މާނޭ ދޫކޮށްލަން ލިވަޕޫލުން އެއްބަހެއް ނުވި

ލިވަޕޫލަށް ކުޅެމުން އަންނަ ސެނަގަލްގެ ފޯވާޑް ސާޑިއޯ މާނޭ ދޫކޮށްލަން އެ ކްލަބުން ބޭނުން ނުވާ ކަމަށް ރިޕޯޓްތައް ބުނެފިއެވެ.

މާނޭ ހޯދުމަށް ގިނަ ކްލަބްތަކުން މަސައްކަތް ކުރަމުން އަންނަ މި ދަނޑިވަޅުގައި މަޝްހޫރު ކުޅިވަރު ދަ މިރާއިން ބުނީ، މާނޭ ހޯދުމަށް ކްލަބްތަކުން ހުށަހަޅާ ބިޑުތައް ލިވަޕޫލުން ބަލައިނުގަންނާނެ ކަމަށެވެ.

މާނޭ ހޯދުމަށް އެންމެ ބޮޑަށް މަސައްކަތް ކުރަމުން އަންނަނީ ރެއާލް މެޑްރިޑުން ކަމަށް ރިޕޯޓްތައް ބުނެއެވެ. އަދި އެ ކްލަބުން އޭނާ ހޯދުމަށް ބިޑެއް ތައްޔާރުކުރަމުން އަންނަ ކަމަށް ވެސް ރިޕޯޓްތައް ބުނެއެވެ.

މިދިޔަ އަހަރުގެ ނޮވެމްބަރު މަހު ލިވަޕޫލްއާއެކު މާނޭ ހަދާފައިވާ އެއްބަސްވުން 2023 އަހަރުގެ ނިޔަލަށް އާކޮށްފައިވާއިރު، އޭނާ ބޭނުން ވަނީ އެއްބަސްވުން ނިމެންދެން ކްލަބުގައި މަޑުކުރަން ކަމަށް ރިޕޯޓްތައް ބުނެއެވެ.

ސައުތްހެމްޕްޓަން ދޫކޮށްލުމަށް ފަހު 2016 ވަނަ އަހަރު 34 މިލިއަން ޕައުންޑަށް ފަސް އަހަރު ދުވަހުގެ އެއްބަސްވުމެއްގެ ދަށުން މާނޭ ލިވަޕޫލް އަށް ބަދަލުވިއިރު، އޭނާ އަކީ އޭރު އެފްރިކާގެ ތާރީހުގައި އެންމެ އަގުބޮޑު ކުޅުންތެރިޔާއެވެ.

ލިވަޕޫލް އަށް މި ސީޒަނުގައި ކުޅުނު 38 މެޗުގައި 20 ލަނޑު ކާމިޔާބު ކޮށްފައިވާ މާނޭ ވަނީ އޭނާ މިހާތަނަށް އެޓީމަށް ކުޅުނު 111 މެޗުގައި 53 ލަނޑު ކާމިޔާބުކޮށްފަ އެވެ.

ލިވަޕޫލްއާއެކު ޔުއެފާ ޗެމްޕިއަންސް ލީގުގެ ދެވަނަ މިދިޔަ ސީޒަނުގައި ހޯދި މާނޭ ވަނީ 2016 ވަނަ އަހަރުގެ ސީޒަނުގައި ލިވަޕޫލްގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.

އެފްރިކާ ސަރަހައްދުގެ އެންމެ ކާމިޔާބު އެއް ކުޅުންތެރިޔާ މާނޭ ވަނީ ސެނެގަލް ގައުމީ ޓީމަށް މިހާތަނަށް ކުޅުނު 60 މެޗުގައި 16 ލަނޑު ކާމިޔާބު ކޮށްފައެވެ.