ސަރުކާރުގެ ބޯހިޔާވަހުކަމުގެ މަޝްރޫޢުގައި އެންމެ ބޮޑު އިސްކަމެއް ދޭނީ އާމްދަނީ ނުލިބޭ މީހުންނަށާއި މަދު އާމްދަނީ ލިބޭ މީހުންނަށް ކަމަށް ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.

އެމްޑީޕީގެ ޓިކެޓުގައި ހެންވޭރު އުތުރު ދާއިރާއަށް ވާދަކުރާ ހަތަރު ކެންޑިޑޭޓެއްގެ ކެމްޕޭން ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، މި ސަރުކާރުން ބޯހިޔާވަހިކަން ދިނުމުގައި އާމްދަނީ ނުލިބޭ މީހުންނަށް އިސްކަން ދޭނެ ކަމަށެވެ. އަދި އެ މީހުންނަށް އާމްދަނީއެއް ލިބެންދެން ސަރުކާރުން ހިލޭ ބޯހިޔާވަހިކަން ދޭނެ ކަމަށް ރައީސް ވިދާޅުވިއެވެ.

މާލޭގެ ރައްޔިތުންނަށް ވެސް ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ ދަތިކަމުގެ މައްސަލަ ކަމަށާއި، އެ މައްސަލަ ހައްލުނުވެ ގިނަ ދުވަސްވުމުން މާލޭ ރައްޔިތުން ޖެހެނީ ލިބޭ އާންމުދަނީ އޫޅޭ ތަނުގެ ކުއްޔަށް ދައްކާ ހުސްކޮށްލަން ކަމަށް ރައީސް ވިދާޅުވި އެވެ.

ރައީސް ވިދާޅުވީ ނިމިދިޔަ ރައީސް އަބްދުﷲ ޔާމީންގެ ސަރުކާރުން ބޯހިޔާވަހިކަން ފޯރުކޮށް ދިނުމުގެ ނަމުގައި ހަރަދުތަކެއް ކުރި ކަމަށެވެ. އެ ހަރަދުތައް ކޮށްގެން ހަދައިފައިވާ ފްލެޓްތަކަކީ އިންސާނުން ދިރި އުޅެން އެކަށީގެންވާ ގޮތަކަށް ހަދައިފައިވާ ތަންތަން ނޫން ކަމަށް ރައީސް ވިދާޅުވާ ވިދާޅުވުމުން މިރޭ ވެސް ތަކުރާރުކުރެއްވިއެވެ.

ރައީސް ވިދާޅުވީ ކުރީގެ ސަރުކާރުން ފެށި ހިޔާ މަޝްރޫއުގައި 500 އަކަ ފޫޓުގެ ތެރޭގައި ކޮޓަރި އެޅުމުން ކޮޓަރިއެއްގައި އެނދެއް ބަހައްޓާފައި ދެން ޖާގަ ނޯންނަ ކަމުގައެވެ. އަދި އެތަންތަނުގެ ކުލި 8000ރ. އަށް އަރާ ކަމަށް ރައީސް ވިދާޅުވިއެވެ. ނަމަވެސް މި ސަރުކާރުގައި ފަށާ ހައުސިން މަޝްރޫޢުގައި 950 އަކަފޫޓްގައި ތިން ކޮޓަރި އަޅާއިރު އެތަންތަނުގެ އަގު 6000ރ. އަށް ވެސް ނާރާނެ ކަމަށް ވެސް ރައީސް ވިދާޅުވިއެވެ.

ރައްޔިތުންގެ ތެރެއިން ވަޒީފާ ނެތި، އާންމުދަނީ ލިބޭނެ ވަސީލަތެއް ނެތް ފަރާތަކަށް، އާންމުދަނީ އެއް ލިބެންދެން ހިލޭ ބޯހިޔާވަހިކަން ފޯރުކޮށްދޭނެ ކަމަށް ރައީސް ވިދާޅުވިއެވެ. އަދި މަދުން އާމްދަނީ ލިބޭ ފަރާތްތަކަށް ވެސް ކުލި ދެއްކުމުގައި ފަސޭހަ ލުއި ގޮތްތަކެއް ހޯއްދަވައިދެއްވާނެ ކަމަށް އެމަނިކުފާނު ވިދާޅުވިއެވެ.