ނަޒާހަތްތެރި މަޖިލީހެއް ބޭނުންނަމަ، ލިސްޓުގެ ކުރީގައި އޮންނަން ޖެހޭނީ އިންތި: ރައީސް
18 މާރިޗު 2019 | ހޯމަ 18:19ފުރިހަމަ ތާއިދާއި އިތުބާރު އިންތިއަށް އެބަ އޮތް: ރައީސް
އިންތި ކެމްޕެއިން އިފްތިތާހު ކުރުމުގެ ހަފްލާއަށް ރައީސް ވަޑައިގެންނެވުމުން މަރުހަބާ ވިދާޅުވަނީ
ނަޒާހަތްތެރި މަޖިލީހެއް ބޭނުންވާނަމަ، ލިސްޓުގެ ކުރީގައި އޮންނަން ޖެހޭނީ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ (އިންތި)ގެ ނަން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އިންތިގެ ކެމްޕެއިން އިފްތިތާހު ކުރުމަށް ހޯމަ ދުވަހުގެ ރޭ އަމީނިއްޔާ ސްކޫލުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވަނީ އެމަނިކުފާނުގެ ސިޔާސީ ހަޔާތުގައި ދޫކޮށް ނުލެވޭނެ ބޭފުޅުންގެ ނަންތައް ވިދާޅުވެ ދެއްވާފައެވެ. އެގޮތުން އިންތިއަކީ އެމަނިކުފާނުގެ ސިޔާސީ މަސައްކަތުގައި ދޫކޮށްނުލެވޭނެ އެއް ބޭފުޅެއް ކަމަށާއި ސިޔާސީ ހަޔާތް ނިންމަވާލައްވާނީ ވެސް އެބޭފުޅުންނާ އެކުގައި ކަމަށް ރައީސް ވިދާޅުވިއެވެ.
"...އޭގެ ތެރެއިން އެއް ބޭފުލަކީ އިމްތިޔާޒު ފަހުމީ. ޝިފާޒު މި އިންނެވީ. ޖަލްސާ ތައާރަފް ކުރެއްވި އަންވަރަކީ ދުވަހަކު ވެސް އަޅުގަނޑުގެ ސިޔާސީ މަސައްކަތުގައި ހަނދާން ނައްތާލާނެ ބޭފުޅެއް ނޫން. އިލްޔާސް ލަބީބު، ސާބެ، ހަސަން ލަތީފު، މި ބޭފުޅުންނަކީ އަޅުގަނޑުގެ ސިޔާސީ ހަޔާތުގައި ދޫކޮށްލެވޭނެ ބޭފުޅުންނެއް ނޫން،" ރައީސް ސޯލިހު ވިދާޅުވިއެވެ.
ރައީސް ނަޝީދު ޖަލަށްލުމާ އެކު، އެމްޑީޕީން ވޭތުކުރި ހަތަރު އަހަރަކީ އުނދަގޫ އަހަރުތަކެއް ކަން ފާހަގަ ކުރައްވައި ރައީސް ސޯލިހު ވިދާޅުވީ އެ ދުވަސްތަކުގައި ޖެހިލުމެއް ނެތި، ކޮންމެ ކަމެއް ކުރެއްވުމުގައި ހުންނެވީ އިންތި ކަމަށެވެ. ނަޒާހަތްތެރި މަޖިލީހެއް ބޭނުންނަމަ، އެ ލިސްޓުގައި އެންމެ ފުރަތަމަ އޮންނަން ޖެހޭނީ އިންތިގެ ނަން ކަމަށާއި އިންތިގެ ނަޒާހަތްތެރިކަމާ މެދު ޝައްކެތް ނެތް ކަމަށް ރައީސް ވިދާޅުވިއެވެ.
"ނަޒާހަތްތެރި މަޖިލީހެއް އަޅުގަނޑުމެން ބޭނުންވާ ކަމަށް ވަންޏާ، ލިސްޓުގެ ކުރީގައި ނަން އޮންނަންޖެހޭނީ އިމްތިޔާޒު ފަހުމީ. އެއީ ޝައްކެތް އޮތް ކަމެއް ނޫން. އެ ސަބަބުތަކަށްޓަކާ އަޅުގަނޑުގެ ފުރިހަމަ ތާއިދާއި ފުރިހަމަ އިތުބާރު އޮތް ވާހަކަ ދަންނަވަން. އަޅުގަނޑުގެ ވެރިކަމުގެ ދައުރުގައި ކޮންމެހެން އިންނަން ބޭނުންވާ އެއް ބޭފުޅެއް އިންތިއަކީ،" ރައީސް ސޯލިހު ވިދާޅުވިއެވެ.
އެންމެ ފަހުން ބޭއްވި ރައްޔިތުންގެ މަޖިލީހުގެ އިންތިހާބުގައި އެންމެ ބޮޑު އަގުލަބިއްޔަތެއް ހޯއްދަވައިގެން، މާލޭގެ ގޮނޑިއަކަށް އިންތިހާބުވެވަޑައިގެންނެވި މެމްބަރަކީ އިންތިއެވެ. ދެހާސްސާދަ ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބުގައި 63 ޕަސެންޓް ހޯއްދަވައި، ގޮނޑި ކާމިޔާބު ކުރެއްވި އިންތިއާ ދެކޮޅަށް މިފަހަރުގެ އިންތިހާބުގައި ވާދަ ކުރައްވަނީ އަމިއްލަ ދެ ކެންޑިޑޭޓުންނެވެ.
