ޖުމްހޫރީ ޕާޓީގެ ރައީސް އަލީ ވަހީދާއި އެ ޕާޓިގެ ބައެއް މިނިސްޓަރުން ފާޅުގައި އެމްޑީޕީގެ އެޖެންޑާ 19އަށް ތާއީދުކޮށް އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށް ކެމްޕެއިނަށް ނުކުންނަވައިފިއެވެ.

މައުލޫމާތު ލިބިފައިވާ ގޮތުގައި، އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށް ޖުމްހޫރީ ޕާޓީގެ ރައީސް އަލީ ވަހީދާއި، އެ ޕާޓީގެ ބައެއް މިނިސްޓަރުންނާއި ސްޓޭޓް މިނިސްޓަރުން ފާޅުގައި މި ނުކުންނެވީ، ޖުމްހޫރީ ޕާޓީއިން ކުރީގެ ރައީސް އަބުދުﷲ ޔާމީންގެ ޕީއެންސީ ކޯލިޝަނާ އެކު މަޖިލިސް އިންތިޚާބު ކާމިޔާބު ކުރުމަށް ގުޅިގެން މަަސައްކަތްކުރަން އެ ޕާޓީގެ ލީޑަރު ގާސިމް އިބުރާހިމް ނިންމެވުމާ ގުޅިގެންނެވެ.

އަލީ ވަހީދާއި ޖުމްހޫރީ ޕާޓީގެ ބައެއް މިނިސްޓަރުން މި ވަގުތު ވެސް އުޅުއްވަނީ، އެމްޑީޕީގެ އެޖެންޑާ 19 އަށް ތާއީދުކޮށް، އެ ޕާޓީގެ ކެންޑިޑޭޓުންނަށް ތާއީދު ހޯއްދެވުމުގެ މަަސައްކަތުގައި ކެންޑިޑޭޓުންނާ އެކު އަތޮޅުތެރޭގައެވެ.

އެގޮތުން މިނިސްޓަރ އަލީ ވަހީދާއި، ތިމާވެއްޓާ ބެހޭ މިނިސްޓަރު ޑރ. ހުސެއިން ރަޝީދު އަންގާރަ ދުވަހުގެރޭ ވަނީ، ބ. ތުޅާދޫ ދާއިރާއަށް އެމްޑީޕީގެ ޓިކެޓްގައި ވާދަކުރައްވާ ކެންޑިޑޭޓް ހިސާން ހުސެއިން ތުޅާދޫގައި ބޭއްވި ކެމްޕެއިން ޖަލްސާގައި ބައިވެރިވެވަޑައިގަންނަވާފައެެވެ. އަދި މި ޖަލްސާގައި އަލީ ވަހީދު ވެސް އަދި ޑރ. ހުސެއިން ވެސް ވަނީ އެޖެންޑާ 19 އަށް އެ ބޭފުޅުން ތާއީދު ކުރައްވާކަން ހާމަކުރައްވާފައެވެ.

މަޖިލިސް އިންތިޚާބުގެ ކެމްޕެއިން މެކުހަށް ޖަހާފައިވާއިރު، ޖޭޕީގެ އެންމެ އިސް ބޭފުޅުން އެޕާޓީއާ ފެއަށް ޖެހި، އެމްޑީޕީގެ އެޖެންޑާ 19 އަށް ތާއީދުކުރުމާ މެދު ޖޭޕީ މިހާތަނަށް އެއްވެސް އެއްޗެއް ބުނެފައެއް ނުވެއެވެ.

އެޖެންޑާ 19 އަށް ކެމްޕެއިން ކުރައްވަމުން ގެންދަވާ ޖޭޕީގެ ބޭފުޅުން ކުރިއަަށް ދެ ދުވަހު ވެސް އުޅުއްވާނީ އަތޮޅުތެރޭގައި އެމްޑީޕީގެ ކެންޑިޑޭޓުންނަށް ތާއީދު ހޯއްދެވުމަށް ކަމަށް މައުލޫމާތު ލިބެއެވެ. އެގޮތުން ކ.ގުރައިދޫ، ފެރިދޫ، ތުޅާދޫ، އަނގޮޅިތީމް، އަލިފުށި، ކެންދޫ، ހިންނަވަރު، މަނަދޫ އަދި ވެލިދޫގެ އެމްޑީޕީ ކެމްޕެއިން ހަރަކާތްތަކުގައި މި ބޭފުޅުން ބައިވެރިވެވަޑައިގަންނަވާނެ ކަމަށް ވަނީ މައުލޫމާތު ލިބިފައެވެ.

ޖުމްހޫރީ ޕާޓީގެ ކުރީގެ ސެކެރެޓަރީ ޖެނެރަލް އަދި މިހާރުގެ ރައީސް އޮފީހުގެ މިނިސްޓަރު އަހުމަދު ސަމީރު ވެސް ވަނީ ހޯމަ ދުވަހުގެރޭ އޮތް އެމްޑީޕީގެ ކެމްޕެއިން އިވެންޓެއްގައި ބައިވެރިވެ ވަޑައިގަންނަވައިފައެވެ.