ކްރައިސްޓްޗާޗް ހަމަލާ؛ މަރާލި މީހުންގެ ތެރޭގައި ނިއުޒިލޭންޑްގެ ގައުމީ ކީޕަރެއް

ނިއުޒިލެންޑުގެ ކްރައިސްޗާޗުގެ ދެ މިސްކިތަކަށް ދިން ޓެރަރިސްޓް ހަމަލާތަކުގައި، ބަޑިން ހަމަލާދީ މަރާލި 50 މީހުންގެ ތެރޭގައި ނިއުޒިލޭންޑް ގައުމީ ފުޓްސަލް ޓީމުގެ ކީޕަރު އަޓާ އެލަޔަންވެސް ހިމެނޭ ކަމަށް ރިޕޯޓްތައް ބުނެފިއެވެ.

ކުވައިތަށް އުފަން އުމުރުން 33 އަހަރުގެ އަޓާ މަރާލީ މަސްޖިދް އަލް ނޫރްގައި ނަމާދުކުރަމުން ދަނިކޮށް ކަމަށް ރިޕޯޓްތައް ބުނެއެވެ.

ނިއުޒިލޭންޑް ފުޓްބޯލް އެގްޒެކެޓިވް އެންޑްރިއު ޕްރެގްނެލް ވަނީ އަޓާ މަރުވުމުގެ ހިތާމައިގައި ބައިވެރިވާކަން ހާމަކޮށްފައެވެ. އަދި ފުޓުބޯޅަ އާއިލާއަކީ ވަރަށް ގުޅިލާމެހިފައިވާ އާއިލާއެއް ކަމަށާއި، މިއީ ލިބުނު ބޮޑު ދެރައެއްގެ ގޮތުގައި އޭނާ ވަނީ ސިފަކޮށްފައެވެ.

ނިއުޒިލޭންޑްގެ ފުޓްސަލް ޑިވެލޮޕްމެންޓް މެނޭޖަރ، އަދި އަޓާއާއެކު ފުޓްސަލް ގައުމީ ޓީމަށް ކުޅުނު ޖޯޝް މާގެޓްސް ބުނީ އަޓާ އަކީ ވަރަށް ރަނގަޅު މީހެއް ކަމަށާއި، އެއީ ގިނަ ބައެއްގެ އިހުތިރާމާއި، ލޯބި ލިބިފައިވާ މީހެއް ކަމަށެވެ.

ނިއުޒިލޭންޑް ފުޓްސަލް ޓީމަށް 19 މެޗު ކުޅެފައިވާ އަޓާގެ މަރާ ގުޅިގެން ފުޓުބޯޅަ އައިލާގެ ގިނަ މީހުން އަންނަނީ އެ ހިތާމާގައި ބައިވެރިވެ، ޝުއޫރު ފާޅުކުރަމުންނެވެ.

ކްރައިސްޓްޗާޗް ޓެކް އިންޑަސްޓްރީގެ މެމްބަރެއް ކަމަށްވާ އަޓާއަކީ ނިއުޒިލޭންޑްގައި ފޯން އެޕް ހެދުމަށް އެންމެ މަޝްހޫރު އެއް ކުންފުނި ކަމަށްވާ "އެލްޑަބްލިއުއޭ ސޮލިއުޝަންސް" ގެ ކޯފައުންޑާއެވެ.

މީގެއިތުރުން ނިއުޒިލޭންޑްގެ އިންޑަސްޓްރީ އެވޯޑުގައި "ޓްރާންސްފޯމެޓިވް ޓެކްނޮލޮޖީ އެންޑް ޑިޖިޓަލް ލީޑާސް" އެވޯޑް 2017 އަދި 2018 ވަނަ އަހަރު އަޓާއަށް ވަނީ ލިބިފައެވެ.