މިދިޔަ ހަފްތާ އެކަނި ވެސް 53 މަގުމަތީ އެކްސިޑެންޓް!
17 މާރިޗު 2019 | އާދީއްތަ 06:00ފުލުހުން ވަނީ ޖުމްލަ 934 ވެހިކަލް ބަލާފާސްކޮށްފައި
ސިނަމާލެ ބްރިޖް
މިދިޔަ ހަފްތާގައި 53 މަގުމަތީ އެކްސިޑެންޓް ހިނގާފައިވާ ކަމަށް މޯލްޑިވްސް ޕޮލިސް ސަރވިސް އިން ބުނެފިއެވެ.
ފުލުހުންގެ ޓްރެފިކް މެނޭޖްމަންޓް ޑިޕާޓްމަންޓުން ނެރުނު ތަފާސް ހިސާބުތަކުން ދައްކާ ގޮތުގައި 9 މާރޗް އިން 15 މާރޗްގެ ނިޔަލަށް ޓްރެފިކް ފުލުހުން ވަނީ ޖުމްލަ 934 ވެހިކަލް ބަލާފާސްކޮށްފައެވެ. އޭގެ ތެރެއިން ލައިސެންސް ކާޑު ނެތި 139 ފަރާތެއް ހިފައްޓާފައިވާއިރު ލައިސެންސް ކާޑު އަތުގައި ނެތި 77 ފަރާތެއް ވަނީ ހިފަހައްޓާފައެވެ. ޓްރެފިކް ލައިޓަށް ތަބާ ނުވުމާއި ވަންވޭ ފަޅާލައިގެން ހަތް ފަރާތެއް ވެސް ހިފަހައްޓާފައި ވެއެވެ.
މީގެ އިތުރުން ވެހިކަލްގެ އިންޝުއަރެންސް ނެތިފގެން 42 ފަރާތެއް ހިފައްޓާފައިވާއިރު ވެހިކަލްގެ އަހަރީ ފީ ނުދައްކައިގެން 55 ފަރާތެއް ހިފައްޓާފައި ވެއެވެ. އަދި ރޯޑްވާދިނަސް ނެތިގެން 60 ފަރާތެއް ހިފައްޓާފައިވެއެވެ. މީގެ އިތުރުން ޤަވާއިދާ ހިލާފަށް ވެހިކަލް ޕާކްކޮށްގެން 200 ފަރާތެއްގެ ވެހިކަލްތައް އެ ސަރަހައްދުން ފުލުހުން ވަނީ ނަގާފައެވެ.
ޓްރެފިކް ނިޝާންތަކާއި ހިލާފުވެގެން 40 ފަރާތެއް ހިފައްޓާފައިވާއިރު ބާރު ސްޕީޑްގައި ވެހިކަލް ދުއްވައިގެން އެއް ފަރާތެއް ވަނީ ހިފައްޓާފައެވެ. އަދި ވެހިކަލް ދުއްވައިގެން އުމުރުން 18 އަހަރުން ދަށުގެ ކުއްޖަކު ވަނީ ހިފައްޓާފައިވެއެވެ.
ޕާކިންގް ޤަވާއިދާ ހިލާފުވެގެން 232 ފަރާތެއް ޖޫރިމަނާކޮށްފައިވާއިރު ހަތަރު ކާރާއި 42 ސައިކަލު ފުލުހުން ވަނީ ޓޯކޮށްފައެވެ. މީގެ އިތުރުން ވެހިކަލް ދުއްވި ވަގުތު ފޯނު ނޫނީ ހެޑްސެޓް ބޭނުންކޮށްގެން 51 ފަރާތެއް ހިފައްޓާފައިވާއިރު ހުއްދަ ނެތް ސަރަހައްދަކަށް ވަދެގެން 20 ފަރާތެއް ވަނީ ހިފައްޓާފައެވެ.
ރާއްޖޭގައި މިހާރަކަށް އައިސް އެކްސިޑެންޓްތައް ގިނަވެފައިވާއިރު އެކްސިޑެންޓްތައް މަދުކުރެވޭނީ އަމިއްލަ ފަރުދީ ޒިންމާ އަދާކޮށްގެންނެވެ. ސިނަމާލެ ބްރިޖްގައި ހިނގާ އެކްސިޑެންޓްތައް ގިނަވުމުގެ ސަބަބުން ޓްރާންސްޕޯޓް މިނިސްޓްރީން ވަނީ މާޗް މަހުގެ 10 ވަނަ ދުވަހުން ފެށިގެން ހެލްމެޓް އަޅައިގެން ދަތުރުކުރުމަށް މަޖުބޫރުކޮށްފައެވެ. އަދި ހެލްމެޓް ނާޅާ ފަރާތްތަކާ މެދު ޤާނޫނީ ފިޔަވަޅު އަޅާނެ ކަމަށް ވެސް އެ މިނިސްޓްރީން ވަނީ ބުނެފައެވެ.
