ތަރައްގީ އަކީ ރަނގަޅު އާއިލާއެއް ބިނާކުރެވުން:ރައީސް ނަޝީދު

ތަރައްގީ އަކީ ރަނގަޅު އާއިލާއެއް ބިނާކުރެވުން ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.

19 ވަަނަ ރައްޔިތުންގެ މަޖިލީހުގެ އެމްޑީޕީ ޓިކެޓްގައި ކެންދޫ ދާއިރާއަށް ވާދަކުރައްވާ އަހްމަދު ލަތީފްގެ ކެމްޕެއިން ޖަލްސާއަށް ކެންދޫއަށް ވަޑައިގެން ވާހަކަފުޅު ދައްކަވަމުން ރައީސް ނަޝީދު ވިދާޅުވީ ތަރައްގީއަކީ ކޮންކްރީޓް އާއި ހައިމާކް ނޫން ކަމަށެވެ. ތަރައްގީއަކީ ރަނގަޅު އުފާވެރި ތަނަވަސް އާއިލާއެއް ބިނާކުރެވިގެން ދިއުން ކަމަށެވެ.

ރައީސް އިބްރާހިމް މުހައްމަދު ސޯލިހުގެ ސިޔާސަތަކީ ރަނގަޅު އާއިލާއެއް ބިނާކުރުމުގެ ފުރުސަތު ރާއްޖޭގެ ރައްޔިތުންނަށް ހޯއްދަވައިދެއްވުން ކަމަށް އެ މަނިކުފާނު ވިދާޅުވިއެވެ.

އާއިލާއެއް ބިނާކުރުމުގެ ފުރިހަމަ ވިސްނުން ރައީސް ސޯލިހުގެ ހުންނާނެ ކަމަށާއި، ކުޑަކުދިންނާއި ބޮޑެތި މީހުން އެ މަނިކުފާނު ދެކެ ލޯބިވާ ކަމަށް ރައީސް ނަޝީދު ވިދާުޅުވިއެވެ.ރަނގަޅު އާއިލާޢެއް ބިނާކުރުމަށް ކަންތައް ކުރަންޖެހޭނީ ކިހިނެއްކަން ރައީސް ސޯލިހަށް ވަަރަށް ރަނގަޅަށް އެގިވަޑައިގަންނަވާނެ ކަމަށް އެ މަނިކުފާނު ވިދާޅުވިއެވެ.

ރައްޔިތުންގެ މަޖިލީހަށް ކުރިމަތިލައްވާފައިވާ އެމްޑީޕީ ކެނޑިޑޭޓުންގެ މަގްސަދަކީ ރައްޔިތުންގެ ހައްގުގައި ވަކާލާތު ކުރުން ކަމަށާއި، އެ މެމްބަރުން ހިމާޔަތް ކުރަން ގޮވާނެ ވިޔަފާރިއެއް ރިސޯރޓެއް ނޯންނާނެ ކަމަށް ރައީސް ނަޝީދު ވިދާޅުވިއެވެ. ރައްޔިތުންގެ މަޖިލީހަށް ކުރިމަތިލައްވާފައިވާ ބައެއް ކެނޑިޑޭޓުން ތިމަންނާއަކީ ރައީސް ސޯލިހުގެ ކެނޑިޑޭޓް ކަމަށް ވިދާޅުވަމުން އަންނަ ކަމަށް ރައީސް ނަޝީދު ވިދާޅުވިއެވެ. އެ މަނިކުފާނު ވިދާޅުވީ ރައީސް ސޯލިހުގެ ކެނޑިޑޭޓަކީ ރައީސް ނަޝީދުގެ ކެނޑިޑޭޓް ކަމަށާއި، އެ މަނިކުފާނު ތާއީދު ނުކުރައްވާ ކެނޑިޑޭޓަކަށް ރައީސް ސޯލިހުވެސް ތާއީދު ނުކުރައްވާނެ ކަމަށެވެ.

އެޖެންޑާ 19 އަކީ ގާނޫނީ އޮނިގަނޑެއް ކަމަށާއި، ތަރަހައެއް ކަމަށް ވިދާޅުވެ ކެންދޫ ރައްޔިތުންނާއި މުޚާތަބްކުރައްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ ރިސޯރޓްތަކުގައި ވަޒީފާ އަދާކުރާ ކެންދޫ މީހުންނަށް އޯފް ޑިއުޓީގައި ކެންދުއަށް އާދެވޭނެ ކަމަށާއި،ގާނޫނެއްގައި ލިޔެ އެކަންކޮށްދެއްވާނެ ކަމަށެވެ. އެއީ އެޖެންޑާ 19 އިން ރައްޔިތުންނަށް ކަށަވަރުވެގެންދާނެ ވައުދެއް ކަމަށް އެ މަނިކުފާނު ވިދާޅުވިއެވެ.

އިންތިޚާބާއި ދިމާކޮށް އެމްޑީޕީ އާއި އިދިކޮޅު ފަރާތްތަކުން ވަކި ސިޔާސީ މަންފާއެއް ހާސިލްކުރުމުގެ ބޭނުމުގައި ލާ ދީނީއޭ ގޮވައިގެން އަންނަ ކަމަށާއި، އެކަން އެގޮތަށް ނުކުރެއްވުމަށް ރައީސް ނަޝީދުވަނީ އެދިވަޑައިގެންފައެވެ. ރާއްޖެއަކީ 100 ޕަސެންޓް އިސްލާމީ ގައުމެއް ކަމަށާއި، ލާދީނީ މީހުން ރާއްޖޭގައި ނޫޅޭނެ ކަމަށާއި، އެއީ ދީން ހުއްދަކުރާ ކަމެއް ނޫން ކަމަށް އެ މަނިކުފާނު ވިދާޅުވިއެވެ.

ރާއްޖެ މި ވަގުތު އޮތީ ހަތަރު އަނގޮޅއިއެއްގެ ކަންމަތީގައި ކަމަށާއި، އަމާން އައްސޭރިއަކަށް ނޫނީ ހަރާބުގެ އައްސޭރިއަކަށް ވެސް ދެވެން އެބައޮތް ކަމަށް ރައީސް ނަޝީދު ވިދާޅުވިއެވެ. ގައުމު އަމާން ބަނދަރަކަށް ދެވޭނެ ހަމައެކަނި ގޮތަކީ އެޖެންޑާ 19 ކަން އެ މަނިކުފާނު ފާހަގަކުރެއްވިއެވެ. އެހެންކަމުން

ރާއްޖޭގެ ހުރިހާ ރައްޔިތުން ތިލަފަތަށް ވޯޓް ދެއްވުމަށް ރައީސް ނަޝީދު ވަނީ އެދިވަޑައިގެންފައެވެ.

ކެންދޫ ދާއިރާއަށް ކުރިމަތިލައްވާފައިވަނީ މިނިވަން ކެނޑިޑޭޓް އަހްމަދު ރިޒާ،އެމްޑީޕީގެ ކެނޑިޑޭޓް އަހްމަދު ލަތީފް،ޖޭޕީގެ ކެނޑިޑޭޓް އަލީ ހުސެއިންއެވެ. އަލީ ހުސެއިން އަކީ މިހާރު ވެސް އެ ދާއިރާގެ ގޮނޑި ރައްޔިތުންގެ މަޖިލީހުގައި ތަމްސީލް ކުރައްވަމުން ގެންދަވާ މެމްބަރެވެ.

ކެންދޫގެ އާބާދީއަކީ 1298 އެވެ.