ދިވެހިދައުލަތުގެ ހަޒާނާއިން ކުރީގެ ރައީސް އަބްދުﷲ ޔާމީންގެ ސަރުކާރުގައި ވައްކަން ކޮށްފައިވާ މިންވަރަށް ދުވަހަކު ވެސް މި ރާއްޖޭގައި ދައުލަތުން ވައްކަން ކޮށްފައިނުވާ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ބާރަށު ދާއިރާ އަށް އެމްޑީޕީގެ ފަރާތުން ވާދަކުރައްވާ އަހުމަދު އަބްދުﷲގެ ކެމްޕޭނަށް ހއ. އަށް ކުރައްވަމުން ގެންދާ ދަތުރުފުޅުގައި މުރާދޫއަށް ވަޑައިގަންނަވާ ވާހަކަފުޅު ދައްކަވަމުން ނަޝީދު ވިދާޅުވީ ދައުލަތުގެ ހަޒާނާއިން ވައްކަން ކުރުން ނޫން ކަމެއް ކުރީގެ ސަރުކާރުން ނުކުރާ ކަމަށެވެ.

ނަޝީދު ވިދާޅުވީ ސަރުކާރު ހިއްސާވާ ކުންފުނިތައް މެދުވެރިކޮށްގެން ކޮށްފައިވާ ވައްކަންތަކުގެ ތެރެއިން ފެންނަން އޮތީ އެމްއެމްޕީއާރްސީގެ ވައްކަން އެކަނި ކަމަށެވެ.

''އެހެން ނަމަވެސް ކުންފުނި އެކަންޏެއް ނޫން. ފެނަކަ ކުންފުނި ވެސް  ފޯޓްސް އޮތޯރީ ލިމިޓެޑް ވެސް އަދި އެހެން ވެސް ދެން ސަރުކާރުގެ ހުރިހާ ކުންފުންޏަކުން. ހިންގަމުން ގެންދާ ޖަރީމާ. އަދި ސަރުކާރުގެ ކޮންޓްރެކްޓަރުތައް ދެމުން ގެންދިޔައީ ރައްޔިތުންގެ މަޖިލިސް މެންބަރުންނާ ގުޅުން ހުރި ކުންފުނިތަކަށް،'' ނަޝީދު ވިދާޅުވިއެވެ.

ނަޝީދު ވިދާޅުވީ މިފާއިތުވެ ދިޔަ ފަސް އަހަރު ތަރައްގީގެ މަޝްރޫއުތައް ހަވާލުކުރި ކުންފުނިތަކަކީ އެ މަސައްކަތްތައް ކުރުމުގެ އެއްވެސް ތަޖުރިބާއެއް ގާބިލްކަމެއް ހުނަރެއް ލިބިފައިވާ ކުންފުނިތަކެއް ނޫން ކަމަށެވެ.

އެހެންކަމުން ރާއްޖޭގެ އެކިއެކި ކަންކޮޅުތަކުގައި މަޝްރޫއުތަކުގެ މަސައްކަތްތައް ފެށި ނަމަވެސް ކުރިއަށް ނުގެންދެވޭ ކަމަށާއި، ރައްޔިތުން ވެވޭ ބޭއިންސާފެއް ކަމަށެވެ.

ނަޝީދު ވިދާޅުވީ އެމްއެމްޕީއާރްސީން އެކަނި ވަގަށް ނެގި 1.4 ބިލިއަން ރުފިޔާއަކީ ވެސް ރަށެއް ތަރައްގީ ކުރުމަށް ހިންގާ މަޝްރޫއުތައް ހަތަރު ފަހަރަށް ހިންގޭހާ ފައިސާ ކަމަށެވެ.

މީގެ އިތުރުން ނަޝީދު ވިދާޅުވީ ކުރިއަށް އޮތް ރައްޔިތުން މަޖިލީހުގެ އިންތިޚާބުގައި ވޯޓުދޭއިރު ރައްޔިތުން މިހުރިހާ ކަންކަމަށް ވިސްނަން ޖެހޭ ކަމަށާއި، ހއ. ބާރަށު ދާއިރާގެ ގޮނޑިއަށް އަހުމަދު އަބްދުﷲ އަކީ ހޮވަންޖެހޭ ކަމަށެވެ. އަދި ވިދާޅުވީ އަހުމަދު އަބްދުﷲއަކީ ނަޒާހަތްތެރި ބޭފުޅެއް ކަމަށާއި، ރައްޔިތުންގެ ބޭނުންތަކަށް ވަކާލާތުގެ ކުރާނެ ބޭފުޅެއް ކަމަށެވެ.