މާދަމާ އަކީ ރެހެންދި ނައިޓް މާރކެޓްގެ ފަހު ދުވަސް

މާދަމާއަކީ ހުޅުމާލޭ ރެހެންދި ސްކޫލުން އިންތިޒާމް ކޮށްގެން ކުރިއަށް ގެންދާ 'ރެހެންދި ނައިޓް މާކެޓް'ގެ އެންމެ ފަހު ދުވަހެވެ.

އެ ސްކޫލުގެ ޕީޓީއޭގެ އެކްސްކޯގެ އެކްޓިވިޓީ ޗެއަރ އިރުޝާދު ޒާހިރު ވިދާޅުވީ ރެހެންދި ނައިޓް މާރކެޓް 2019އަކީ ސްކޫލުގެ އެކިއެކި ހަރަކާތްތަކަށް ފަންޑްރެއިޒް ކުރުމުގެ ގޮތުން ކުރިއަށް ގެންދާ ހަރަކާތެއް ކަމަށްވެފައި، އާންމުންގެ ވަރަށް ބޮޑު ތަރުހީބެއް މިކަމަށް ލިބިގެންދާ ކަމަށެވެ.

އެއްދުވަސް އިތުރު ކުރުމަށް ނިންމީ ގިނަ ބައެއްގެ އެދުމުގެ މަތިން ކަަމަށް އިރުޝާދު ވިދާޅުވިއެވެ.

ސްކޫލުގެ ޓީޗަރުންނާއި ބެލެނިވެރިން ގުޅިގެން ކުރިއަށް ގެންދާ މި ނައިޓް މާރކެޓް ކުރިއަށް ދާނީ މާރޗް މަހުގެ 8 އިން 18ގެ ނިޔަލަށެވެ. އަދި ކޮންމެ ދުވަހަކު ވެސް ހަވީރު 4:00 އިން ރޭގަނޑު 12:00 ނައިޓް މާރކެޓް ހުޅުވިފައި ހުންނާނެއެވެ.

ހުޅުމާލޭގެ ރުއްގަނޑު ސަރަހައްދުގައި ކުރިއަށްގެންދާ އެ ނައިޓް މާރކެޓުގައި ގިނަ އަދަދެއްގެ ސްޓޯލް ހުންނާނެއެވެ. ތަފާތު ގިނަ ބާވަތްތަކުގެ މުދާ އެއް ތަނަކުން ހެޔޮ އަގުގައި ލިބެން ހުންނާނެ ކަމަށާއި އަދި ކެންޓީނުގެ ޚިދުމަތް ވެސް ލިބެން ހުންނާނެ ކަމަށް އިރުޝާދު ވިދާޅުވިއެވެ.

އެހެންކަމުން މާދަމާއަކީ ފަހު ދުވަހަށް ވެފައި، ބެލެނިވެރިންނާއި ދަރިވަރުން އަދި ހުޅުމާލޭގައި ދިރިއުޅޭ ރައްޔިތުން ޒިޔާރަތްކޮށްލަން ވަރަށް ރަނގަޅު ނައިޓް މަރކެޓެއް ކަމަށްވެސް އެ ސުކޫލުން ބުންޏެވެ.

މީގެ ކުރިން ވެސް ރެހެންދި ސްކޫލުން ވަނީ ތަފާތު ގިނަ ފަންޑްރެއިޒިން ހަރަކާތްތައް ބާއްވާފައެވެ. އެގޮތުން 2016، 2017، 2018ވަނަ އަހަރު ވެސް ވަނީ ޕީޓީއޭ. އިން އިންތިޒާމް ކޮށްގެން އާންމުންގެ ބޮޑު ތަރުހީބަކާއި އެކު ނައިޓް މާކެޓެއް ވެސް ބާއްވާފައެވެ.