ޕޮލިސް އެކަޑަމީ އިން ފުލުހުންނަށް އަމާޒުކޮށްގެން ހިންގި ޕްރޮޓެކްޓިވް ސެކިއުރިޓީ ޓްރެއިނިންގ ކޯހުގެ ހަވަނަ ބުރު  ނިންމައި ކޯހުން ފާސްވި ބައިވެރިންނަށް ހަނދާނީ ލިޔުން ދީފިއެވެ.

އިސްކަންދަރު ބިލްޑިންގައި މިކަމަށްޓަކައި ބޭއްވި ޚާއްސަ ރަސްމިއްޔާތު ޝަރަފުވެރި ކޮށްދެއްވައި އެސިސްޓެންޓް ކޮމިޝަނަރ އޮފް ޕޮލިސް އިސްމާއީލް ނަވީން ވިދާޅުވީ ރައްޔިތުންނަށް ޚިދުމަތް ކުރުމާއި ސަލާމަތާއި ރައްކާތެރިކަން ދިނުމަކީ މޯލްޑިވްސް ޕޮލިސް ސަރވިސްގެ މައިގަނޑު އަސާސްގެ ތެރޭގައި ހިމެނޭ ކަމެއް ކަމަށާއި ކޯހުން ދަސްވެނިވެގެން އަމަލީ މައިދާނަށް ނުކުންނަ ހުރިހާ ފުލުހުން ޕްރޮފެޝަނަލްކޮށް މަސައްކަތްކުރުމާއި އަދި މަސައްކަތުގެ މައިދާނުގައާއި އާންމު ދިރިއުޅުމުގައިވެސް ރޯލު މޮޑެލެއްގެ ގޮތުގައި އެހެން ފުލުހުންނަށާއި  ޒުވާނުންނަށް ނަމޫނާ ބަޔަކަށް ވާންޖެހޭ ކަމަށެވެ. 

މީގެ އިތުރުން މަސައްކަތުގެ މައިދާނުގައި ދިމާވާ ކޮންމެ ކަމަކާވެސް ކެތްތެރިކަމާއި ހިތްވަރާއި ކުޅަދާނަކަމާއެކު ކުރިމަތިލައި އިތުބާރު ނުގެއްލޭ ގޮތަށް މަސައްކަތްކޮށް އަޚްލާޤީ މިންގަނޑު ބެހެއްޓުމަށް ނަވީން ނަސޭޙަތްތެރިވެފައިވެއެވެ. ފުލުހުންގެ ފަރާތުން ޕަރސަނަލް ސެކިއުރިޓީ އޮފިސަރުން ތަމްރީން ކުރުމުގެ ހަވަނަ ބުރުގައި 33 ފުލުހަކު ބައިވެރިވެ 29 ފުލުހަކުވަނީ ކޯހުން ފާސްވެ ސެޓިފިކެޓު ޙާސިލުކޮށްފައެވެ.

މިރަސްމިއްޔާތުގައި، އެސިސްޓެންޓް ކޮމިޝަނަރ އޮފް ޕޮލިސް އިސްމާއީލް ނަވީނާއި، ޓްރެއިނިންގ އެންޑް ޑިވެލޮޕްމަންޓްގެ ހެޑް  އަޙްމަދު ޢަބްދުއް ރަހްމާނާއި، ފުލުހުންގެ އިސް އޮފިސަރުންނާއި، ކޮމިޝަންޑް އޮފިސަރުންންގެ އިތުރުން ކޯހުގެ މުދައްރިބުންނާއި ކޯހުގެ ބައިވެރިން ބައިވެރިވެފައިވެއެވެ.