އިންގްލިޝް ޕްރިމިއަރ ލީގުގައި ކުޅޭ މެންޗެސްޓަރ ޔުނައިޓެޑްގެ މެނޭޖަރުގެ މަގާމަށް، ކުރީގެ ކުޅުންތެރިޔާ އޮލެ ގަނަރ ސޯލްޝަޔާ ދާއިމީކޮށް އައްޔަނުކުރަން އެ ކްލަބުގެ ބޯޑުން ނިންމައިފިއެވެ.
ޑިސެމްބަރު މަހުގެ ތެރޭގައި ކުރީގެ މެނޭޖަރު ހޯސޭ މޮރީނިއޯ އެ މަގާމުން ދުރުކުރުމަށް ފަހު، ވަގުތީ މެނޭޖަރެއްގެ މަގާމުގައި ހުރި ސޯލްޝަޔާއަށް ޔުނައިޓެޑުން ދީފައިވަނީ ތިން އަހަރު ދުވަހުގެ އެއްބަސްވުމެކެވެ.
ޔުނައިޓެޑުގެ ކޯޗުކަމާއި ސޯލްޝަޔާ ހަވާލުވީ ފަހުން އެ ޓީމުގެ ނަތީޖާތައް ރަނގަޅުވެފައިވާ އިރު، މިހާތަނަށް ކުޅުނު 19 މެޗުގެ ތެރެއިން 14 މެޗުން އެ ޓީމު ވަނީ މޮޅުވެފައެވެ. މީގެ ތެރޭގައި ޗެމްޕިއަންސް ލީގުގައި ފަހަތުން އަރައި ފްރާންސްގެ ޗެމްޕިއަން ޕީއެސްޖީ ބަލިކުރުން ފާހަގަކުރެވެއެވެ.
ސޯލްޝަޔާ މަގާމަށް އައްޔަނު ކުރީ އޭނާއަކީ އެ މަގާމަށް އެކަށީގެންވާ މީހާކަން ޔަގީންވުމުން ކަމަށް ޔުނައިޓެޑުގެ ވައިސް ޗެއަރމަން އެޑް ވުޑްވަރޑް ވަނީ ބުނެފައެވެ. އަދި ކުރިޔަށް އޮތް ތަނުގައި ވެސް ރަނގަޅު ނަތީޖާތަކެއް ނެރޭނެ ކަމުގެ ފުރިހަމަ ޔަގީންކަން އެބައޮތް ކަމަށް ވެސް އޭނާ ވަނީ ބުނެފައެވެ.
އިނގިރޭސިި ޕްރިމިއަރ ލީގު ތާވަލުގެ ފަސްވަނާގައި ޔުނައިޓެޑް އޮތް އިރު، އެ ޓީމު ޗެމްޕިއަންސް ލީގުގެ ކުއާޓަރ ފައިނަލުގައި ދެން ކުޅެން އޮތީ ސްޕެއިންގެ ޗެމްޕިއަން ވަރުގަދަ ބާސެލޯނާއާއެވެ.
