މުޣުނީއާއި ގުޅޭ ގޮތުން ކެމްޕޭން ޓީމްއިން އިތުރު އެއްޗެއް ނުދަންނަވާނެ : އަފްޝަން

ގެވެށި އަނިޔާގެ މައްސަލައެއް ފެންމަތިވެ، އެމްޑީޕީން ތާއިދު އަނބުރާ ގެންދިޔަ ތިނަދޫ އުތުރު ދާއިރާގެ ކެންޑިޑޭޓް އަބްދުލް މުޣުނީގެ މައްސަލައާ ގުޅޭ ގޮތުން އެމްޑީޕީގެ ކެމްޕޭން ޓީމްއިން އިތުރު އެއްޗެއް ނުދަންނަވާނެ ކަމަށް އެ ޕާޓީގެ ޑެޕިއުޓީ ސެކެޓްރީ ޖެނެރަލް އަފްޝަން ލަތީފް ވިދާޅުވެއްޖެއެވެ.

ރައްޔިތުންގެ މަޖިލީހުގެ އިންތިޚާބަށް ވަމުންދާ ތައްޔާރީތަކާ ގުޅޭ ގޮތުން އެމްޑީޕީން ސިލްސިލާކޮށް ބާއްވަމުން އަންނަ ނޫސްވެރިންގެ ބައްދަލުވުންތަކުގެ ތެރެއިން، ބުރާސްފަތިދުވަހު ބޭއްވި ނޫސްވެރިންގެ ބައްދަލުވުމުގައި، އެމްޑީޕީގެ ރައީސް މުހައްމަދު ނަޝީދު ތިނަދޫއަށް ވަޑައިގެންނެވި ދަތުރުފުޅުގައި މުޣުނީއަށް ތާއީދްކުރައްވާ ވާހަކަފުޅު ދައްކަވާފައިވާތީ، މުޣުނީއާ ދޭތޭރޭ ދެކޭ ގޮތް އެމްޑީޕީން މިހާރު ބަދަލުވީތޯ، ރާއްޖެ އެމްވީން ސުވާލުކުރުމުން އަފްޝަން ވިދާޅުވީ، ކެމްޕޭން ޓީމުން މި ކަމާއި ގުޅޭ ގޮތުން ދަންނަވާނެ އިތުރު އެއްޗެއް ނެތް ކަމަށެވެ.

Advertisement

"އަޅުގަނޑުމެންގެ ނިންމުމަކީ ކުރިންވެސް ކެމްޕޭން ޓީމުން އެކަމާއި ދޭތެރޭ އިތުރަށް އެއްވެސް އެއްޗެއް ނުދެންނަވާނެ ކަމާއި، ކުރިންވެސް ދަންނަވާފައިވާ އެއްޗަކީ އަޅުގަނޑުމެން ކުރިންވެސް ދަންނަވާފައިވާ އެއްޗެއް ކަމެއް .ޕާޓީން އެކަމާއި ދޭތެރޭ އިތުރަށް އެއްޗެއް ނުދެންނެވުން" އަފްޝަން ވިދާޅުވިއެވެ.

ރައްޔިތުންގެ މަޖިލީހުގެ އިންތިޚާބުގައި އެމްޑީޕީގެ ކެނޑިޑޭޓުންނަށް ތާއީދް ހޯދުމަށް އެ ޕާޓީން ކުރަމުންދާ ކެމްޕޭން ދަތުރުތަކުގެ ތެރެއިން، އެމްޑީޕީގެ ރައީސް މުހައްމަދު ނަޝީދާ އެކު، އެމްޑީޕީގެ ޓީމް ތިނަދޫއަށް ވަޑައިގަތުމުން މުޣުނީ އާއި އޭނާގެ ސަޕޯޓަރުންވަނީ، ރައީސް ނަޝީދާއި ޓީމަށް މަރްހަބާ ދެންނެވުމަށް ބަނދަރު މައްޗަށް ވަޑައިގެން ނަމޫނާ ދައްކަވާފައެވެ. އަދި ތިނަދޫގައި ބުދަ ދުވަހުގެ ރޭ ބޭއްވި ޖަލްސާގައި ރައީސް ނަޝީދު ވަނީ މުޣުނީއަށް ގުޅޭ ގޮތުން ފުރަތަމަ ފަހަރަށް ވާހަކަދައްކަވާފައެވެ.

