ޤުރުއާން މުދައްރިސްކަމުގެ ޑިގްރީ ކޯހުގެ ޓްރާސްކްރިޕްޓް ދޫކުރުން ލަސްވާތީ ކަންބޮޑުވުންފާޅުކޮށްފި

ޤުރުއާނާ ބެހޭ މަރުކަޒުން ކުރިއަށް ގެންދާ ގުރުއާން މުދައްރިސްކަމުގެ ޑިގްރީ ކޯސް ނިންމި ދަރިވަރުންގެ ޓްރާސްކްރިޕްޓް ދޫކުރުން ލަސްވާތީ އެދަރިވަރުންތައް ކަންބޮޑުވުން ފާޅުކޮށްފިއެވެ.

ޤުރުއާން މުދައްރިސްކަމުގެ ޑިގްރީ ކޯހަކީ އެޑިޔުކޭޝަން މިނިސްޓްރީއާ، އިސްލާމިކް މިނިސްޓްރީ އަދި ކީރިތި ޤުރުއާނާ ބެހޭ މަރުކަޒު ގުޅިގެން ކުރިއަށް ގެންދާ ކޯހެކެވެ.

2018 ވަނަ އަހަރުގެ ނޮވެންބަރު މަހު މިކޯސް ނިންމި ދަރިވަރަކު ރާއްޖެއެމްވީއަށް ބުނީ ގްރެޖުއޭޝަން ނުބާއްވާނެ ކަމަށާއި، ސެޓްފިކެޓް ފަހުން ދޫކުރެވޭނެ ކަމަށް ޤުރުއާނާ ބެހޭ މަރުކަޒުން އަންގާފައިވާ ކަމަށެވެ. ނަމަވެސް ސެޓްފިކެޓް ދޫކުރާނެވަކި ތާރީހެއް އަންގާފައިނުވާ ކަމަށެވެ.

އެގޮތުން ކޯސްނިންމިކަމުގެ ލިޔުމާއި ޓްރާސްކްރިޕްޓް ދޫކުރަން 65 ދަރިވަރުން އެދިފައިވާ ކަމަށާއި، ކޯސް ނިންމިކަމުގެ ލިޔުން ދޫކުރި ނަމަވެސް ޓްރާސްކްރިޕްޓް ދޫކޮށްފައިނުވާ ކަމަށެވެ.

އެމީހާ ބުނީ ޓްރާސްކްރިޕްޓް ހޯދަން މަސައްކަތްކުރާތާ ދެމަސްމަހަށް ވުރެ ގިނަ ދުވަސްވެފައިވާ ކަމަށާއި، ކަމާ ބެހޭ އެއްވެސް އިދާރާއަކުން އެއްބާރުލުންދީފައިނުވާ ކަމަށެވެ. އަދި އިސްލާމިކް މިނިސްޓްރީއާ، އެޑިކުޔޭޝަން މިނިސްޓްރީއަށް ސީޓީ ފޮނުވި ނަމަވެސް މިހާތަނަށް ޖަވާބުދީފައިނުވާ ކަމަށެވެ.

ޓްރާސްކްރިޕްޓް ދޫކުރުން ލަސްވުމަކީ އެތައް ދަރިވަރުންނެއްގެ ހައްގުތައް ގެއްލޭކަމެއްކަން ފާހަގަކޮށް އެމީހާ ބުނީ ބައެއް ދަރިވަރުންނަށް ވަޒީފާގެ ކުރިއެރުމާއި، މުސާރައިގެ ކުރިއެރުން ނުލިބި ލަސްވާ ކަމަށެވެ.

ނަންހާމަ ނުކުރުމަށް ޝަރުތުކޮށް ކޯހުގެ ކޯޑިނޭޓަރުއާ ހަވާލާދީ އެމީހާ ބުނީ މިކޯހުގެ މައްސަލަތަކެއްދިމާވެ، ބަޖެޓްނެތިގެން ގްރެޖްއޭޝަން ނުބާއްވަން ވެސް ނިންމީ ކަމަށެވެ.

''އެޑިޔުކޭޝަން މިނިސްޓްރީއަށް ދިޔާމަ ބުނާނެ އިސްލާމިކް މިނިސްޓްރީންނޭ ބަލާނީ. ދެން އިސްލާމިކް މިނިސްޓްރީން ބުނާނެ ބަލަމުންނޭ މިދަނީ. އެކަމަކު އިދާރީކަންކަން ބަލަހައްޓާނީ ޤުރުއާނާ ބެހޭ މަރުކަޒުންނޭ. ދެން މަރުކަޒުން މިބުނަނީ އެމްކިޔުއޭއަށް ފޮނުވާފައޭ. އެކަމަކު އެމްކިޔުއޭއަށް ދިޔާމަ މިބުނަނީ ފޮނުވާފައެއް ނެތޭ" އެމީހާ ބުންޏެވެ.

މިމައްސަލައާ ގުޅިގެން އިސްލާމިކް މިނިސްޓަރުގެ ނައިބު އަހުމަދުﷲ ޖަމީލް ވިދާޅުވީ މިކޯހުގެ އެއްވެސް މައްސަލައެއް ދިމާނުވާ ކަމަށާއި، ޓްރާސްކްރިޕްޓް ދޫކުރުމަށް ކުރަންޖެހޭ އެންމެހައި މަސައްކަތްތައްކޮށް ނިމިފައިވާ ކަމަށެވެ. އަދި އެޕްރޫވަލް ހޯދުމަށް މޯލްޑްވިސް ކޮލިފިކޭޝަން އޮތޯރިޓީ (އެމްކިޔުއޭ)އަށް ފޮނުވާފައިވާ ކަމަށާއި، އެޕްރޫވަލް ދިނުމުން ވީއެންމެ އަވަހަށް ޓްރާސްކްރިޕްޓްދޫ ކުރާނެ ކަމަށެވެ.

މިމައްސަލާއާ ގުޅިގެން ޤުރުއާނާ ބެހޭ މަރުކަޒުގެ ބަހެއް ވަނީ ލިބޭ ގޮތް ނުވެފައެވެ.