ރާއްޖެއިން ބޭރުން މަތީ ތައުލީމް ހާސިލްކުރުމުގެ ގޮތުން ދޫކުރާ ލޯންތަކަށް ކުރިމަތިލުމުގެ ފުރުސަތު ހުޅުވާލައިފިއެވެ. 

ހަޔަރ އެޑިޔުކޭޝަނުން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ހަޔަރ އެޑިޔުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވީ ބުރާސްފަތި ދުވަހު އިއުލާންކުރި ލޯން ސްކީމްގެ ދަށުން 242 ފުރުސަތު މިހާރު ހުޅުވާލާފައިވާ ކަމަށާއި، އެއީ 54 މިލިޔަން ރުފިޔާގެ ލޯން ސްކީމްގެ އެހީ ކަމަށެވެ.

މިނިސްޓަރ ވިދާޅުވީ ބުރާސްފަތި ދުވަހު އިއުލާންކުރި ލޯން ސްކީމާއި، ކުރިން ޑިޕާޓްމަންޓް އޮފް ހަޔަރ އެޑިޔުކޭޝަނުން ހުޅުވާލި ލޯން ސްކީމާ ދެމެދު ބޮޑެތި ތަފާތުތަކެއް އެބަހުރި ކަމަށެވެ.

މިނިސްޓަރ ވިދާޅުވީ މިހާރު އިއުލާންކުރި ލޯން ފުރުސަތުގެ ތެރޭގައި އެ ދަރިވަރަކު މަތީ ތައުލީމް ހާސިލްކުރަން ބޭނުންވާ ކޮންމެ ދާއިރާއަކުން މަތީ ތައުލީމް ހާސިލްކުރުމަށް ވަކި އަދަދެއްގެ ފުރުސަތު މި ފަހަރުގެ ލޯން ސްކީމްގެ ދަށުން ހުޅުވާލާފައިވާ ކަމަށެވެ. އެކަމަކު އެއީ ރާއްޖޭގައި މި ވަގުތު މަތީ ތައުލީމް ހާސިލްކުރެވެން ނެތް ދާއިރާތައް ކަން މިނިސްޓަރ ފާހަގަކުރެއްވިއެވެ.

"ކުރީގައި ވެއްޖިއްޔާ އަޅުގަނޑުމެން ފުރުސަތުދެނީ ހަމައެކަނި ފާހަގަކުރެވޭ ވަކި ދާއިރާތަކެއް ހިމެނޭ ދާއިރާތަކުން އެކަނި. ނަމަވެސް މި ވަގުތު ސަރުކާރުން ނިންމީ ބޭނުންވާ ހުރިހާ ދާއިރާތަކަކުން ވެސް މަތީ ތައުލީމް ހާސިލްކުރުމުގެ ފުރުސަތު ދިނުމަށް،" މިނިސްޓަރ ވިދާޅުވިއެވެ.

މި ފަހަރު ހުޅުވާލި  ލޯން ފުރުސަތުގެ ތެރޭގައި ރާއްޖެއިން ބޭރުން ޕީއެޗްޑީއަށް ކިޔެވުމުގެ ފުރުސަތު ހުޅުވާލާފައިވާ ކަމަށް މިނިސްޓަރ ވިދާޅުވިއެވެ. އެއީ މި ވަގުތު ރާއްޖެއަށް ބޭނުންތެރި ދާއިރާތައް ކަމަށް ފާހަގަކުރެވިފައިވާ ދާއިރާތަކުން ކަމަށް މިނިސްޓަރ ވިދާޅުވިއެވެ. އޭގެ ތެރޭގައި ސައިކޮލިޖީ، އޮކިއުޕޭޝަނަލް ތެރަޕީ،ސްޕެޝަލް އެޑިޔުކޭޝަން، ސްޕީޗް ތެރަޕީ،ސްޕޯޓްސް މެނޭޖްމަންޓް، ރިނިއުބެލް ގްރީން އޭނާރޖީ، ކަލްޗަރ އެންޑް ހެރިޓޭޖް ދާއިރާ ހިމެނެއެވެ.

ކުރިއާ ޚިލާފަށް މިހާރު ރާއްޖެއިން ބޭރުގައި ކިޔަވަމުންދާ ދަރިވަރުންނަށް ކިޔެވުމުގެ ފުރުސަތު ފުރިހަމަކުރުމަށްޓަކައި މި ލޯން ސްކީމްއިން ފުރުސަތު ލިބިގެންދާނެ ކަމަށް ވެސް މިނިސްޓަރ ވިދާޅުވިއެވެ. އަދި މިހާރު ކިޔަވަމުންދާ ދަރިވަރުންގެ ތެރޭގައި ރާއްޖޭގައި މިހާރު ހެދޭ ކޯސްތައް ހަދާ ދަރިވަރުން ކަމަށް ވިޔަސް އެ ފަރާތްތަކަށް ވެސް ލޯނަށް އެދުމުގެ ފުރުސަތު އޮންނާނެ ކަމަށް މިނިސްޓަރު ވިދާޅުވިއެވެ. 

"މި ފަހަރު ލޯނަށް އެދޭއިރު ކިޔެވުމުގެ 50 ޕަސެންޓް ފުރިހަމަވާކަށް ނުޖެހޭ. އަލަށް ކިޔަވަން ފައްޓާ ދަރިވަރަކަށް ވެސް އޭނާ އަށް ފާއިސާގެ ދަތިކަން ކުރިމަތިވެފައިވާ ނަމަ، މި ލޯން ސްކީމުން އަޅުގަނޑުމެން މާލީ އެހީތެރިކަން ފޯރުކޮށްދޭނަން،" މިނިސްޓަރ ވިދާޅުވިއެވެ.

ލޯނަށް އެދުމުގެ ފުރުސަތު ވަނީ އޮންލައިންކޮށް ހުޅުވާލާފައެވެ.