އެޖެންޑާ19 އަކީ ރައްޔިތުން ކައިރީ އެހުމަށް ފަހު އެކުލަވާލި ވައުދުތަކެއް: ރައީސް ނަޝީދު
25 މާރިޗު 2019 | ހޯމަ 08:21ވައުދުތަކަކީ ރައްޔިތުން ބޭނުންވާ ކަންތައްތައް
ކުރީގެ ރައީސް ނަޝީދު
ކުރިއަށް އޮތް ރައްޔިތުންގެ މަޖިލީހަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އެކުލަވާލި އެޖެންޑާ19 އަކީ ރައްޔިތުން ކައިރިން އެހުމަށް ފަހު ރައްޔިތުން ބޭނުންވާ ވައުދުތައް ކަމަށް ވެސް ނަޝީދު ވިދާޅުވެއްޖެއެވެ.
އިސްދޫ ދާއިރާއަށް އެމްޑީޕީގެ ޓިކެޓްގައި ވާދަކުރައްވާ ކެންޑިޑޭޓް އައްބާސް ސުލައިމާންގެ ކެންޕެއިނަށް އެރަށަށް ވަޑައިގެން ރައީސް ނަޝީދު ވިދާޅުވީ އެޖެންޑާ19 އަކީ ރާއްޖޭގެ ރައްޔިތުންގެ ހާލަތު ރަނގަޅު ކުރުމަށް އެމްޑީޕީ އިން ހުށައަޅާ ތިންވަނަ މެނިފެސްޓޯ ކަމަށެވެ.
ރައީސް ނަޝީދު ވިދާޅުވީ އެމްޑީޕީގެ އެންމެ މުހިއްމު އަމާޒަކީ ބޯހިޔާވަހިކަން ކަމަށާއި އެޕާޓީ އިން ދެކެނީ ރާއްޖޭގެ ރައްޔިތުންނަށް މިވަގުތު އެންމެ މުހިއްމު ކަމަކީ ބޯހިޔާވަކަން ކަމަށާއި ގޯއްޗެއް އޮތުމަކުން ނުފުދޭ ކަމަށެވެ. ގެދޮރު އިމާރާތް ކުރުމަށް އެތައް އަހަރެއް ވެގެން ދާއިރު އެކަމަށް ހައްލު ބޭނުންވާ ކަމަށް އެމަނިކުފާނު ވިދާޅުވިއެވެ. ރާއްޖޭގައި ގެދޮރުވެރިކަން ނެތި ގާތްގަނޑަކަށް 45،000 މީހުން ތިބިއިރު ގެދޮރު އިމާރާތް ކުރުމަށް ލޯނު ހޯދައިދިނުމަށް ރާއްޖޭގެ ހުރިހާ ރައްޔިތުންނަށް ވެސް އެހީތެރިވެ ވަޑައިގަންނަވާ ކަމަށް ވިދާޅުވިއެވެ.
އިންތިޚާބަށް ކުރިމަތިލަނީ ވައުދުތަކާ އެކުގައި ކަމަށާއި އެވައުދުތައް ފުއްދުމަށް އެމްޑީޕީގެ ކެންޑިޑޭޓުންނަށް މެޖޯރިޓީ ލިބެންޖެހޭ ކަމަށް ތަކުރާރު ކުރެއްވިއެވެ. އަދި އަޣުލަބިއްޔަތު ނެތުމުން ކަންތައްތައް ވެގެންދިޔަ ގޮތް މާޒީން ފެނިގެންދިޔަ ކަމަށާއި އަލުން އެގޮތަށް ވުމަށް ނޭދޭ ކަމަށް ވިދާޅުވިއެވެ.
"މަޖިލީހުގެ އަޣުލަބިއްޔަތު ބޭނުންވަނީ އަޅުގަނޑުމެން ތިބޭފުޅުންނަށް ވެފައިވާ ވައުދުތައް ފުއްދައިދިނުމަށް. އަޣުލަބިއްޔަތު ސަރުކާރަށް ނެތުނީމާ ނިކަމެތިވަނީ. އަގުލަބިއްޔަތު ނެތީމާ މުސްތަގިއްލު މުއައްސަސާތަކާއި ފަނޑިޔާރުގޭގެ އިތުބާރު ގެއްލެނީ،" ރައީސް ނަޝީދު ވިދާޅުވިއެވެ.
އެމްޑީޕީން ބޭނުންވަނީ ރައީސް އިބްރާހިމް މުހައްމަދު ސޯލިހުގެ ވައުދުތައް ފުއްދުމަށް ކަމަށާއި އެ ވައުދުތަކަކީ ރައްޔިތުން ބޭނުންވާ ކަންތައްތައް ކަމަށް އެމަނިކުފާނު ވިދާޅުވިއެވެ.
