ޑާކާގައި ހުންނަ އުސް އިމާރާތެއްގައި ރޯވެއްޖެ

ބަނގްލަދޭޝްގެ ޑާކާގައި ހުންނަ 19 ބުރީގެ އުސް އިމާރާތެއްގައި ރޯވެ، ގިނަ އަދަދެއްގެ ބަޔަކު އިމާރާތުގެ ތެރޭގައި ތާށިވެފައިވާ ކަމަށް އެ ގައުމުގެ މީޑިއާތަކުން ރިޕޯޓް ކޮށްފިއެވެ.

އަލިފާން ނިއްވާލުމުގެ މަސައްކަތުގައި އަލިފާން ނިއްވާ 19 ޔުނިޓުން ދަނީ ހަރަކާތްތެރިވަމުންދާ ކަމަށާއި އަލިފާން ނިއްވުމުގައި މަސައްކަތުގައި އެ ގައުމުގެ އެއްގަމާއި ކަނޑުގެ ސިފައިން ވެސް ހަރަކާތްތެރިވަމުންދާ ކަމަށް ޑާކާގެ ސެންޓްރަލް ފަޔަރ ސާވިސް ކޮންޓްރޯލް ރޫމުގެ ޑިޕިއުޓީ އޮފިސަރު މުހައްމަދު ރަސެލް ވަނީ ބުނެފައެވެ.

ޑާކާގެ ބުނާނީ ސަރަހައްދުގައި ހުންނަ އިމާރާތުގައި ހިނގި ހާދިސާގައި އެއްވެސް މީހަކަށް ގެއްލުމެއް ލިބިފައިވާ ކަމަށް ރަސްމީ ފަރާތަކުން އަދި އެއްވެސް މައުލޫމާތެއް ދީފައި ނުވީ ނަމަވެސް އެތައް ބަޔަކު އިމާރާތުގައި ތާށިވެފައިވާ ކަމަށް އެ ގައުމުގެ ޑެއިލީ ސްޓަރ ނޫހުން ވަނީ ރިޕޯޓް ކޮށްފައެވެ.

އަލިފާން ރޯވެފައިވާ އިމާރާތަށް ހެލިކޮޕްޓަރުން ދަނީ ފެން ޖަހަމުންނެވެ. ރޯވެފައިވާ ސަރަހައްދަށް ގިނަ އަދަދެއްގެ ބަޔަކު އެއްވެފައިވާ އިރު، އިމާރާތުން ބޯކޮށް ދުން އަރަމުންދާ މަންޒަރުގެ ފޮޓޯތައް ސޯޝަލް މީޑިއާގައި ބައެއް މީހުން ވަނީ ހިއްސާ ކޮށްފައެވެ.

އަލިފާން ރޯވެފައިވާ އިމާރާތުން ހަ މީހަކު ވަނީ ފުންމާލައިފައިވާ ކަމަށް އެ ސަރަހައްދުގައި ހަރަކާތްތެރިވަމުންދާ އަލް ޖަޒީރާގެ ނޫސްވެރިޔާ ވަނީ ބުނެފައެވެ. އަދި އަލިފާން ރޯވީ އިމާރާތުގެ ނުވަ ވަނަ ބުރީގައި ކަމަށާއި ރޯވާން ދިމާވި ސަބަބެއް މިހާތަނަށް ދެނެގަނެވިފައި ނުވާ ކަމަށް ވެސް އޭނާ ވަނީ ބުނެފައެވެ.

މި ހާދިސާ ހިނގާފައިވަނީ ޑާކާގައި ހުންނަ ޑިއޯޑިރަންޓްއާއި ކުދި ޕްލާސްޓިކް ރައްކާކޮށްފައި ހުރި ގުދަނެއްގައި މިދިޔަ މަހުގެ ތެރޭގައި ހިނގި އަލިފާނުގެ ހާދިސާއެއްގައި 70 މީހުން މަރުވެފައި ވަނިކޮށެވެ. އަދި މި ސަރަހައްދު ކައިރީގައި އޮންނަ ނިމްތޯލީގައި 2010 ވަނަ އަހަރު ހިނގި އަލިފާނުގެ ހާދިސާއެއްގައި ވަނީ 123އަށް ވުރެ ގިނަ މީހުން މަރުވެފައެވެ.