ޔޫރަޕުގެ އިއްތިހާދުން އިނގިރޭސިވިލާތް ވަކިވުމަށް އެ ގައުމުގެ ޕާލިމަންޓަށް ހުށައެޅުމުން، ބޮޑުވަޒީރު ތެރޭސާ މޭގެ އެއްބަސްވުމަށް ތިންވަނަ ފަހަރަށް ވެސް ނޫނެކޭ ބުނެފިއެވެ.

ހުކުރު ދުވަހު ޕާލިމަންޓުގައި ނެގި ވޯޓަށް 344 މެމްބަރުން ނޫނެކޭ ބުނެފައިވާ އިރު، އެއްބަސްވުމަށް ތާއީދުކޮށްފައި ވަނީ 286 މެމްބަރުންނެވެ. މޭ ހުށައެޅުއްވި އެއްބަސްވުމަށް ނޫނެކޭ ބުނެފައިވަނީ، އެއްބަސްވުން ފާސްކޮށްދީފިނަމަ ބޮޑުވަޒީރު ކަމުގެ މަގާމުން އިސްތިއުފާ ދެއްވާނެ ކަމަށް މޭ ވިދާޅުވެފައި ވަނިކޮށެވެ.

ނާކާމިޔާބީއާ އެކު އިނގިރޭސިވިލާތް ޔޫރަޕުގެ އިއްތިހާދުން އެއްބަސްވުމަކާއި ވަކިވުން ފަސްކުރުމަށް އިނގިރޭސިވިލާތަށް ދީފައި އޮތް މޭ 22ގެ ސުންގަޑި ދެނެއް ނުލިބޭނެއެވެ. މޭ ވިދާޅުވީ އިނގިރޭސިވިލާތުން ކުރިޔަށް ދާން މިހާރު އެހެން ގޮތެއް ހޯދަން ޖެހިފައިވާ ކަމަށެވެ. އަދި މީގެ ސަބަބުން ޔޫރަޕުގެ އިއްތިހާދުގެ އިންތިހާބު ބާއްވަން މަޖުބޫރުވުމުގެ ފުރުސަތު ބޮޑު ކަމަށް ވެސް އެކަމަނާ ވިދާޅުވިއެވެ.

އެއްބަސްވުން ފާސްނުވުމާއި ގުޅިގެން އޭޕްރީލް 12 ގެ ނިޔަލަށް އިއްތިހާދުން ދީފައިވާ މުއްދަތު އަނެއްކާވެސް އިތުރުކުރަން އިއްތިހާދުގައި އެދުމަށް މޭއަށް މަޖުބޫރުވާނެއެވެ.

އިދިކޮޅު ލޭބަރ ޕާޓީގެ ލީޑަރު ޖެރެމީ ކޯރބިން ވަނީ މޭ މަގާމުން އިސްތިއުފާ ދެއްވުމަށް ފަހު، އާއްމު އިންތިހާބަކަށް ދާން ޖެހިއްޖެ ކަމަށް ވެސް ގޮވާލައްވާފައެވެ. އަދި އެކަމަނާގެ އެއްބަސްވުމާ ދެކޮޅަށް، އަމިއްލަފުޅު ކޮންޒަރވެޓިވް ޕާޓީން ވަކާލާތު ކުރައްވާ ސްޓީވް ބޭކަރ ވެސް ވަނީ މޭ އިސްތިއުފާ ދެއްވަން ޖެހިއްޖެ ކަމަށް ވިދާޅުވެފައެވެ.

އިނގިރޭސި ޕާލިމަންޓުގެ ނިންމުމާއެކު، އޭޕްރީލް 10 ގައި ޔޫރަޕިއަން ކައުންސިލްގެ ބައްދަލުވުމެއް ބޭއްވުމަށް ނިންމާފައިވާ ކަމަށް އެ ކައުންސިލްގެ ރައީސް ޑޮނަލްޑް ޓަސްކް ވަނީ ވިދާޅުވެފަ އެވެ.

މޭ ހުށަހެޅުއްވި އެއްބަސްވުމުގައި އެންމެ ބޮޑަށް ހިޔާލު ތަފާތުވުން އުފެދިފައި ވަނީ އުތުރު އަޔަލަންޑުގެ ބޯޑަރުގައި އިނގިރޭސި ޗެކް ޕޮއިންޓެއް ގާއިމު ނުކުރުމަށް ހިމަނާފައިވުން ކަމަށް ތަޖުރިބާކާރުން ވަނީ ބުނެފައެވެ.