އެމްޑީޕީ ސަރުކާރަށް އެއްބާރުލުން ދޭނެ ކަމަށް ބުނެ، 2009 ވަނަ އަހަރު އެހެން ބަޔަކު އިންތިހާބު ކުރުމުގެ ނަތީޖާ ހިތި ކަމަށް އެމްޑީޕީގެ ނައިބު ރައީސް އަދި ރައީސް އޮފީހުގެ މިނިސްޓަރު މުހައްމަދު ޝިފާޒު ވިދާޅުވެއްޖެއެވެ.

ހުވަދޫއިން މަޖިލީހަށް ވާދަ ކުރައްވާ އެމްޑީޕީގެ އަށް ކެންޑިޑޭޓުންނަށް ތާއިދު ހޯދުމަށް ބޭއްވި ކެމްޕެއިން ޖަލްސާގައި ވާހަކަދައްކަވަމުން މިނިސްޓަރު ޝިފާޒު ވިދާޅުވީ މަޖިލީހުގެ އިންތިޚާބަށް ވާދަކުރައްވާ ގިނަ ކެންޑިޑޭޓުންނާއި ސަޕޯޓަރުންނަށް އެޖެންޑާ19 ކަމުދާ ކަމަށާއި ނަމަވެސް އެހެން ބައެއްގެ ބަހަށް އިތުބާރުކޮށް ވޯޓު ދިނުމަކީ ކޮށްގެންވާނެ ކަމެއް ނޫން ކަމަށެވެ. ސަރުކާރަށް އެއްބާރުލުން ދޭނެ ކަމަށް ބުނެ 2009 ވަނަ އަހަރު މަޖިލީހަށް ބަޔަކު އިންތިޚާބު ކުރުމުގެ ނަތީޖާ ހިތި ކަމަށާއި މާޒީ އިޔާދަކުރަން ބޭނުން ނުވާ ކަމަށް ޝިފާޒު ވިދާޅުވިއެވެ.

ސަތާރަ ވަނަ ރައްޔިތުންގެ މަޖިލީހުގެ މެމްބަރުކަން ކުރެއްވި ޝިފާޒު ވިދާޅުވީ ސަރުކާރާ ގުޅިގެން ސަރުކާރު ހިފަހައްޓައި، ސަރުކާރު ނަގަހައްޓާ ރައްޔިތުންނަށް ޚިދުމަތެއް ދޭން ތިބޭނީ އެމްޑީޕީގެ ކެންޑިޑޭޓުން ކަމަށާއި ސަރުކާރު ދިފާއު ކުރާނީ ވެސް އެމްޑީޕީން ކަމަށެވެ.

''ރާއްޖެއަށް ހަމަޖެހުން ބޭނުންވެއްޖެ. އަޅުގަނޑުމެން ރައްޔިތުން ވަރުބަލި ވެއްޖެ. އާއިލާއާއެކު ދިރިއުޅެން ބޭނުންވެއްޖެ. އަރާމްކަން މަތީގަ ދުވަސްތަކެއް ހަމަޖެހުމެއް މިރާއްޖެއަށް މިހާރު ލިބެން ވެއްޖެ. ވަކި ވަކި ބައެއް ޕާޓީތަކުގެ ވިސްނުން އިސްކޮށްގެން ކުރާ ކަންކަމާހެދި އަޅުގަނޑުމެންނަށް ލިބެމުންދާ ގެއްލުން ވަރަށް ބޮޑު.'' ޝިފާޒު ވިދާޅުވިއެވެ.

ޝިފާޒު ވިދާޅުވީ ވާދަވެރި މާހައުލުގައި އެއްވެސް މީހަކު މަގުސަދު ގެއްލުވާ ނުލައި އެމްޑީޕީގެ ތިލަފަތަށް ވޯޓު ދިނުމަށް އެދޭ ކަމަށެވެ. މީގެ އިތުރުން ޝިފާޒު ވިދާޅުވީ އެޖެންޑާ19 ކަރުދާހަކަށް ގެނައީ ވަރަށް ގިނަ މަސައްކަތް ކޮށްގެން ކަމަށާއި ސިޔާސަތު ތަންފީޒު ކުރުމުގެ ބާރު އޮތީ ރައްޔިތުންގެ އަތުގައި ކަމަށެވެ. އަދި ވިދާޅުވީ އެމްޑީޕީ ފިޔަވައި އެހެން ޕާޓީއަކުން ސިޔާސަތު ނުވެސް ގެންގުޅޭ ކަމަށެވެ.

ޝިފާޒު ވިދާޅުވީ އެޖެންޑާ19 އިން ޒަމާންތަކަކަށް ސިޔާސީ ހަމަޖެހުން ގާއިމް ކުރެވިގެންދާނެ ކަމަށާއި، ރާއްޖެއަށް ދިމާވެފައިވާ ހުރިހާ މައްސަލައެއްގެ ހައްލު އެ ސިޔާސަތުން ލިބޭނެ ކަމަށެވެ.