ބްރެކްސިޓަށް ވޯޓު ދީފިނަމަ އިސްތިިއުފާ ދޭނަން: ތެރީސާ މޭ
މި ގޮތަށް އެދުނީ އެކަމަނާގެ އަމިއްލަ ޕާޓީގެ މެމްބަރުން އަރިހުން
އިނގިރޭސިވިލާތުގެ ބޮޑުވަޒީރު ތެރީސާ މޭ | ބީބީސީ
މިހާރު ހުށައަޅާފައި އޮތް ގޮތަށް ބްރެކްސިޓްގެ އެއްބަސްވުން ފާސްކޮށްދީފި ނަމަ، ބޮޑުވަޒީރުގެ މަގާމުން އިސްތިއުފާ ދެއްވަން ތައްޔާރަށް ހުންނެވި ތެރީސާ މޭ ވިދާޅުވެއްޖެއެވެ.
ބުދަ ދުވަހު އެ ޕާޓީގެ ޕާލިމަންޓުގެ މެމްބަރުންނާ ބައްދަލުކުރައްވާ ދެއްކެވި ވާހަކަފުޅުގައި މޭ ވިދާޅުވީ ބްރެކްސިޓާ ގުޅިގެން ޔޫރަޕުގެ އިއްތިހާދާއި އެކު ދެން އޮތް މަޝްވަރާ ބައްދަލުވުންތަކުގައި، އެކަމަނާ ބައިވެރިވެވަޑައިގަންނަވަން ބޭނުންފުޅު ނުވާ ކަން އެނގިލައްވާ ކަމަށެވެ.
މޭ މިހެން ވިދާޅުވި ކަމުގައިވާ ނަމަވެސް، ނޮދަރން އަޔަލެންޑްގެ ޑީޔޫޕީ ޕާޓީން ވަނީ މި ހާލަތުގައި ވެސް އެ އެއްބަސްވުމާ އެއްގޮތަށް ވޯޓު ދެއްވަން ދެކޮޅު ހައްދަވާފައެވެ. އެ ޕާޓީގެ ލީޑަރު އާރލެން ފޮސްޓަރ ވިދާޅުވީ "ބެކްސްޓޮޕް ކްލޯސް"ގައިވާ ކަންކަން އެއްބަސްވުމުގައި ނުހިމަނާހާ ހިނދަކު އެ ޕާޓީން ބްރެކްސިޓް އެއްބަސްވުމާ އެއްކޮޅަށް ވޯޓު ނުދެއްވާނެ ކަމަށެވެ. ބެކްސްޓޮޕްއަކީ ނޮދަރން އަޔަރެލެންޑާއި އަޔަލެންޑްގެ ބޯޑަރު އީޔޫއަށް ހުޅުވާލާފައި ބޭއްވުމަށް އެއްބަސްވުމުގައި ހިމަނާފައިވާ ބެޔެކެވެ.
މަގާމުން ދުރުވާނެ ވަކި ތާރީހެއް މިހާތަނަށް މޭ ކަނޑައަޅާފައި ނުވިއެއް ކަމަކު، އެއްބަސްވުން ފާސްކޮދީފި ނަމަ މޭ މަހުގެ 22ވަނަ ދުވަހުގައި ޕާޓީގެ ލީޑަރުގެ މަގާމުން އިސްތިއުފާ ދެއްވާނެ ކަމަށް ވަނީ ވިދާޅުވެފައެވެ. ނަމަވެސް ބޮޑުވަޒީރުގެ މަގާމަށް އެހެން ބޭފުޅަކި އައްޔަނު ކުރެވެން ދެން އެ މަގާމުގައި ދެމި ހުންނަވާނެ ކަމަށް މޭ ވަނީ ވިދާޅުވެފައެވެ.
ބްރެކްސިޓްގެ މައްސަލަ ހޫނުވެފައިވާ އިރު އެ ގައުމުގެ ޕާލިމަންޓުގެ ރައީސް ވަނީ ފާހަގަކުރެވޭ ބަދަލުތަކާ އެކު ނައިސްފިނަމަ އެއްބަސްވުމުގެ ވޯޓަކަށް ތަޅުމުގައި ނޭހޭނެ ކަމަށް ވިދާޅުވެފައެވެ. ސަރުކާރުން ވަނީ މި ފަހުން ބޭއްވި ބައްދަލުވުންތަކުގައި އެދެވޭ ވަރުގެ ކުރިއެރުމެއް ލިބި، އެކަށީގެންވާ ބަދަލުތަކާއި އެކު އަލުން ޕާލިމަންޓުގެ ތަޅުމުގައި ވޯޓަށް އެހޭނެ ކަމުގެ ޔަގީންކަން ޕާލިމަންޓަށް ދެއްވާފައެވެ.
