މަޖިލިސް އިންތިހާބަށް ޝަކުވާ ހުށަހެޅުމުގެ ފުރުސަތު ހުޅުވާލައިފި
10 އޭޕްރީލް ގެ މެންދުރު 02:00 އާ ހަމައަށް ޝަކުވާ ބަލައިގަންނާނެ
އިލެކްޝަންސް ކޮމިޝަންގެ ބައެއް މަސައްކަތްތައް ކުރިއަށްގެންދަނީ
ކުރިއަށް އޮތް މަޖިލިސް އިންތިހާބާ ގުޅޭ ގޮތުން ހުށައަޅާ ޝަކުވާތައް ބަލައިގަތުމުގެ އިންތިޒާމު ހަމަޖައްސާފައިވާ ކަމަށް އިލެކްޝަންސް ކޮމިޝަނުން ބުނެފިއެވެ.
ބުދަ ދުވަހު އެ ކޮމިޝަނުން ކުރި އިއުލާނެއްގައި ބުނެފައި ވަނީ އަންނަ މަހު އޭޕްރީލްގައި ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބާ ގުޅޭގޮތުން ހުށަހެޅޭ ޝަކުވާތައް އަތޮޅު ތަކުގެ ނުވަތަ ސިޓީ ކޮމްޕްލައިންޓްސް ބިޔުރޯތަށް މެދުވެރިކޮށް ބަލައިގަތުމުގެ އިންތިޒާމް މިއަދުން ފެށިގެން ހަމަޖެހިފައިވާ ކަމަށެވެ.
އެގޮތުން 10 އޭޕްރީލް ވާ ބުދަ ދުވަހުގެ މެންދުރުފަހު 02:00 އާ ހަމައަށް ޝަކުވާ ބަލައިގަތުމަށް ހަމަޖެހިފައިވާއިރު، ވޯޓުނެގުމަށް ހަމަޖެހިފައިވާ ދުވަހު ޝަކުވާ ބަލައިގަތުމަށް ހަމަޖެހިފައިވަނީ އެދުވަހު ވޯޓު ނަގަން ފެށުނީއްސުރެން ވޯޓު ފޮށިތަކުގެ ވަގުތީ ނަތީޖާ އިޢުލާން ކުރުމާ ހަމައަށް ކަމަށް އިއުލާނުގައި ބަޔާންކޮށްފައިވެއެވެ. އަދި އެކަމަށް ހުށައަޅާ ފޯމު އަތޮޅު ނުވަތަ ސިޓީ ކޮމްޕްލެއިން ބިއުރޯތަކުންނާއި، ކައުންސިލްގެ އިދާރާ އަދި އިލެކްޝަންސް ކޮމިޝަނުން ލިބެން ހުންނާނެ ކަމަށްވެސް އިއުލާނުގައި ބަޔާންކޮށްފައިވެއެވެ.
އޭޕްރީލް މަހުގެ 6 ވަނަ ދުވަހު ބޭއްވުމަށް ހަމަޖެހިފައިވާ މަޖިލީހުގެ އިންތިޚާބުގައި ވޯޓު ލުމުގެ ހައްގު 264،589 މީހުންނަށް ލިބިފައިވެއެވެ. މިފަހަރުގެ އިންތިޚާބުގައި 87 ދާއިރާއަކަށް މެމްބަރުން މަޖިލީހަށް އިންތިޚާބު ކުރާނެއެވެ.
