އެމްޑީޕީއަކީ ތަންދޮރު ދަންނަ މީހުން ތިބި ޕާޓީއެއް: ނަޝީދު
12 މާރިޗު 2019 | އަންގާރަ 05:08މި ސަރުކާރަކީ އެމްޑީޕީގެ ސަރުކާރެއް ، އެހެން ބައެއްގެ ސަރުކާރެއް ނޫން
ރައީސް ނަޝީދު ވާހަކަދައްކަވަނީ
އެމްޑީޕީއަކީ ތަންދޮރު ދަންނަ މީހުން ތިބި ޕާޓީއެއް ކަމަށާއި އެމްޑީޕީން ރައްޔިތުންނަށް ހައްގު މިންވަރު ކަށަވަރުކޮށްދޭނެ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަތިވެރި ދާއިރާއަށް އެމްޑީޕީގެ ޓިކެޓުގައި ވާދަކުރައްވާ ކެންޑިޑޭޓް ހަސަން ޒަރީރުގެ ކެމްޕެއިން އިފްތިތާހުކުރުމުގެ ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ މެމްބަރުން މަޖިލީހުގައި ކުރާނެ ކަންތައްތައް އެކުލަވާލަމުން ދާތާ ދުވަސްތަކެއް ވެއްޖެ ކަމަށާއި އަމާޒަކީ ރާއްޖެއަކީ ތަރައްގީވެފައިވާ ގައުމަކަށް ހެދުން ކަމަށެވެ. ރާއްޖެއަކީ ގުދުރަތީ ވަސީލަތްތައް ގިނަ ގައުމެއްކަން ފާހަގަކުރައްވައި ރައީސް ނަޝީދު ވިދާޅުވީ ހަލާލު މަސަތްކަތްކޮށް ރަށްރަށުގައި ތިބެގެން ރަނގަޅު އާމްދަނީއެއް ހޯދުން އެއީ އެޖެންޑާ 19 ގެ އެންމެ ބޮޑު އެއް މަގްސަދުކަމަށެވެ.
މީގެ އިތުރުން ރައީސް ނަޝީދު ވިދާޅުވީ ތަރައްގީއަކީ ވަކި ހާއްސަ ކަންތައްތަކެއް ވަކި ގަޑިއެއްގައި ގެންނަ އެއްޗެއް ކަމަށާއި އެޖެންޑާ 19ގެ ދަށުން ހުރިހާ އެންމެންނަށް ވަޒީފާ ކަށަވަރު ވެގެންދާނެ ކަމަށެވެ. ރައީސް ނަޝީދު އިތުރަށް ވިދާޅުވީ މި ސަރުކާރަކީ އެމްޑީޕީގެ ސަރުކާރެއް ކަމަށާއި ރައީސްކަމުގެ މަގާމުގައި ހުންނެވީ އެމްޑީޕީގެ މެމްބަރެއް ކަމަށެވެ.
"އުފެދިފައި މިއޮތީ އެހެން ބައެއްގެ ސަރުކާރެއް ނޫން ، މިއީ އެމްޑީޕީގެ ސަރުކާރެއް، އެމްޑީޕީގެ ރިޔާސީ ކެންޑިޑޭޓް ނުކުންނަވާ އެ ކެންޑިޑޭޓަށް ރާއްޖޭގެ ރައްޔިތުން ވޯޓު ދިނީމައި އިންތިހާބުވެފައިވާ އެމްޑީޕީގެ ރައީސުލް ޖުމްހޫރިއްޔާ ، އެއި އެމްޑީޕީގެ ކުރީގެ ޕާލަމެންޓަރީ ގުރޫޕްގެ ލީޑަރ ، އެމްޑީޕީގެ ހިންނަވަރު ދާއިރާގެ ރައީސް ، އެމްޑީޕީގެ ފައުންޑަރ މެމްބަރެއް ، ދެން މި ސަރުކާރު އެހެން ބައެއްގެ ސަރުކާރައް ވާނެ އެހެން އެއްވެސް ގޮތެއް ނެތް " ރައީސް ނަޝީދު ވިދާޅުވިއެވެ.
ރައީސް ނަޝީދު އިތުރަށް ވިދާޅުވީ އެމްޑީޕީގެ ކެންޑިޑޭޓުންނަކީ ސަރުކާރު ކެންޑިޑޭޓުން ނޫން ކަމަށާއި ސަރުކާރަކީ އެމްޑީޕީ ކަމަށް ރައީސް ނަޝީދު ވިދާޅުވިއެވެ.
ރައްޔިތުންގެ މަޖިލީހުގެ އިންތިހާބުގައި އެމްޑީޕީގެ ޓިކެޓުގައި މަތިވެރި ދާއިރާއަށާއި ތޮއްޑޫ ދާއިރާއަށް ވާދަކުރައްވާ ކެންޑިޑޭޓުންގެ ކެމްޕެއިން ރަސްމީކޮށް ފައްޓަވައި ދެއްވުމަށް ދެ ދުވަހުގެ މުއްދަތަކަށް ކުރައްވާ ދަތުރުފުޅުގައި ރައީސް ނަޝީދު ވަނީ މަތިވެރި ދާއިރާގެ ދެ ރަށަކަށް ވަޑައިގަތުމުގެ އިތުރުން ތޮއްޑޫ ދާއިރާގެ ހުރިހާ ރަށްތަކަށް ވަޑައިގަތުމަށް ހަމަޖެހިފައެވެ.
