ބޭންކް އޮފް މޯލްޑިވްސް (ބީއެމްއެލް) އާއި، ޓޯޓަލް ފިޓްނަސް ގްރޫޕް (ޓީއެފްޖީ) ޖިމާ ގުޅިގެން ކޮންމެ އަހަރަކު ވެސް ބާއްވާ "ވާއު ކިޑްސް ރަން" މި އަަހަރު އޭޕްރީލް މަހުގެ 27 ވަނަ ދުވަހު ބޭއްވުމަށް ހަމަޖައްސައިފިއެވެ.

އެކަމާ ގުޅޭ ގޮތުން މީޑިއާ އަށް މައުލޫމާތު ދެއްވަމުން ބީއެމްއެލްގެ މެނޭޖަރ (ޕަބްލިކް ރިލޭޝަންސް) މުހައްމަދު ސައީދު ވިދާޅުވީ، މިއީ ޓީއެފްޖީއާ ގުޅިގެން މި ރަން ކުރިއަށްގެންދާ ހަތަރު ވަނަ އަހަރު ކަމަށާއި، މި އަހަރު އެހެން އަހަރުތަކާ ޚިލާފަށް އިތުރު އުމުރުފުރާތަކެއް ވެސް ހިމެނިފައިވާނެ ކަމަށެވެ. އަދި މި އަހަރުގެ ރަން އޮންނާނީ ހުޅުމާލޭގައި ކަމަށް ވެސް ސައީދު ވިދާޅުވިއެވެ. 

ސައީދު ވިދާޅުވީ، މި ފަހަރުގެ ރަންއަކީ ވެސް "ޗެރިޓީ" ރަންއަކަށް ހެދުމަށްޓަކައި ފަންޑް ރެއިސް ކުރާނެ ޕްލެޓް ފޯމެއް ތައާރަފް ކުރާނެ ކަމަށާއި، މި ރަން މެދުވެރިކޮށް ބުލީ ކުރުން ނުވަތަ ހަނގާ ކުރުމާ ދެކޮޅަށް ބީއެމްއެލް އާއި އާރކްއާ ގުޅިގެން ކުރާ މަސައްކަތްތަކަށް އެހީތެރިކަން ފޯރުކޮށްދެވިގެންދާނެ ކަމަށެވެ. 

މި ރަންއާ ގުޅޭ ގޮތުން މީޑިއާއަށް މައުލޫމާތު ދެއްވަމުން ޓީއެފްޖީގެ ސީއީއޯ ހުސައިން ޒިނާން ވިދާޅުވީ، މިދިޔަ އަހަރުތަކުގައި މި ރަން ކުރިއަށް ގެންގޮސްފައި ވަނީ ތިން އުމުރުފުރާއަކަށް ބަހާލައިގެން ކަމަށާއި، ނަމަވެސް މި ފަަހަރު ހަތަރު އުމުރުފުރާއެއް ހިިމެނޭނެ ކަމަށެވެ. އެ ގޮތުން އެންމެ ހަގު އުމުރުފުރާގެ ގޮތުގައި ހަތަރު އަހަރާއި ހަ އަހަރު ހިމެނޭއިރު، ދެވަނަ އުމުރުފުރާއަކީ ހަ އަހަރާއި އަށް އަހަރެވެ. މި ދެ އުމުރުފުރާގައި ވެސް ދުވަން ހަމަޖެހިފައި ވަނީ ދެ ކިލޯމީޓަރަށެވެ. 

ތިން ވަނަ އުމުރުފުރާއަކަށް އަށް އަހަރާއި 10 އަހަރު ހިމެނޭއިރު، މި އުމުރުފުރާގައި ދުވުމަށް ހަމަޖެހިފައިވަނީ ތިން ކިލޯމީޓަރަށް ކަމަށް ވެސް ޒިނާން ވިދާޅުވިއެވެ. އަދި މި 3 އުމުރުފުރާގައި ވެސް ބެލެނިވެރިންނާ އެކުގައި ދުވެވޭނެ ކަމަށާއި، އޭގެ ރެޖިސްޓްރޭޝަން ފީއަކީ 299ރ. ކަމަށް ވެސް ޒިނާން ވިދާޅުވިއެވެ.

އޭގެ އިތުރުން މި އަހަރު މުޅިން އަލަށް ތައާރަފް ކޮށްފައިވާ 10 އަހަރާއި 13 އަހަރުގެ އުމުރުފުރާގައި ދުވުމަށް ހަމަޖެހިފައި ވަނީ ބެލެނިވެރިންނާ ނުލާ ކަމަށާއި، އެ އުމުރުފުރާގެ ކުދިންގެ ރެޖިސްޓްރޭޝަން ފީއަކީ 199ރ. ކަމަށް ޒިނާން ވިދާޅުވިއެވެ. 

މި ހުރިހާ އުމުރުފުރާއަކުން ވެސް ފުރަތަމަ 250 ޖާގައަށް އޮންލައިންކޮށް ރަޖިސްޓްރީ ކުރެވޭ ގޮތަށް ހުޅުވާލާއިރު، މި ރަން މެދުވެރިކޮށް ލިބޭ ފަންޑް ރެއިސިންގެގެ ފައިސާ ބުލީ ކުރުން ހުއްޓުވުމުގެ މަސައްކަތަށް ހޭދަކުރަން ނިންމީ އެކަމަކީ މިއަދު މުޖުތަމައުގައި ހުރި ބޮޑެތި މައްސަލަތަކުގެ ތެރެއިން އެންމެ އަޅާލުމާއި ހޭލުންތެރިކަން ބޭނުންވާ އެއް މައްސަލައަށް ވީތީ ކަަމަށް ވެސް އެފަރާތްތަކުން މައުލޫމާތު ދީފައި ވެއެވެ.