ހީލަތްތެރިކަމާއި ރޭވުންތެރިކަމުން ޖުމްހޫރީ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް ގާސިމް އިބްރާހީމް، ކުރީގެ ރައީސް އަބްދުﷲ ޔާމީންގެ އަތްދަށަށް ގެންނަވާފައިވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ވިލިފުށީ ދާއިރާއަށް އެމްޑީޕީ ޓިކެޓްގައި ވާދަކުރައްވާ ހަސަން އަފީފުގެ ކެންޕެއިން ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ ރައީސް ޔާމީން ގެންދަވަނީ ގާސިމް ލައްވާ "ޖަހާހާ ބެރަކަށް ނައްޓުވަމުން" ކަމަށެވެ. އެހެން ނަމަވެސް ރާއްޖޭގެ ރައްޔިތުން ތިބީ ރައީސް ޔާމީންގެ އަނިޔާވެރިކަމާއި ޚުދުމުޚުތާރު ވެރިކަމަށް ދީލާލާކަށް ނޫން ކަމަށް ވިދާޅުވިއެވެ.
"މަނިކުފާނުގެ ހީލަތްތެރިކަމާއި ރޭވުންތެރިކަމުން ގާސިމް އިބްރާހިމް މަނިކުފާނުގެ އަތްދަށް ގެންނަވައިފި އަޅުގަނޑުމެންނަށް އެތަން އެބަފެނޭ. އަދި މަނިކުފާނު ތި ގެންދަވަނީ ޖޭޕީ ލައްވާ ތިބޭފުޅާ ބޭނުންވާ ހުރިހާ ބެރަކަށް ނައްޓުވަމުން. އަޅުގަނޑުމެންނަށް އެތަން އެބަފެނޭ. ރާއްޖޭގެ ރައްޔިތުންނަށް ވެސް އެތަން އެބަފެނޭ. އެހެން ނަމަވެސް އަޅުގަނޑުމެން މިތިބީ މަނިކުފާނުގެ ޚުދުމުޚުތާރު ވެރިކަމާއި ވައްކަމާއި ފަސާދައާއި އަނިޔާވެރިކަމާއި މާރާމާރީއާއި ދީލާލާކަށް ނޫން،. "ރައީސް ނަޝީދު ވިދާޅުވިއެވެ.
މި ސަރުކާރުގެ ކޯލިޝަންގެ ހަތަރު ލީޑަރުންގެ ތެރޭ ހިމެނޭ ގާސިމް ވަނީ އިދިކޮޅު ޕާޓީތަކާއި ގުޅިގެން ކުރިއަށް އޮތް ރައްޔިތުންގެ މަޖިލީހުގެ ކެންޕެއިން ފަށާފައެވެ.ގާސިމް ވިދާޅުވީ އިދިކޮޅު ކޯލިޝަނާއި ގުޅެން ޖެހުނީ ސަރުކާރު ކޯލިޝަނާއެކު ހަދާފައިވާ އެއްބަސްވުމާ އެމްޑީޕީން ހިލާފުވެ ޖޭޕީއަށް ލިބެންޖެހޭ ގޮނޑިތައް ދިނުމަށް ދެކޮޅު ހެދުމުން ކަމަށެވެ.
މަނީލޯންޑަރިންގެ ތުހުމަތުގައި ހެއްކަށް ނުފޫޒު ފޯރުވާނެކަމަށް ބެލެވި ރައީސް ޔާމީން ހައްޔަރުކޮށް ޖަލަށް ލާފައިވަނީ މިދިޔަ މަހުގެ 18 ވަނަ ދުވަހުއެވެ. އަދި އެމަނިކުފާނު ދޫކޮށްލުމަށް ހައިކޯޓުގެ ބެންޗް ބަދަލުކޮށް ހުކުމް ކޮށްފައިވަނީ މިދިޔަ ބުރާސްފަތި ދުވަހުއެވެ. ރައީސް ނަޝީދު ވިދާޅުވީ ހައި ކޯޓުން ޔާމީން ދޫކުރަން ނިންމީ ކުރިން އެ ކޯޓުން ކުރި ޝަރީއަތް އޮތްތަނުގައި ބާއްވާފައި ކަމަށެވެ. އަދި "ބެންޗް ބަދަލުކޮށްފައި ހިނގަމުން އަންނަ ޝަރީއަތް މެދުން ފަނޑިޔާރުން ބަދަލުކޮށްފައި އެހެން ބަޔަކު އައިސް އެހެން ގޮތަކަށް ހުކުމް އިއްވާ ދުނިޔޭގެ އެއްވެސް ބަޔަކު އެކަން ނުދަންނަ ގޮތްގޮތަކަށް" ކަމަށް ވިދާޅުވިއެވެ.
