އަޅުގަނޑުމެންގެ ސިޔާސަތަކީ ރަށް ހިންގުމުގެ ބާރު ކައުންސިލްތަކަށް ދޫކޮށްލުން: ރައީސް ސޯލިހު

ސަރުކާރުގެ ސިޔާސަތަކީ ރަށް ހިންގުމުގެ ޒިންމާ އާއި އެ ޒިންމާ އަދާކުރުމަށް ބޭނުންވާ ބާރުތަކާއި މާލީ ތަނަވަސްކަން ކައުންސިލްތަކަށް ދޫކޮށްލުން ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސޯލިހު ވިދާޚުވެއްޖެއެވެ.

ލޯކަލް ޓުއަރިޒަމަށް އަމާޒުކޮށްގެން ދިވެހިރާއްޖޭގެ ހުރިހާ ރަށްތަކެއްގެ މަޢުލޫމާތު ހިމެނިގެންދާ ވެބްޕޯޓްލްއެއް ޤާއިމްކޮށް އެ ޕޯޓަލް އިފްތިތާޙު ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ، ޖަޒީރާވަންތަ ގޮތެއްގައި ރާއްޖެ ތަރައްޤީ ކުރުމުގެ މަސައްކަތް ކުރަމުންދާއިރު، ރަށްތަކުގެ ފުދުންތެރިކަން އިތުރުކުރަން ޖެހޭ ކަމަށެވެ. އަދި އެކަން ކުރުމަށް ކައުންސިލްތަކަށް ބާރުދީ، ރަށުގެ ކަންކަން ނިންމުގެ ފުރިހަމަ އިޚުތިޔާރާއި ވަޞީލަތްތައް ކައުންސިލްތަކަށް ފޯރުކޮށްދޭންޖެހޭކަން އެމަނިކުފާނު ފާހަގަ ކުރެއްވިއެވެ.

Advertisement

"ހިންގުމާ އެކީގަ މާލީގޮތުން ފުދުންތެރި ކުރުމުގެ މަސައްކަތް ކުރުން އެއީ އަޅުގަނޑުމެންގެ އެއް ސިޔާސަތު. އެގޮތުން ރާއްޖޭގާ ލޯކަލް ޓުއަރިޒަމް ތަރައްޤީވެގެން އަންނައިރުގާ، އެކަން ޕްރޮމޯޓް ކުރުމަށްޓަކާ، ކުރަންޖެހޭ މަސައްކަތްތަކެއް އެބަހުރި. އަޅުގަނޑުމެންގެ ސިޔާސަތަކީ ރަށްރަށް ހިންގުން ކައުންސިލްތަކާ ހަވާލުކުރުން. ބާރުތައް ދޫކޮށްލުން. އެގޮތުން އެރަށުގައި ހިންގާ ވިޔަފާރިތަކާ، އަދި އެނޫންވެސް ވަސީލަތްތައް، ޚިދުމަތްތައް ދިނުމުގެ ބާރު، ފުރުޞަތު ކައުންސިލްތަކަށް ދޫކޮށްލުން. އެގޮތުން މިރޭ މި ހުޅުވުނު ޕޯޓަލް، އައިލެންޑްސް.އެމްވީ، މެދުވެރިކޮށް އެ ރަށަކާބެހޭ މަޢުލޫމާތު ޕްރޮމޯޓްކޮށް، މަޢުލޫމާތުތައް ހިއްސާކުރުމުގެ ބާރު އަޅުގަނޑުމެން މި ދޫކޮށްލަނީ ކައުންސިލްތަކަށް" ރައީސް ސޯލިހު ވިދާޅުވިއެވެ.

ރައީސް ސޯލިހު ވިދާޅުވީ، ހޯމަ ދުވަހުގެރޭ އިފްތިތާހު ކުރެވުނު ޕޯޓަލްއަކީ ހަމައެކަނި ފަތުރުވެރިންނަށް ޚާއްސަ ޕޯޓަލްއެއް ނޫން ކަމަށާއި، މިއީ ދޭދޭ ރަށްރަށުގެ ރައްޔިތުންގެ މެދުގައިވެސް އެކި ރަށްތަކާއި ގުޅޭ މަޢުލޫމާތު އިތުރުކޮށް، އެއްރަށުގެ ރައްޔިތުން އަނެއް ރަށަށް ދަތުރުކުރުމަށް މަގުފަހިކޮށްދޭނެ ޕޯޓަލްއެއް ކަމަށެވެ. އެގޮތުން މި ޕޯޓަލްއިން ރަށްތަކާއި ގުޅޭ ގިނަ މަޢުލޫމާތުތަކެއް ލިބިގެންދިއުމަކީ ދިވެހިރާއްޖެއާއި ގުޅޭގޮތުން ދިވެހިންގެ މަޢުލޫމާތު މުއްސަނދިވެގެން ދާނެ ކަމެއްކަން ރައީސް ފާހަގަކުރެއްވިއެވެ.

މި ޕޯޓަލްގެ ބޭނުން އެންމެ ރަނގަޅު ގޮތުގައި ހުރިހާ ރަށަކުންވެސް ހިފުމަށް ރައީސް ވަނީ ކައުންސިލްތަކުގެ ކިބައިން އެދިވަޑައިގެންފައެވެ.

އައިލެންޑްސް.އެމްވީ، ވެބް ޕޯޓަލަކީ ސަރުކާރުގެ ފުރަތަމަ 100 ދުވަހުގެ ވައުދާއި ގުޅުވައި، ކޮމިއުނިކޭޝަން ސައިންސް އެންޑް ޓެކްނޮލަޖީ މިނިސްޓްރީން ފަރުމާކުރި ވެބް ޕޯޓަލެވެ.

ސަރުކާރުގެ ފުރަތަމަ 100 ދުވަހުގެ ވަދުގައިވާގޮތުން ރަށުގެ ފަތުރުވެރިކަމާއިބެހޭ ކަންކަން ބެލެހެއްޓުމާ، ރަށުން ލިބެން ހުންނަ ހުރިހާ ހިދުމަތެއް އެކުލެވޭ ރަށު ވެބްސައިޓް ބެލެހެއްޓުމާއި، ރަށް މާކެޓްކުރާ ފަރާތަކީ ރަށު ކައުންސިލްގެ އިދާރާ (ރަށު ފްރަންޓް އޮފީސް) ކަމުގައި ކަނޑައެޅޭނެއެވެ. ސަރުކާރުގެ އެ ވައުދާއި ގުޅުވައި، އެ މަސައްކަތް ހަވާލުކުރީ، އަލަށް އުފެއްދި މިނިސްޓްރީ ކަމަށްވާ މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލަޖީ އާއެވެ.

އެ މިނިސްޓްރީން ބުނީ، މީގެކުރިން ރާއްޖެ ޕްރޮމޯޓްކުރަމުން އައި ތިމާވެށީގެ މުއްސަނދިކަން ލިބިފައިވާ، ޤައުމެއްގެ ގޮތުގައި ކަމަށެވެ. ނަމަވެސް އަލަށް ތައާރަފްކުރެވުނު ޕޯޓަލް، އަދި ވެބްސައިޓްތަކާއެކު ރަށްރަށް ޕްރޮމޯޓްވެގެންދާނެ ކަމަށާއި، ރަށުގައި ހުރި ހާއްސަ ކަންކަމާއި، ވަސީލަތްތައް މުޅި ދުނިޔެއަށް ހާމަކުރެވޭނެ ކަމަށެވެ.