ޑެނީ އަލްވޭސް ހޯދުމަށް ފެނަބާޗޭއިން މަސައްކަތް ނުކުރާކަމަށް އެ ކްލަބުން ބުނެފި

ޔުވަންޓަސްއަށް ކުޅެމުން އަންނަ ބްރެޒިލްގެ ޑިފެންޑަރު ޑެނީ އަލްވޭސް ހޯދުމަށް ތުރުކީގެ ފެނަބާޗޭއިން މަސައްކަތްނުކުރާކަމަށް އެ ކްލަބުން ބުނެފިއެވެ.

ފެނަބާޗޭއިން ޑެނީ އަލްވޭސް ހޯދުމަށް މަސައްކަތްކުރާ ކަމަށް ބުނެ ފެތުރެމުންދާ ރިޕޯޓްތައް ދޮގުކުރަމުން އެ ކްލަބުން ނެރުނު ސްޓޭޓްމަންޓެއްގައި ބުނީ ފެނަބާޗޭގެ އެއްވެސް ޝައުގުވެރިކަމެއް ޑެނީ އަލްވޭސަށް ނެތް ކަމަށެވެ.

ދާދި ފަހުން ޑެނީ އަލްވޭސް ޔުވަންޓަސް ދޫކޮށްލާފައިވާއިރު، އޭނާ ހޯދުމަށް އެމެރިކާ، ޖަރުމަން އަދި ޕްރިމިއާ ލީގުގެ ކްލަބްތަކުންވެސް އަންނަނީ މަސައްކަތްކުރަމުންނެވެ. އެގޮތުން ރިޕޯޓްތައް ބުނާގޮތުން އޭނާ ބަދަލުވާނެކަމަށް އެންމެ ބޮޑަށް ބެލެވެނީ މެންޗެސްޓާ ސިޓީއަށެވެ.

އަލްވޭޒް ހޯދުމަށް ސިޓީގެ އިތުރުން ޗެލްސީންވެސް އަންނަނީ މަސައްކަތްކުރަމުންނެވެ. އެގޮތުން އޭނާއަކީ ޗެލްސީގެ ކޯޗު އެންޓޯނިއޯ ކޮންޓޭއަށް ވަރަށް ކަމުދާ ކުޅުންތެރިއެއް ކަމަށް ރިޕޯޓްތައް ބުނެއެވެ.

އަލްވޭޒް ވަނީ ބާސާ ދޫކޮށްލުމަށް ފަހު ބާސާއަށް ބަދަލުވެ އެ ކްލަބުގައި މޮޅު ކުޅުމެއް ދައްކާފައެވެ. އެގޮތުން އޭނާ ވަނީ މި ސީޒަނުގައި އެޓީމަށް ލީގު ތަށި އަދި އިޓާލިއަން ކަޕް ކާމިޔާބުކޮށްދިނުމަށްވެސް މުހިންމު ދައުރެއް އަދާކޮށްފައެވެ. މީގެ އިތުރުން އޭނާ ވަނީ ޗެމްޕިއަންސް ލީގު ފައިނަލަށްވެސް އެޓީމު ގެންގޮސްދިނުމަށް މުހިންމު ދައުރެއް އަދާކޮށްފައެވެ.

ސެވިއްޔާއިން 2008 ވަނަ އަހަރު ބާސާއަށް ބަދަލުވި މިހާރު އުމުރުން 33 އަހަރުގެ ޑެނީ އަލްވޭޒް ވަނީ އެޓީމުގައި ހޭދަކުރި އަށް ސީޒަނުގައި ކުޅުނު 391 މެޗުގައި 21 ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އެޓީމާއެކު ސްޕެނިޝް ލަލީގާ ހަ ފަހަރު، ހަތަރު ކޮޕާޑެލްރޭ، ތިން ސްޕެނިޝް ސުޕާކަޕް، ތިން ޔުއެފާ ޗެމްޕިއަންސް ލީގު، ތިން ޔުއެފާ ސުޕާ ކަޕް އަދި ތިން ފީފާ ކްލަބް ވޯލްޑްކަޕް ކާމިޔާބުކޮށްފައެވެ.

ބްރެޒިލް ގައުމީ ޓީމާއެކު ފީފާ ކޮންފެޑެރޭޝަންސް ކަޕް ދެފަހަރު ކާމިޔާބުކޮށްފައިވާ އަލްވޭޒް ޔުވަންޓަސްއަށް ބަދަލުވީ މިދިޔަ އަހަރެވެ. މިހާތަނަށް އޭނާ ވަނީ އެޓީމަށް ކުޅުނު 32 މެޗުގައި ހަ ލަނޑު ކާމިޔާބުކޮށްފައެވެ.