ނަޝީދު ވިދާޅުވީ "މިވެނި އެވެނި ކެންޑިޑޭޓަކީ" އެމަނިކުފާނު ތާއިދު ކުރައްވާ ކެންޑިޑޭޓެއްތޯ މީހުން ސުވާލު ކުރަމުންދާ ކަމަށެވެ. އެ ސުވާލަށް ދެއްވަން އޮތް ޖަވާބަކީ އާންމު މެމްބަރުން ނިންމަވައި، ހޮއްވަވާފައިވާ ކެންޑިޑޭޓަކީ އެމަނިކުފާނުގެ ކެންޑިޑޭޓް ކަމަށާއި އެ ކެންޑިޑޭޓަކީ ޕާޓީގެ ލީޑާޝިޕްގައި ތިއްބަވާ އެހެން ބޭފުޅުންގެ ވެސް ކެންޑިޑޭޓް ކަމަށް ނަޝީދު ވިދާޅުވިއެވެ.

އެމްޑީޕީ އާންމު މެމްބަރުން ވޯޓު ދެއްވައިގެން ހުވަދޫއިން ހޮއްވެވި އަށް ކެންޑިޑޭޓުންނަކީ ރަދުންގެ ކެންޑިޑޭޓުން ނޫން ކަމަށާއި އެއީ ހުވަދޫ ރައްޔިތުންގެ ކެންޑިޑޭޓުން ކަމަށް ނަޝީދު ވިދާޅުވިއެވެ.

އެމްޑީޕީގެ ހުރިހާ ކެންޑިޑޭޓުން ވޯޓާރސް ލިސްޓްގައި ސޮއިކޮށްފައިނުވަނީ ކީއްވެގެންތޯ ނޫސްވެރިއަކު ކުރި ސުވާލަކަށް ޖަވާބުދެއްވަމުން އަފްޝަން ވިދާޅުވީ، ހުރިހާ ކެންޑިޑޭޓުން ވޯޓާރސް ލިސްޓްގައި ސޮއިކުރަން ޕާޓީން ބާރުއަޅާފައިވާނެ ކަމަށެވެ. ނަމަވެސް ވޯޓާރސް ލިސްޓްގައި މައްސަލަތަކެއް ހުރި ކަމަށް ބުނެ ބައެއް ކެންޑިޑޭޓުން ސޮއިކޮށްފައިނުވާ ކަމަށެވެ. ނަމަވެސް ވޯޓާރސް ލިސްޓާ ގުޅޭ ގޮތުން ހުށަހެޅިފައި ވަނީ ކިތައް ޝަކުވާކަން އެގިވަޑައިގަންނަވާނީ، ކޮމްޕްލެއިންސް ޓީމުން އެކަން އޮޅުންފިލުއްވުމަށް ފަހުގައި ކަމަށް އަފްޝަން ވިދާޅުވިއެވެ.

"މައްސަލަތައް ހުރި ކަމަށް ބުނެ ސޮއިނުކޮށް ވަނީ.ކޮމްޕްލެއިންސް ޓީމާއި ސުވާލުކޮށްފައި އިނގޭނީ އެއްޗެއް ބުނަން" އަފްޝަން ވިދާޅުވިއެވެ.

އަފްޝަން ވިދާޅުވީ ރައްޔިތުންގެ މަޖިލީހުގެ އިންތިޚާބުގެ ކެމްޕޭނާ ގުޅޭ މުހިންމު ދެ ހަރަކާތެއް ކުރިއަށް އެބައޮތް ކަމަށާއި، އެކަމުގެ ތައްޔާރީތައް ވަމުން އަންނަ ކަމަށެވެ. އެޖެންޑާ 19 ކެމްޕޭން ނިންމާލުމުގެ ގޮތުން ބާއްވާ ބޮޑު ޖަލްސާ ހެންވޭރު އަޑި ޕާކުގައި ހަތަރެއް އޭޕްރީލްގައި އޮންނާނެ ކަމަށެވެ. އަދި ކެމްޕޭން ނިންމުމުގެ ހިނގާލުން ފަހެއް އޭޕްރީލްގައި ޕާޓީގެ ހަރުގެއިން ފެށޭނެ ކަމަށް އަފްޝަން ވިދާޅުވިއެވެ. މި ދެ އިވެންޓްގައި ވެސް ވީހާ ވެސް ގިނަ ރައްޔިތުން ބައިވެރިވެވަޑައިގެން ދެއްވުމަކީ ޕާޓީގެ ވަރަށް ބޮޑު އެދުމެއް ކަމަށް އަފްޝަން ވިދާޅުވިއެވެ.