މަޖިލީހުން މިހާރު ނިންމާ ނިންމުންތަކަކީ ސަރުކާރަށް ބިރުދެއްކުމަށް ނިންމާ ނިންމުންތަކެއް: އަސްލަމް
18 މާރިޗު 2019 | ހޯމަ 10:22ޖުމްހޫރީ ޕާޓީން، ސާފު ނިންމުމެއް ނިންމަންޖެހޭ
ނޫސްވެރިންގެ ބައްދަލުވުމުގައި އަސްލަމް ވާހަކަދައްކަވަނީ
މިހާރު ރައްޔިތުންގެ މަޖިލީހުގެ ތެރެއިިން ކުރާ ކަންތައްތަކަކީ ސަރުކާރަށް ބިރުދައްކައި، ސަރުކާރަށް ޕްރެޝަރުކުރުމުގެ ގޮތުން ކުރާ ކަންތައްތަކެއް ކަމަށް އެމްޑީޕީ ޕާލިމެންޓްރީ ގުރޫޕްގެ ލީޑަރު މުހައްމަދު އަސްލަމް ވިދާޅުވެއްޖެ އެވެ.
މަޖިލީސް އިދާރާ ސަރަހައްދުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އަސްލަމް ވިދާޅުވީ މަޖިލީހުގައި މުހިންމު ގިނަ މަސައްކަތްތަކެއް ނުނިމި އެބަ ހުރިކަމަށެވެ. އެގޮތުން ކޮމިޝަންތަކަށް ބާރު ދިނުމުގެ ބިލާއި، ޤާނޫނީ ހިދުމަތުގެ ބިލްގެ މަސައްކަތް ނުނިމި، މަޖިލީހުގައި ތާށިކުރުވާފައިވާކަން އަސްލަމް ފާހަގަކުރެއްވިި އެވެ. ނަމަވެސް އެ މަސައްކަތްތައް ނުކޮށް، ރައްޔިތުންގެ މަޖިލީހުގެ ގަވައިދަށް ބަދަލުތައް ގެންނާތީވެ އަސްލަމް ވަނީ ކަންބޮޑުވުން ފާޅުކޮށްފަ އެވެ.
އަސްލަމް ވިދާޅުވީ މަޖިލީހުގެ ގަވައިދަށް ބަދަލު ގެންނަނީ ދަތިކުރުމަށް ކަމަށާއި، ސަރުކާރު ހިންގުމަށް ހުރަސްތައް އެޅުމުގެ ގޮތުން ކަމަށެވެ. އެގޮތުން ވަޒީރުންގެ އިތުބާރު ނެތްކަމުގެ މައްސަލަ ކުރިއަށްގެންދާނެ ގޮތަކާއި ގުޅޭގޮތުން ގަވައިދަށް ގެނައުމަށް މަސައްކަތްކުރާ ބަދަލާއި، މަޖިލީހުގެ ގަވައިދުގެ 71 ވަނަ މާއްދާއަށް ގެނައި ބަދަލު އަސްލަމް ފާހަގަކުރެއްވި އެވެ. އޭގެތެރެއިން މަޖިލީހުގެ ގަވައިދުގެ 71 ވަނަ މާއްދާއަށް ގެނައި އިސްލާހްގެ ސަބަބުން މަޖިލީހުގެ މެޖޯރިޓީ ލިބޭގޮތަކަށް ދައުލަތުގެ ކޮންމެ ހަރަދެއް ވެސް ބަދަލުކުރުމުގެ ފުރުސަތު ލިބިގެންދާ ކަމަށް އަސްލަމް ވިދާޅުވި އެވެ.
"އެނގިވަޑައިގަންނަވާނެ ޤާނޫނު އަސާސީން ދައުލަތުގެ މައިގަނޑު ސިޔާސަތުތައް ކަނޑައެޅުމަށް ރައީސުލްޖުމްހޫރިއްޔާއަށް ބާރުދީފައިވާއިރު، ސަރުކާރެއްގެ އެންމެ މުހިންމު އެއް މަޤްސަދު ހަރުދަނާ ފިޒްކަލް ޕޮލިސީއެއް ޤާއިމްކުރުމަކީ. އެގޮތުން ސަރުކާރުން ކަނޑައަޅާ ސިޔާސަތުތަކާއި ފުށުއަރާގޮތަށް މަޖިލީހުން ކަންކަން ބަދަލުވާގޮތަށް. މަޖިލީހުން ހަރަދުތައް ބަދަލުވާގޮތަށް އޮތުމަކީ އެއީ އަޅުގަނޑުމެން ކަންބޮޑުވާކަމެއް"
އަސްލަމް ވިދާޅުވީ ކަނޑައެޅިގެން ސަރުކާރަށް ދަތިކުރުމަށް، ސަރުކާރު ޕްރެޝަރަށް ގެނައުމަށް، ސަރުކާރަށް ބިރުދެއްކުމަށް ރާވައިގެން ބައެއްކަންކަން ކުރަމުންގެންދާ ކަމަށެވެ. އަދި ޖޮއިންޓް ޕާލިމެންޓްރީ ގުރޫޕެއްގައި މަސައްކަތްކުރާއިރު، މަޝްވަރާކޮށްގެން ކަންކަން ނިންމުމުގެ ފުރުސަތު އެއްވެސް ވަރަކަށް ނުލިބޭކަމަށް އަސްލަމް ވިދާޅުވި އެވެ.
ޖުމްހޫރީ ޕާޓީގެ ނިންމުންތަކަށް ފާޑުވިދާޅުވެ ވާހަކަ ދައްކަވަމުން އަސްލަމް ވިދާޅުވީ ޖޭޕީގެ ޕާލިމެންޓްރީ ގުރޫޕް މިހާރަށް ވުރެ ހަރުދަނާވާންޖެހޭ ކަމަށް ގަބޫލުކުރައްވާ ކަމަށެވެ. އެގޮތުން ޖުމްހޫރީ ޕާޓީން ސާފު ސްޓޭންޑެއް ނަންގަވަން ޖެހޭކަމަށާއި، ސާފު ސްޓޭންޑެއް ނެގިފައި އޮންނަތަން ނުފެންނަ ކަމަށް އަސްލަމް ވިދާޅުވި އެވެ.
"އެމްޑީޕީގެ ސަރުކާރު ވައްޓާލުމަށްޓަކައި 2008 ވަނަ އަހަރުން ފެށިގެން ކުރެވުނު މަސައްކަތްތަކުގެ ތެރޭގައި، އެންމެ ފުރަތަމަ ކުރައްވަން ފެއްޓެވި ކަމަކީ ވަޒީރުންގެ އިތުބާރު ނެތްކަމުގެ މައްސަލަތައް ކުރިއަށްގެންދެވުން. އަދި އޭގެ އިތުރަށް ދައުލަތުގެ މާލިއްޔަތުގެ ޤާނޫނަށް ބަދަލު ގެންނަވާ، ސަރުކާރަށް ދަތިކުރަން ފެއްޓެވި. ހަމައެހެންމެ ބައެއް ޤާނޫނުތަކުގެ ތެރެއިން، ދައުލަތުގެ ހަރަދު ބޮޑުކޮށް ދައުލަތަށް ނުކަތާ ވަރުގެ ހަރަދުތަކެއް ކުރިމަތިކުރުވި" އަސްލަމް ވިދާޅުވިއެވެ.
