ނިއުޒިލެންޑުގެ މިސްކިތްތަކަށް ދިން ހަމަލާގައި ދިވެއްސަކަށް އަނިޔާއެއް ނުވޭ
15 މާރިޗު 2019 | ހުކުރު 12:39ނިއުޒިލެންޑުގެ ދެ މިސްކިތަކަށް ބަޑީގެ ހަމަލާދީ 40 މީހަކު މަރާލާފައިވޭ
ކްރައިސްޗާޗްގެ ދެ މިސްކިތަކަށް ދިން ހަމަލާގައި އަނިޔާ ލިބުނު ފަރާތެއް
ހުކުރު ދުވަހު ނިއުޒިލެންޑުގެ ކްރައިސްޗާޗުގެ ދެ މިސްކިތަށް ދިން ބަޑީގެ ހަމަލާގައި އެއްވެސް ދިވެއްސަކަށް އަނިޔާއެއް ލިބިފައިވާ ކަމުގެ ރިޕޯޓް ލިބިފައިނުވާ ކަމަށް ފޮރިން މިނިސްޓްރީން ކޮށްފައިވާ ޓްވީޓެއްގައި ބުނެފިއެވެ. ހަމަލާ އަމާޒުވި މީހުންގެ ތެރޭގައި ރާއްޖޭގެ އެއްވެސް މީހަކު ހިމެނޭ ކަމުގެ ރިޕޯޓެއް ލިބިފައި ނުވާ ކަމަށާއި ނަމަވެސް އެކަމުގައި އިތުރަށް ބަލަންޖެހޭ ކަންކަން ބަލަމުން ގެންދާނެ ކަމަށް ފޮރިން މިނިސްޓްރީގެ ޓްވީޓްގައި ބުނެފައިވެއެވެ. މި ހަމާލާގެ ސަބަބުން ހިތާމަކުރާ ކަމަށާއި މި ހިތާމައިގައި ނިއުޒިލެންޑުގެ ރައްޔިތުންނާއެކު ރާއްޖެއިންވެސް ބައިވެރިވާ ކަމަށް މިނިސްޓްރީގެ ޓްވީޓްގައި ބުނެފައިވެއެވެ.
ނިއުޒިލެންޑުގެ ދެ މިސްކިތަކަށް ބަޑީގެ ހަމަލާދީ 40 މީހަކު މަރާލާފައި ވާއިރު، މި ހަމަލާ ދީފައިވަނީ ހުކުރު ވަގުތުގައި ކަމަށް ބޭރުގެ ބައެއް ނޫސްތަކުގައި ހާމަކޮށްފައިވެއެވެ. ހަމަލާ ދިންއިރު މިސްކިތެއްގައި ނަމާދުކުރަން 100 އަށްވުރެ ގިނަ މީހުން ތިބި ކަމަށްވެސް ނޫސްތަކުގައި ބުނެފައިވެއެވެ.
މި ހާދިސާއާ ގުޅިގެން ސީއެންއެން އިން ބުނެފައިވަނީ ކްރައިސްޗާޗްގެ ދެ މިސްކިތަކަށް ދިން މި ހަމަލާއަކީ ޓެރަރިސްޓު ހަމަލާއެއް ކަމަށް ޝައްކުކުރާ ކަމަށެވެ. އަދި މިއީ ގިނަ ރޭވުންތަކަކާއެކު ދީފައިވާ ހަމަލާއެއް ކަމަށް ޝައްކުކުރާ ކަމަށް ވެސް ބުނެފައިވެއެވެ. ނުރައްކާތެރި ހަމަލާދޭ އާލާތްތަކެއް ހަރުކޮށްފައިވާ ދެ ކާރެއްވެސް މިހާރު ފެނިފައިވާ ކަމަށާއި މި ތަކެތި މިހާރު ވަނީ ފުލުހުންގެ ބެލުމުގެ ދަށުގައި ކަމަށްވެސް ސީއެންއެން އިން ބުނެފައިވެއެވެ. އަދި ތުހުމަތުކުރެވޭ 4 މީހަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށްވެސް ވަނީ ބުނެފައެވެ.
