މަޖިލީސް އިންތިޚާބުގައި ޕްރިންޓްކުރީ 2،67159 ކަރުދާސް
31 މާރިޗު 2019 | އާދީއްތަ 08:10ވޯޓު ކަރުދާސް ޕްރިންޓް ކުރިއިރު 24 ގަޑިއިރު ވަންދެން ކެމެރާކޮށް ރެކޯޑް ކުރި
އީސީއިން ބޭއްވި ނޫސްވެރިންގެ ބައްދަލުވުމެއްގައި އެކަމިޝަންގެ މެމްބަރުން
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ޕްރިންޓް ކޮށްފައި ވަނީ 2،67159 (ދެލައްކަ ފަސްދޮޅަސް ހަތްހާސް އެއްސަތޭކަ ފަންސާސް ނުވަ) ކަރުދާސް ކަމަށް އިލެކްޝަންސް ކަމިޝަން (އީސީ) އިން ބުނެފިއެވެ.
މަޖިލީސް އިންތިޚާބުގެ ވޯޓު ކަރުދާސް ޗާޕްކޮށްފައި ވަނީ ނެވޮލްޓީ ޕްރިންޓާސްއިންނެވެ. އީސީގެ ރައީސް އަހުމަދު ޝަރީފް ވިދާޅުވީ ވޯޓުކަރުދާސް ޕްރިންޓް ކުރުމަށް 2.6 މިލިއަން ރުފިޔާ ޚަރަދު ކޮށްފައިވާ ކަމަށެވެ. ރިޔާސީ އިންތިހާބުގައި ވޯޓު ކަރުދާސް ޕްރިންޓްކުރީ އެމް7 އިންނެވެ.
ނިމިދިޔަ ރިޔާސީ އިންތިޚާބާ ޚިލާފަށް މިފަހަރުގެ އިންތިޚާބުގައި ވޯޓު ކަރުދާސް ޕްރިންޓް ކުރަނީ ކަޅާއި ހުދުންނެވެ. އަދި ރިޔާސީ އިންތިޚާބުގެ ވޯޓު ކަރުދާހުގައި ސެކިއުރިޓީ ތިން ފީޗާއެއް ހިމެނިފައިވީ ނަމަވެސް މިފަހަރުގެ އިންތިޚާބުގައި ހިމަނަނީ ސެކިއުރުޓީ ދެ ފީޗާއެވެ.
ވޭތުވެދިޔަ ރިޔާސީ އިންތިޚާބުގައި ސުޕްރީމް ކޯޓަށް ހުށައެޅުނު މައްސަލަތަކަށް ސަމާލުކަން ދީފައި ހުންނާނެ ކަމަށް ޝަރީފު ވިދާޅުވިއެވެ. ވޯޓު ކަރުދާސް ޕްރިންޓް ކުރިއިރު 24 ގަޑިއިރު ވަންދެން ކެމެރާ ކުރެވި ރެކޯޑް ކުރެވޭ ގޮތް ހަދާފައި ހުންނާނެ ކަމަށާއި ވޯޓު ކަރުދާސް ޕްރިންޓް ކުރިމުގައި އީސީގެ ސްޓާފުންނާއި ފުލުހުން ހަރަކާތްތެރިވާނެ ކަމަށް ޝަރީފު ވިދާޅުވިއެވެ.
"އޭގެ އެއްކަމަކީ ވޯޓު ކަރުދާސް ޕްރިންޓް ކުރުމާއި އެކަންކަން ކުރިން ވެސް އަޅުގަނޑުމެންގެ ސްޓާފުންނާއި ފުލުހުންގެ ހާޒިރުގައި އެކަން ކުރިއަށް ދާނީ. އެހެން ނަމަވެސް އަބަދު 24 ގަޑިއިރު ރެކޯޑް ކުރެވޭ ގޮތަށް އަޅުގަނޑުމެން ހުންނާނީ އަޅުގަނޑުމެންގެ އަތުގައި ސީޑި އެވެއިލަބަލް ވާނެ. އޭގައި ހުރިހާ ހަރަކާތްތަކެއް ފެންނަން ހުންނާނެ،" ޝަރީފު ވިދާޅުވިއެވެ.
އީސީ އިން ބުނީ މި ފަހަރުގެ އިންތިޚާބުގެ ވޯޓު ކަރުދާހުގެ ފަހަތުގައި އެ ކަމިޝަންގެ ތައްގަނޑު ޖަހާފައި ހުންނާނެ ކަމަށެވެ.
މިފަހަރުގެ އިންތިޚާބުގައި 264،589 މީހުންނަށް ވޯޓު ލުމުގެ ހައްގު ލިބިފައިވެއެވެ. މިފަހަރުގެ އިންތިޚާބުގައި 501 ވޯޓު ފޮށި ބަހައްޓާއިރު 87 ދާއިރާއަށް މެމްބަރުން އިންތިޚާބު ކުރާނެއެވެ.
އެ ކަމިޝަނުން ބުނީ މަޖިލިސް އިންތިޚާބަށް ރީރަޖިސްޓްރީ ކޮށްފައި ވަނީ 19،596 (ނަވާރަހާސް ފަސްސަތޭކަ ނުވަދިހަ ހަ) މީހުން ކަމަށެވެ. މިފަހަރުގެ އިންތިޚާބަށް ރަޖިސްޓްރީ ކުރަންޖެހޭނީ ނިމިދިޔަ ރިޔާސީ އިންތިޚާބުގައި ވޯޓުލީ ތަން ނޫން އެހެން ތަނެއްގައި ވޯޓުލާނަމައެވެ.
