ނިއުޒިލެންޑް މުސްލިމުންނާ އެކު ތިބިކަން ހާމަ ކުރުމުން، ސިފައިންނަށް ތައުރީފު!
19 މާރިޗު 2019 | އަންގާރަ 12:01ސިލްވަރ ފާރން ފްލެގަކީ ނިއުޒިލެންޑުގެ ރަމްޒީ ނިޝާނެއް
ނިއުޒިލޭންޑް ހަމަލާގައި މަރާލި މ،ުސްލިމުންގެ ހަނދާނުގައި އެމްއެންޑީއެފުން ބެހެއްޓި ލެޑް ބޯޑް
ހުކުރު ދުވަހު ނިއުޒިލޭންޑްގެ ކްރައިސްޓްްޗަރޗްގެ ދެ މިސްކިތަކަށް ދިން ބަޑީގެ ހަމަލާގައި ނިޔާވި މީހުންގެ ހަނދާނުގައި ޚާއްސަކުރި އެމްއެންޑީއެފްގެ ލެޑްވޯލްއަށް އާއްމުން ތައުރީފު "ބަންޑުން"ކޮށްފިއެވެ.
މާލޭގެ މަލަމަތީގައި ހުންނަ ބަންޑާރަކޮށީގެ އާއިމާރާތުގެ ފާރުގައި ހުންނަ ލެޑް ބޯޑަށްވެސް "ސިލްވާ ފާން ނިޝާން" އެރުވީ ހޯމަ ދުވަހުއެވެ.
ކަޅުފޮތިގަނޑެއްގައި ރިހިކުލައިގެ ފަތެއް ކުރަހާފައިވާއިރު، އޭގެ ދަށުގައި إِنَّا لِلّهِ وَإِنَّـا إِلَيْهِ رَاجِعُونَ އަރަބި ބަހުން ލިޔެފައި އޮތެވެ.
ލެޑް ބޯޑުގެ ފޮޓޯއަކާ އެކު، ނޭޝަނަލް ކައުންޓަ ޓެރަރިޒަމް ސެންޓަރުން ކޮށްފައިވާ ޓްވީޓެއްގައި ބުނެފައި ވަނީ، ޓެރެރިޒަމަކީ ދީނެއް، ކުލައެއް އަދި ގައުމެއްވާ އެއްޗެއް ނޫން ކަަމަށެވެ. އަދި ރާއްޖެ އޮތީ އެ ހަމަލާގައި މަރާލެވުނު މީހުންނާ އެކުގައިކަމަށެވެ.
ނިއުޒިލޭންޑްގެ ކްރައިސްޓްްޗަރޗްގެ ދެ މިސްކިތަކަށް ދިން ބަޑީގެ ހަމަލާގައި ނިޔާވި މީހުންގެ ހަނދާނުގައި ބެހެއްޓި މި ބޯޑާއި ގުޅިގެން ޓްވިޓާގައި ޝުއޫރު ފާޅުކުރި މީހުން ބުނެފައި ވަނީ، މީ ޓެރެރިޒަމާއި ދެކޮޅަށް ރާއްޖެ ދެއްކި ރީތި މިސާލެއް ކަމަށެވެ. އަދި އަބަދުވެސް ފެންނާނެހެން އެ ބޯޑް ނުނަގާ ބެހެއްޓުމަށް އެދޭކަމަށް ބައެއް މީހުން ބުނެފައިވެއެވެ. އަދި ރާއްޖެއިން އަބަދުވެސް ޓެރެރިޒަމާއި ދެކޮޅުކަން ހާމަކޮށް ދުނިޔޭގެ ގައުމުތަކާއި ގުޅިގެން މަސައްކަތްކުރާނެކަމަށް އުއްމީދުކުރާކަމަށް ބައެއް މީހުން ޚިޔާލު ފާޅުކޮށްފައިވެއެވެ.
ރިހި ފަތެއްގެ ރަމްޒުކޮށްދޭ ނިއުޒިލޭންޑްގެ "ސިލްވަރ ފާރން ފްލެގް" އަކީ އެ ގައުމުގެ ރަމްޒީ ނިޝާނެކެވެ. އަދި ނުރަސްމީ ގައުމީ ނިޝާންގެ ގޮތުގައި "ސިލްވަރ ފާރން ފްލެގް" ބޭނުންކުރެއެވެ. މީގެ އިތުރުން އެގައުމުގެ ސިފައިންގެ ހަރަކާތްތަކުގައްޔާއި، ކުޅިވަރުގެ ހަރަކާތްތަކުގައި މި ނިޝާން ބޭނުންކުރަމުން ދެއެވެ.
