ހެލްތު ޕްރޮމޯޝަން އެޑްވައިޒަރީ ބޯޑެއް އެކުލަވާލައްވާލައްވައިފި
26 މާރިޗު 2019 | އަންގާރަ 15:54މި ބޯޑުގެ މަގުސަދަކީ އާއްމު ސިއްހަތު ރައްކާތެރިކުރުމުގެ ގޮތުން ހޭލުންތެރިކަން އިތުރުކުރުން
ހެލްތު މިނިސްޓަރު ރައީސް ސޯލިހުއާ އެކު
"ހެލްތު ޕްރޮމޯޝަން އެޑްވައިޒަރީ ބޯޑެއް" ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އެކުލަވާލައްވާފައިވެއެވެ.
ހެލްތު މިނިސްޓްރީން ބުނީ ސަރުކާރުގެ 100 ދުވަހުގެ ވަޢުދުގެ ތެރެއިން، ސިއްހަތު ރަނގަޅު ނޫން ބާވަތްތަކާ މެދު ހޭލުންތެރި ކުރުމަށް ކުރެވޭ ހޭދަ އިތުރު ކުރުމުގެ ވައުދާ ގުޅުވައިގެން އެކުލަވާލި މިބޯޑުގެ މަގުސަދަކީ ރާއްޖޭގެ އެއްމެހާ ފަރުދުންގެ ޢާއްމު ސިއްހަތު ރައްކާތެރިކުރުމުގެ ގޮތުން ހޭލުންތެރިކަން އިތުރުކުރުމަށް ހިންގޭ އެކިއެކި މަސައްކަތްތައް ހަރުދަނާ ގޮތެއްގައި ހިންގުމަށް ބާރުއެޅުން ކަމަށެވެ.
ހެލްތު މިނިސްޓްރީން ބުނީ ގައިން ގަޔަށް ނާރާ ބަލިތަކުން ރައްކާތެރިވުމަށާއި މިފަދަ ބަލިތައް ޖެހޭ މިންވަރު މަދު ކުރުމަށް މިފަދަ ބަލިތަކުގެ ހިރާސްތަކަށް ހުށަހެޅޭ އާދަތައް މަދުކުރުމަށްޓަކައި ކުރަންހުރި ކަންތައްތައް ކުރުމަށް މަގުފަހިކޮށްދިނުމާއި ދުޅަހެޔޮ އާދަތަކަށް ޒުވާނުންނާއި އާންމު ރައްޔިތުން އަހުލުވެރިކުރުމަށް މީޑިއާ އާއި އެހެނިހެން ވަސީލަތަކުގެ ޒަރީއާ އިން ސިއްހީ މެސްޖްތައް ރައްޔިތުންނަށް ފޯރުކޮށްދިނުމުގައި ލަފަޔާއި އިރުޝާދުދޭނެ ކަމަށެވެ.
މީގެ އިތުރުން މިނިސްޓްރީން ބުނީ ބޯޑުގެ ބައްދަލުވުންތައް ފެށިގެން ޤަވާއިދުން ކުރިއަށް ގެންދެވޭއިރު ބޯޑުގެ ލަފައާ އެކު ރަގަޅު މަސައްކަތްތަކެއް ކުރިއަށް ގެންދެވިފައިވާ ކަމަށެވެ.
އެގޮތުން މިނިސްޓްރީ އޮފް ޔޫތު، ސްޕޯރޓްސް އެންޑް ކޮމިއުނިޓީ އެންޕަވަރމެންޓް އިން ކުރިޔަށް ގެންދަވާ ރަށްރަށުގެ ސްޕޯޓްސް ކައުންސިލަރުންގެ ތަމްރީނު ކުރުމުގެ ޕްރޮގްރާމްގައި ސިއްހަތަށް ފައިދާހުރި ކާނާ ކެއުމާއި ކުޅިވަރާއި ކަސްރަތުކުރުމުގެ މުހިންމުކަމުގެ މައުލޫމާތުދީ 200 ސްޕޯރޓްސް ކައުންސިލަރުންނަށް ސެޝަންތަކެއް ކުރިޔަށް ގެންދެވިފައިވާ ކަމަށެވެ. އަދި ސްޕޯރޓްސް ކައުންސިލަރުންގެ ރޯލު އަދާކުރުމުގައި ގެންގުޅެން ޖެހޭނެ އުސޫލުތަކާއި ޝަރުތުތަކާއި ސިއްހީ ކަން ކަމަށް އަހުލުވެރި ބަޔަކަށް ވުމާ ބެހޭ ގޮތުން ވަނީ ތަމްރީނުކުރެވިފައިވާ ކަމަށެވެ.
ހެލްތު މިނިސްޓްރީން ބުނީ މި މަހުގެ 8 ވަނަ ދުވަހު އައި-ރަނާޒްގެ ފަރާތުން ހިންގި އިންޓަރނޭޝަނަލް މެރަތަންއާ ގުޅިގެން ބޭއްވި ފިޓްނަސް އެކްސްޕޯ ފޯރަމްގައި ދުޅަހެޔޮ ޞިއްޙަތެއްގައި ހުރުމަށް ކުރެވިދާނެ ކަންތައްތަކުގެ މައުލޫމާތު އާއްމުންނަށް ފޯރުކޮށްދެވިފައިވާ ކަމަށެވެ. އަދި މި ފޯރަމްގައި ނަފްސާނީ ދުޅަހެޔޮކަމާށާއި، ސިއްހަތަށް ފައިދާހުރި ކާނާކެއުމުމުގެ މުހިއްމުކަމަށް ވަނީ އަލިއަޅުވާލާފައިވާ ކަމަށާއި، ދުންފަތުގެ ނުރައްކަލާއި ދިރިއުޅުމުގެ ވައްޓަފާޅީގެ ސަބަބުން ޖެހޭ އެކިއެކި ބަލިތަކުން ރައްކާތެރިވުމަށް އާއްމުންނަށް މައުލޫމާތު ހިއްސާކޮށްފައިވާ ކަމަށެވެ.
މީގެ އިތުރުން ހެލްތު މިނިސްޓްރީން ބުނީ އާއްމު ސިއްހަތާ ގުޅުންހުރި ޕްރޮގްރާމްތައް ހިންގުމުގައާއި ގަވާއިދުތައް ތަންފީޒު ކުރުމުގައި ދިމާވާ ދަތިތައް ހައްލުކުރުމަށް ކުރެވެމުންދާ މަސައްކަތްތަކުގެ ތެރެއިން ތަންފީޒީ އިދާރާތަކާ އެކު މަޝްވަރާކުރުމަށް ބޯޑުން ނިންމާފައިވާ ކަމަށެވެ.
ސްކޫލް މާހައުލުގައި ޞިއްޙީ އާދަތައް އަށަގެންނެވުމަށް ކުރެވޭނެ ކަންކަމުގެ މައްޗަށް މަޝްވަރާކޮށް ލަފައިދެއްވާފައިވާ ކަމަށާއި، ސިއްހީ މައުލޫމާތުތައް މިހާރަށް ވުރެ އިތުރަށް މީޑިއާތަކުން ގެނެސްދިނުމަށް ބާރުއެޅުމަށްޓަކައި ކަމާބެހޭ ފަރާތްތަކާ ބައްދަލުކުރުމަށް ވެސް ވަނީ ރޭވިފައިވާ ކަމަށް ވެސް މިނިސްޓްރީން މައުލޫމާތުދެއެވެ.
