ޕީއެސްޖީއާއެކު ހަދާފައިވާ އެއްބަސްވުން އާކުރަން އަލްވޭސް ނިންމައިފި

ޕެރިސް ސެއިންޓް ޖާމަން (ޕީއެސްޖީ) އާއެކު ހަދާފައިވާ އެއްބަސްވުން އާކުރަން އެ ކްލަބަށް ކުޅެމުން އަންނަ ބްރެޒިލްގެ ޑިފެންޑަރ ޑެނީ އަލްވޭސް ނިންމައިފި ކަމަށް ރިޕޯޓްތައް ބުނެފިއެވެ.

މި ސީޒަނަށްފަހު ޕީއެސްޖީއާއެކު އަލްވޭސް ހަދާފައިވާ އެއްބަސްވުން ހަމަވާއިރު، ރިޕޯޓްތައް ބުނާގޮތުން އޭނާ އެއްބަސްވުން އާކުރީ ކުރިޔަށް އޮތް ސީޒަން ނިމެންދެންނެވެ.

ބައެއް ރިޕޯޓްތައް ބުނާގޮތުން އަލްވޭސް ވަނީ ޕީއެސްޖީއާއެކު އާ އެއްބަސްވުމުގައި ސޮއިވެސް ކޮށްފައެވެ. ނަމަވެސް މިކަން އަދި ކަށަވަރުވާގޮތެއް ނުވެއެވެ.

ޕީއެސްޖީއާއެކު އަލްވޭސް ހަދާފައިވާ އެއްބަސްވުން އާކުރި ކަމަށް ރިޕޯޓްތައް ބުނަމުން އަންނައިރު، ޕީއެސްޖީން އާ އެއްބަސްވުމާ ގުޅޭގޮތުން އޭނާއާ މަޝްވަރާކުރި ކަމަށްވެސް އަޑުތައް އަންނަނީ ފެތުރެމުންނެވެ.

ސެވިއްޔާ އިން 2008 ވަނަ އަހަރު ބާސާއަށް ބަދަލުވި މިހާރު އުމުރުން 35 އަހަރުގެ ޑެނީ އަލްވޭސް ވަނީ އެޓީމުގައި ހޭދަކުރި 8 ސީޒަނުގައި ކުޅުނު 391 މެޗުގައި 21 ލަނޑު ކާމިޔާބުކޮށްފަ އެވެ.

މީގެ އިތުރުން އޭނާ ވަނީ އެޓީމާއެކު ސްޕެނިޝް ލަލީގާ ހަ ފަހަރު، ހަތަރު ކޮޕާޑެލްރޭ، ތިން ސްޕެނިޝް ސުޕާކަޕް، ތިން ޔުއެފާ ޗެމްޕިއަންސް ލީގު، ތިން ޔުއެފާ ސުޕާ ކަޕް އަދި ތިން ފީފާ ކްލަބް ވޯލްޑްކަޕް ކާމިޔާބުކޮށްފަ އެވެ.

ބްރެޒިލް ގައުމީ ޓީމާއެކު ފީފާ ކޮންފެޑެރޭޝަންސް ކަޕް ދެފަހަރު ކާމިޔާބުކޮށްފައިވާ އަލްވޭސް ޔުވަންޓަސް އަށް ބަދަލުވީ 2016 ވަނަ އަހަރެވެ. އެގޮތުން އޭނާ ވަނީ އެޓީމަށް ކުޅުނު 33 މެޗުގައި ހަ ލަނޑު ކާމިޔާބުކޮށްފަ އެވެ.

ޔުވަންޓަސް ދޫކޮށް 2017 އަހަރު އަލްވޭސް ބަދަލުވީ ޕީއެސްޖީ އަށެވެ. އޭނާ ވަނީ މިހާތަނަށް އެޓީމަށް ކުޅުނު 60 މެޗުގައި ފަސް ލަނޑު ކާމިޔާބުކޮށްފަ އެވެ. އަދި އަލްވޭސް ވަނީ މިހާތަނަށް ޕީއެސްޖީއާއެކު ފްރެންޗް ލީގު، ފްރެންޗް ކަޕް އަދި ފްރެންޗް ސުޕަކަޕް ކާމިޔާބުކޮށްފައެވެ.