އިންޓަރ ސްކޫލް ވޮލީ މުބާރާތުގައި ވާދަ ކުރި ހުރިހާ ކެޓަގަރީއަކުން ފައިނަލް ކުޅެ ރަނަވަނަތަކެއް ފ. އަތޮޅު ސްކޫލުން ހޯދައިފިއެވެ.
ޒުވާނުންގެ މަރުކަޒު އެތެރެ ހޯލުގައި ކުރިއަށް ގެންދިޔަ އިންޓަރ ސްކޫލް ވޮލީ މުބާރާތުގައި ފ. އަތޮޅު ސްކޫލުން ފިރިހެންބައިގެ 14 އަހަރުންދަށް އަދި 16 އަަހަރުން ދަށުގެ ޗެމްޕިއަންކަން އަދި އަންހެން ބައިގެ 14 އަހަރުން ދަށުގެ ޗެމްޕިއަންކަން ހޯދިއިރު 16 އަހަރުން ދަށުގެ ރަނަރަޕް ކަން ވަނީ ހޯދާފައެވެ.
14 އަހަރުން ދަށުގެ ފިރިހެން ބައިގެ ޗެމްޕިއަންކަން ފ. އަތޮޅު ސްކޫލް ހޯދީ ވ. ކެޔޮދޫ ސްކޫލާއި ވާދަކޮށެވެ. 16 އަހަރުން ދަށުގެ ޗެމްޕިއަން ކަން އެ ސްކޫލުން ހޯދީވެސް ފައިނަލުގައި ވ. ކެޔޮދޫ ސްކޫލް ބަލިކޮށްގެންނެވެ.
14 އަހަރުން ދަށުގެ އަންހެންބައިގެ ޗެމްޕިއަންކަން ފ. އަތޮޅު ސްކޫލް ހޯދީ ފައިނަލުގައި ބ. ގޮއިދޫ ސްކޫލް ބަލޮކޮށްގެނެވެ. 16 އަހަރުން ދަށުގެ އަންހެންބައިގެ ޗެމްޕިއަންކަން ބ. ގޮއިދޫ ސްކޫލް ހޯދީ ފައިނަލުގައި ފ. އަަތޮޅު ސްކޫލް ބަލިކޮށްގެންނެވެ.
މި މުބާރާތުގެ 19 އަހަރުން ދަށުގެ ފިރިހެންބައިގެ ޗެމްޕިއަންކަން ސެންޓަރ ފޯ ހަޔަރ ސެކަންޑްރީ އެޑިއުކޭޝަން ހޯދީ ފައިނަލުގައި އަހުމަދިއްޔާ އިންޓަރނޭޝަނަލް ސްކޫލް ބަލިކޮށްގެނެނެވެ.
19 އަހަރުން ދަށުގެ އަންހެންބައިގެ ޗެމްޕިއަންކަން އަހުމަދިއްޔާ އިންޓަރނޭޝަނަލް ސްކޫލް ހޯދީ ފައިނަލުގައި ސެންޓަރ ފޯ ހަޔަރ ސެކަންޑްރީ އެޑިއުކޭޝަން ބަލިކޮށްގެނެވެ.
މުބާރާތުގައި އެއް ސްކޫލަކުން އެންމެ ގިނަ ރަންވަނަތަކެއް ހާސިލް ކޮށްފައިވަނީ ފ. އަތޮޅު ސްކޫލުންނެވެ. މާލޭގެ ސްކޫލްތަށް ކަޓުވާލައި 14 އަހަރުންދަށް އަދި 16 އަހަރުން ދަށުގެ ފައިނަލް ކުޅެފައިވަނީ އަތޮޅުތެރޭގެ ޓީމުތަކުންނެވެ.
ވޮލީގައި ހޯދި ރަންވަނަތަކާއެކު ފ. އަތޮޅު ސްކޫލް އެނބުރި ރަށަށް ދިއުމުން ރަށުގެ ރައްޔިތުންނާއި ސްކޫލްގެ ދަރިވަރުން ވަނީ މުބާރާތުގައި ވާދަކުރި ޓީމްތަކަށް ކުލަގަދަ މަރުހަބާއެއް ކިޔާފައެވެ.
