އިންޑިއާގެ ޚާރިޖީ ވަޒީރު ސުޝްމާ ފުރާވަޑައިގެންފި
18 މާރިޗު 2019 | ހޯމަ 08:56މި ދަތުރުފުޅުގައި ރާއްޖެއާ އެކު ތިން އެއްބަސްވުމެއްގައި ވަނީ އާދީއްތަ ދުވަހު ސޮއި ކުރައްވާފައި
އާދީއްތަ ދުވަހު ސުޝްމާ ރާއްޖެ ވަޑައިގެންނެވުމުން އެކަމަނާ އަށް ފޮރިން މިނިސްޓަރ މަރުހަބާ ދަންނަވަނީ
ފޮރިން މިނިސްޓަރ އަބްދުﷲ ޝާހިދުގެ ދައުވަތަކަށް އާދީއްތަ ދުވަހު ރާއްޖެ ވަޑައިގަތް އިންޑިއާގެ އެކްސްޓާނަލް އެފެއާޒް މިނިސްޓަރ ސުޝްމާ ސުވަރާޖްގެ ދެ ދުވަހުގެ ދަތުރުފުޅު ނިންމަވާލެއްވުމަށް ފަހު އެނބުރި އިންޑިއާ އަށް ފުރާވަޑައިގެންފިއެވެ.
އެކަމަނާގެ މި ދަތުރުފުޅުގައި ހޯމަ ދުވަހު ވަނީ ރައީސް އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދާއި ހޯމް މިނިސްޓަރ އިމްރާން އަބްދުﷲއާ ބައްދަލުކުރައްވާފައެވެ.
އެ ތިން ބޭފުޅުންނާއި ބައްދަލުކުރައްވައި ޒަމާނުއްސުރެ ރާއްޖެއާ ދެމެދު އޮތް ގުޅުން ބަދަހިކުރެއްވުމާ ގުޅޭ ގޮތުން މަޝްވަރާ ކުރެއްވިއެވެ.
އެކަމަނާ އާދީއްތަ ދުވަހު ވަނީ އައިޖީއެމްއެޗްގެ އާބާތުރަ ފިލުވުމަށް އިންޑިއާ އިން ހިންގި މަޝްރޫއުގެ ދަށުން މިހާތަނަށް ނިމިފައިވާ ތަންތަން އިފްތިތާހުކޮށްދެއްވާފައެވެ.
އެކަމަނާގެ މި ދަތުރުފުޅުގައި ރާއްޖެއާ އެކު ތިން އެއްބަސްވުމެއްގައި ވަނީ އާދީއްތަ ދުވަހު ސޮއި ކުރައްވާފައެވެ. އޭގެ ތެރޭގައި ދިވެހި ދައުލަތުގެ އިސްބޭފުޅުންނަށް ޑިޕްލޮމެޓިކް ވިސާގެ ކަންކަމުގައި ލުއި ގޮތްތަކެއް ހަމަޖައްސައިދިނުމާއި، ތަރައްގީގެ މަސައްކަތްތަކުގައި ގުޅިގެން މަސައްކަތްކުރުމާއި، އިއާދަކުރަނިވި ހަކަތައިގެން ދާއިރާއިން ރާއްޖެއަށް އެހީ ދިނުމުގެ އެއްބަސްވުންތަކެއްގައި ރާއްޖެ އާއި އިންޑިއާއާއި ދެމެދު ވަނީ ސޮއިކުރައްވާފައެވެ.
ރާއްޖެއަށް ކުރެއްވި މިދަތުރުފުޅުގައި ސުޝްމާ ވަނީ ރައްޔިތުންގެ މަޖިލީހުގެ ރައީސް ގާސިމް އިބްރާހީމާ ބައްދަލުކުރައްވާފައެވެ. އަދި މިނިސްޓަރުންނާއި ވެސް އެކަމަނާ ވަނީ އާދީއްތަ ދުވަހު ބައްދަލުކުރައްވާފައެވެ.
