވަތައް ކޔާފައިވާ ރާގުތަކަށާއި މިއުޒިކަށް އެއްވެސް ބަދަލެއް ގެނެސްފައި ނުވާނެކަމަށް އޭނާ ވިދާޅުވިއެވެ.
މި ޝޯގައި ވޭލާ ސަގާފީ ބޭންޑުގެ އިތުރުން އެހެނިހެން މަޝްހޫރު ބައެއް ފަންނާނުން ފެނިގެން ދާނެއެވެ.
މި ޝޯ ސްޕޮންސާ ކުރުމުގެ ފުރުސަތު މިހާރު ވަނީ ހުޅުވާލެވިފައެވެ.
