ފްލެޓް ދޭކަށް ނުގުޅަން، ދައުވަތު ދިނީ ބައްދަލުވުމަކަށް: އެމްޑީޕީ
20 މާރިޗު 2019 | ބުދަ 05:20ދައުވަތު ދީފައިވަނީ ''ވެށިފަހި މާލެ'' ޕްރޮގްރާމާ ބެހޭ ގޮތުން މައުލޫމާތު ދޭން: އަފްޝަން
ކުރީ ސަރުކާރުން އިއުލާންކުރި ފްލެޓްތަކަށް ކުރިމަތިލާފައިވާ ފަރާތްތަކުން ކިޔުގައި ޖެހިގެން
މީހުންނަށް ފްލެޓް ދޭނެ ކަމަށް ބުނެ އެމްޑީޕީން ނުގުޅާ ކަމަށާއި، އެކަމަކު ބުދަ ދުވަހުގެ ރޭ އޮތް ބައްދަލުވުމަކަށް ދައުވާތު ދީފައިވާނެ ކަަމަށް އެމްޑީޕީގެ ސްޕޯކްސް ޕާސަން އަފްޝަން ލަތީފް ވިދާޅުވެއްޖެއެވެ.
''ވެށި ފެހި މާލެ'' ޕްރޮގްރާމްގައި ބައިވެރިވި ފަރާތްތަކަށް ބުދަ ދުވަހުގެރޭ ގޯތި ދޭނެ ކަމަށް ބުނެ އެމްޑީޕީގެ ކެންޑިޑޭޓުން ބައެއް ފަރާތްތަކަށް ގުޅަމުންދާ ކަމަށް ރާއްޖޭގެ މީޑިއާތަކުގައި ރިޕޯޓް ކޮށްފައިވާތީ އެކަމާ ގުޅޭ ގޮތުން ރާއްޖެއެމްވީ އަށް މައުލޫމާތު ދެއްވަމުން އަފްޝަން ވިދާޅުވީ، ފްލެޓް ދޭނެ ކަމަށް އެމްޑީޕީގެ އެއްވެސް ކެންޑިޑޭޓެއް ނުވަތަ އެ ޕާޓީގެ އެއްްވެސް ފަރާތްތަކުން ގުޅާފައި ނުވާނެ ކަމަށެވެ.
އެހެން ނަމަވެސް ވެށިފަހި މާލެ ޕްރޮގްރާމާ ބެހޭ ގޮތުން މައުލޫމާތު ދިނުމުގެ ބައްދަލުވުމަކަށް ދައުވަތު ދީފައިވާ ކަމަށް އަފްޝަން ވަނީ ވިދާޅުވެފައެވެ.
''މާދަމާ ރޭ (ބުދަ ދުވަހު) ކާނިވަލް ސަރަހައްދުގައި ނުވައެއް ޖަހާއިރު ވެށި ފަހި މާލޭ ޕްރޮގްރާމްގެ ދަށުން އެޖެންޑާ 19ގެ ދަށުން ކުރިޔަށްގެންދާނެ ގޮތުގެ މައުލޫމާތު ރައީސް ނަޝީދާއި މާލެ މޭޔަރު ޝިފާ މުހައްމަދު ދެއްވާނެ،''
މި ސެޝަންގައި ''ވެށިފަހި މާލެ'' ޕްރޮގްރާމްގައި ބައިވެރިވެފައިވާ ފަރާތްތަކަށް ވަރަށް މުހިއްމު މައުލޫމާތުތަކެއް ލިބިގެންދާނެ ކަމަށާއި، ވީހާ ވެސް ގިނަ ބަޔަކު ބައިވެރިވުމަކީ އެމްޑީޕީގެ ވަރަށް ބޮޑު އެދުމެކެވެ.
ބޯހިޔާވަހިކަމުގެ މައްސަލައަށް ހައްލެއް ގެންނާނެ ކަމަށް އެމްޑީޕީގެ އެޖެންޑާ 19 ގައި މުހިއްމު ސިޔާސަތުތަކެއް ކަނޑައަޅާފައިވާއިރު، މާލޭގެ ގޯތި ގެދޮރު ނެތް ހުރިހާ ފަރާތްތަކަށް ވެރިކަމުގެ ތެރޭގައި ބޯހިޔާވަހިކަން ފޯރުކޮށްދޭނެ ކަމަށް ސަރުކާރުން ވައުދުވެފައިވާނެ ކަމަށާއި، މާލެއަށް ޚާއްސަކޮށް، އަދި މާލޭގައި ދިރިއުޅޭ ރައްޔިތުންގެ ތެރެއިން ގޯތިގެދޮރު ނެތް ރައްޔިތުންނަށް ޚާއްސަކޮށްގެން ބޮޑު ހައުސިންގް ޕްރޮޖެކްޓެއް ދާދި އަވަހަށް އިއުލާނު ކުރެވިގެންދާނެ ކަމަށް ރައީސް ސޯލިހު ވެސް ވިދާޅުވެފައިވެއެވެ. އަދި އޭގެ އިތުރުން އެޖެންޑާ 19ގެ ދަށުން މާލޭގެ ކޮންމެ ރައްޔިތަކަށް ގޯއްޗެއް ލިބިގެންދާނެ ކަމަށް ރައީސް ނަޝީދު ވެސް ވަނީ ވިދާޅުވެފައެވެ.
