ފުޓުބޯލް އެސޯސިއޭޝަން އޮފް މޯލްޑިވްސް އާއި ވުމަންސް ފުޓުބޯލް ކްލަބް ގުޅިގެން އޭއެފްސީ ވުމަންސް ފުޓުބޯލް ޑޭ ކުލަގަދަކޮށް ފާހަގަކޮށްފިއެވެ.
ހެންވޭރު ދަނޑުގައި ހޮނިހިރު ދުވަހު ހަވީރު 15:00 އިން 18:00 ކުރިއަށް ގެންދިޔަ މިހަރަކާތުގައި ރާއްޖޭގައި ހަރަކާތްތެރިވާ ގިނަ ޖަމިއްޔާތަކުން ވަނީ ބައިވެރިވެފައެވެ.
ވުމަންސް ފުޓުބޯލް ކްލަބުގެ ފައުންޑަރ އަދި ނައިބު ރައީސް އާމިރާ އަލީ ބުނީ ހޮނިހިރު ދުވަހު ބޭއްވި ހަރަކާތުގެ އަމާޒަކީ ވީހާ ވެސް ގިނަ އަންހެން ކަނބަލުންނާއި ކުދިންނަށް ފުޓުބޯޅައާއި ގުޅުންހުރި ތަފާތު ގޭމްސްތަށް ކުޅެލުމުގެ ފުރުސަތު ހޯދައި ދިނުން ކަމަށާއި، ފުޓުބޯޅައަކީ މަޖާ ކުޅިވަރެއްގެ ގޮތުގައި ގިނަ ބަޔަކަށް ދައްކުވައި ދިނުމުގެ އިތުރުން، ވީ ހާވެސް ގިނަ އަންހެން ކަނބަލުންނާއި ކުދިން ފުޓުބޯޅަ އާއި ރަހުމަތްތެރި ކުރުވުން ކަމަށެެވެ.
އެ ބޭފުޅާގެ ވާހަކައިގައި އިތުރަށް ބުނެފައި ވަނީ ވުމަންސް ޑޭގެ ހަރަކާތްތަކުގައި ހާއްސަ އެހީއަށް ބޭނުންވާ ކުދިން ބައިވެރިވެ، އެ ކުދިން ވެސް ފުޓުބޯޅަ ކުޅުމަކީ ހޮނިހިރު ދުވަހު ބޭއްވި ހަރަކާތަށް ލިބުނު އިތުރު ފުރިހަމަ ކަމެއް ކަމަށެވެ.
ހޮނިހިރު ދުވަހުގެ ހަރަކާތުގައި ބައިވެރިވި ބައެއް ކުދިން ބުނެފައި ވަނީ، އެ ހަރަކާތުގެ ސަބަބުން ފުޓުބޯޅަ ކުޅެލުމުގެ ފުރުސަތު ލިބިގެންދިއުމުން އުފާ ކުރާ ކަމަށެވެ. މީގެ އިތުރުން ވެސް ކުރިއަށް އޮތްތާނގައި އެފަދަ ހަރަކާތްތަކެއް ކުރިއަށް ގެންދާނެ ކަމަށް އުންމީދު ކުރާ ކަމަށެވެ.
ކޮންމެ އަަހަރެއްގެ ވެސް ބައިނަލްއަގުވާމީ އަންހެނުންގެ ދުވަހާ ދިމާކޮށް އެކި އުމުރުފުރާތަކުގެ އަންހެން ކަނބަލުންނާއި އަންހެން ކުދިންނަށް ހާއްސަކޮށްގެން އޭއެފްސީން އެކި ގައުމުތަކުގައި ފާހަގަ ކުރާ ވުމަންސް ފުޓުބޯލްޑޭ ރާއްޖޭގައި މިހާ ކުލަގަދަ ގޮތެއްގައި ފާހަގަކުރި މިއީ ފުރަތަމަ ފަހަރެވެ.
ވުމަންސް ފުޓުބޯލް ކްލަބުން ބުނީ މުސްތަގުބަލުގައި ވެސް މިފަދަ ހަރަކާތްތަކެއް ރާވާ ހިންގުމަށް ޕްލޭން ކުރެވިފައިވާ ކަމަށާއި، އެ ކްލަބަށް އާންމުންގެ ފަރާތުން ހީކުރި ވަރަށް ވުރެން ބޮޑު ތަރުހީބެއް ލިބެމުން އަންނަ ކަމަށެވެ.
