ގްލޯބަލް މަނީވީކްގެ ހަރަކާތް ހޯމަ ދުވަހުގެ ހެނދުނު ފަށާނެ ކަމަށް މޯލްޑިވްސް މަނިޓަރީ އޮތޯރިޓީން ބުނެފިއެވެ.

އެ ހަރަކާތް މި އަހަރު ރާއްޖޭގައި ކުލަގަދަ ގޮތެއްގައި ފެށުމަށް ހަމަޖެހިފައިވާއިރު މި ހަރަކާތް ފަށާނީ ހޯމަ ދުވަހުގެ ހެނދުނު 07:20 ގައެވެ.

ގްލޯބަލް މަނީ ވީކްގެ ހަރަކާތްތައް ފެށުމުގެ ގޮތުން ގްލޯބަލް މަނީ ވީކަށް ޚާއްސަކޮށްފައިވާ ފޭސްބުކު ޕޭޖެއް އެމްއެމްއޭގެ ފަރާތުން ވަނީ ލޯންޗުކޮށްފައެވެ.

އެމްއެމްއޭގެ ގަވަރުނަރު އަހުމަދު ނަސީރު ވިދާޅުވީ މި ހަރަކާތުގެ އަމާޒަކީ ޒުވާނުންނާއި ކުޑަކުދިންގެ މެދުގައި އިޤްތިސާދީ ހޭލުންތެރިކަން އިތުރުކުރުމާއި ފައިސާގެ މުހިންމުކަމާއި އިޤްތިސާދު ކުރެވޭނެ ރަނގަޅު ގޮތްތަކާ ގުޅޭ ގޮތުން ހޭލުންތެރިކަން އިތުރުކުރުން ކަމުގައެވެ. ކުޑައިރުއްސުރެ ކުދިންނަށް ފައިސާގެ މުހިއްމު ކަމާއި އިގްތިސާދު ކުރެވޭނެ ރަނގަޅު ގޮތްތައް ކިޔާދޭންޖެހޭ ކަމަށް ގަވަރުނަރު ވިދާޅުވިއެވެ.

ގްލޯބަލް މަނީވީކަކީ ޗިލްޑްރަން އެންޑް ޔޫތް ފައިނޭންސް އިންޓަރނޭޝަނަލުން އިސްނަގައިގެން 2012 ވަނަ އަހަރުން ފެށިގެން ކުރިއަށް ގެންދާ ބައިނަލްއަޤްވާމީ ބޮޑު ކެމްޕޭނެކެވެ.

މި އަހަރު ރާއްޖޭގައި ގްލޯބަލް މަނީ ވީކްގެ ހަރަކާތްތަށް ކުރިއަށްދާނީ އެމްއެމްއޭގެ އިސްނެގުމާ އެކު އެޑިއުކޭޝަން މިނިސްޓްރީ އާއި މާލީ ދާއިރާގެ ފަރާތްތަކާއި ކުންފުނިތަކުގެ ބައިވެރިވުމާ އެކުގައެވެ. މި އަހަރަށް ރޭވިފައިވާ ހަރަކާތްތަކުގެ ތެރޭގައި، ސްކޫލްތަކާ ގުޅިގެން ހިންގާ އެކިއެކި ހަރަކާތްތަކާއި ކުރެހުމުގެ މުބާރާތަކާއި ވީޑިއޯ ސްކިޓް ހެދުން އަދި ޒުވާން ވިޔަފާރިވެރިންނަށް ޚާއްސަކޮށްގެން ވިޔަފާރީގެ ފޯރަމެއް ބޭއްވުން ހިމެނެއެވެ. މީގެ އިތުރުން، ގްލޯބަލް މަނީ ވީކްގެ ހަރަކާތްތައް ނިންމާލުމަށް ހަމަޖެހިފައި ވަނީ ކުޑަކުދިންގެ ހަވީރަކުންނެވެ.

ގްލޯބަލް މަނީ ވީކްގެ ރާއްޖޭގެ ހަރަކާތްތައް "ގްލޯބަލް މަނީ ވީކް މޯލްޑިވްސް" ފޭސްބުކް ޕޭޖުން ފެންނާނެއެވެ.  މި ޕޭޖްގައި ވަނީ 'ލައިކް ޝެއާ އެންޑް ވިން' ޕްރޮމޯޝަނެއް ފަށާފައެވެ. މި ޕްރޮމޯޝަނުގައި ބައިވެރިވާ ފަރާތްތަކުގެ ތެރެއިން ކޮންމެ ހަފްތާއަކު ގުރުއަތުން ހޮވޭ ފަރާތަކަށް 5000ރ ގެ ހަނދާނީ ނޫޓެއް ދިނުމަށް އެމްއެމްއޭ އިން ނިންމާފައެވެ.